ಬೆಂಗಳೂರು: ಕನ್ನಡದ ಖ್ಯಾತ ನಟ ಶಂಕರ್‌ನಾಗ್ ಜತೆ ನಟಿಸಿದ್ದ ಉತ್ಸವ್ ಚಲನಚಿತ್ರದ ನೆನಪುಗಳನ್ನು ನಟಿ ನೀನಾ ಗುಪ್ತಾ ಇನ್‌ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದಾರೆ.
ರೇಖಾ, ಅಮ್ಜದ್ ಖಾನ್, ಅನುರಾಧಾ ಪಟೇಲ್ ಮತ್ತು ಶೇಖರ್ ಸುಮನ್ ತಾರಾಗಣ ಹೊಂದಿದ್ದ ಉತ್ಸವ್ ಚಲನಚಿತ್ರದ ಶೂಟಿಂಗ್ ಸಂದರ್ಭದ ಸೆಟ್‌ನಲ್ಲಿನ ಫೋಟೋ ಒಂದನ್ನು ನೀನಾ ಗುಪ್ತಾ ಪೋಸ್ಟ್ ಮಾಡಿದ್ದಾರೆ.
ಚಿತ್ರದ ಜತೆಗೆ, ಶಂಕರ್, ನೀವು ನಮ್ಮನ್ನು ಬಿಟ್ಟು ಬಹಳ ಬೇಗನೆ ಹೋಗಿಬಿಟ್ಟಿರಿ ಎಂದು ಅಡಿಬರಹ ನೀಡಿರುವ ನೀನಾ, 1984ರಲ್ಲಿ ಉತ್ಸವ್ ಚಿತ್ರದ ಸೆಟ್‌ನಲ್ಲಿ ಶಂಕರ್ ನಾಗ್ ಅವರನ್ನು ಮೊದಲ ಬಾರಿಗೆ ಭೇಟಿಯಾಗಿದ್ದೆ ಎಂದು ಹೇಳಿದ್ದಾರೆ.
ಗಿರೀಶ್ ಕಾರ್ನಾಡ್ ನಿರ್ದೇಶನದ ಚಿತ್ರದಲ್ಲಿ, ನೀನಾ ಗುಪ್ತಾ ಹಾಗೂ ಶಂಕರ್ ನಾಗ್ ನಡುವೆ ಕೆಲವೊಂದು ಭಾವನಾತ್ಮಕ ಸನ್ನಿವೇಶದ ಚಿತ್ರಣಗಳಿದ್ದವು. ಆ ಚಿತ್ರದ ಚಿತ್ರೀಕರಣ ಬಳಿಕ ನಾವು ಮತ್ತಷ್ಟು ಹತ್ತಿರವಾಗಿದ್ದೆವು, ನಮ್ಮ ಗೆಳೆತನಕ್ಕೆ ಅದು ಉತ್ತಮ ಆರಂಭ ದೊರಕಿಸಿತು ಎಂದು ನೀನಾ ತಿಳಿಸಿದ್ದಾರೆ.
