ಲೈಂಗಿಕ ದೌರ್ಜನ್ಯ ತಡೆ ಸಮಿತಿ ರಚನೆಗೆ ಚಲನಚಿತ್ರ ಮಂಡಳಿಗೆ ಸೂಚನೆ

‘ಮಹಿಳಾ ಆಯೋಗವು ಇಲ್ಲಿಗೆ ಬಂದಿದ್ದೇ ಮಹಿಳೆಯರ ಸಮಸ್ಯೆಗಳನ್ನು ಕೇಳಲು. ಆದರೆ ‘ಲೈಂಗಿಕ ದೌರ್ಜನ್ಯದಂತಹ ಪ್ರಕರಣಗಳು ಏನಿಲ್ಲ. ನಾವು ಹಲವು ವರ್ಷಗಳಿಂದ ಇದ್ದೇವೆ’ ಎಂಬ ಮಾತು ಕೆಲವರಿಂದ ಸಭೆಯಲ್ಲಿ ಕೇಳಿಬಂತು. ‘ನಿಮಗೇನೂ ಆಗಿಲ್ಲ ಅದು ಒಳ್ಳೆಯದು. ಆದರೆ ನನಗೆ ಕೆಟ್ಟ ಅನುಭವ ಆಗಿದೆ ಎಂದು ನಾನು ಅವರಿಗೆ ಉತ್ತರಿಸಿದೆ. ಇದಕ್ಕೆ ಪೂರಕವಾಗಿ ನಾನು ಸಂದರ್ಭವೊಂದನ್ನು ವಿವರಿಸಿದೆ. ಒಮ್ಮೆ ನಮ್ಮ ತಂಡದ ಸಿನಿಮಾದ ಸ್ಕ್ರಿಪ್ಟ್‌ ಒಂದನ್ನು ಪಿಚ್‌ ಮಾಡಲು ನಿರ್ಮಾಪಕರೊಬ್ಬರಿಗೆ ಕರೆ ಮಾಡಿದಾಗ ಅವರು ನನ್ನನ್ನು ಗೋವಾಕ್ಕೆ ಕರೆದಿದ್ದರು. ರಾಜ್ಯ ಪ್ರಶಸ್ತಿ ವಿಜೇತ ನಟಿಗೇ ಹೀಗೆ ಹೇಳಿದರೆ ಇನ್ನು ಹೊಸ ಹೆಣ್ಣುಮಗಳೊಬ್ಬಳು ನಿರ್ದೇಶಕಿಯಾಗುವ ಕನಸು ಕಂಡರೆ ಅವರಿಗೂ ಹೀಗೆ ಕೇಳುತ್ತಾರೆ ಅಲ್ಲವೇ ಎಂದೆ. ಸಮಿತಿ ರಚನೆಯಾಗಿ ತನಿಖೆಯಾದರೆ ಖಂಡಿತಾ ಆ ನಿರ್ಮಾಪಕರ ಹೆಸರು ಹೇಳುತ್ತೇನೆ.  ಪ್ರತಿರೋಧ ಕೇಳಿಬಂದರೂ ಕೊನೆಯಲ್ಲಿ ನಾನು ಮಾತನಾಡಿದೆ. ನಾನೊಂದು ಚೆಕ್‌ಬೌನ್ಸ್‌ ಪ್ರಕರಣಕ್ಕೆ ಕೆಎಫ್‌ಸಿಸಿ ಮೆಟ್ಟಲೇರಿದಾಗ ನನಗೆ ಸಹಾಯ ಸಿಗಲಿಲ್ಲ. ಇಲ್ಲಿ ಕೆಲವು ಪಟ್ಟಭದ್ರ ಹಿತಾಸಕ್ತಿಗಳು ಇವೆ‘ ಎಂದು ನಟಿ ನೀತು ಶೆಟ್ಟಿ ಹೇಳಿದ್ದಾರೆ. ‘ನಾನು ಸಭೆಯಲ್ಲಿ ಮಾತನಾಡುತ್ತಿರಬೇಕಾದರೆ ‘ನೀನು ಕೂತ್ಕೊಮ್ಮ. ನೀನು ಫೈರ್‌ ಇಂದ ಬಂದಿದ್ಯಾ’ ಎಂದು ಸಾ.ರಾ.ಗೋವಿಂದ್‌ ಅವರು ಹೇಳಿದರು. ನಾನು ಎಲ್ಲಿಂದಾದರೂ ಬಂದಿರಲಿ. ನಾನು ನಿಜವನ್ನೇ ಹೇಳುತ್ತಿದ್ದೇನಲ್ಲ. ನನ್ನ ಧ್ವನಿಯನ್ನೇ ಅಡಗಿಸಲು ಯತ್ನಿಸಿದರು. ಚಿತ್ರರಂಗದಲ್ಲಿ ಖಂಡಿತವಾಗಿಯೂ ಶೋಷಣೆ ಇದೆ. ನಾನು ಕೆಲಸ ಮಾಡಿದ್ದ ಸಿನಿಮಾದ ಇಬ್ಬರು ನಿರ್ಮಾಪಕರು ಸಭೆಯಲ್ಲಿ ಇದ್ದರು. ಅವರ ಸೆಟ್‌ನಲ್ಲೇ ನಾಯಕ ನಟರು ನನ್ನ ಕುರಿತು ಕೆಟ್ಟದಾಗಿ ಮಾತನಾಡಿದ್ದಾರೆ. ಈ ವರ್ತನೆ ಸರಿಯಲ್ಲ. ಇವತ್ತಿನ ಸಭೆಯಲ್ಲಿ ನಾನು ಕೆಲ ಘಟನೆಗಳನ್ನು ಹೇಳಿದ್ದೇನೆ. ತನಿಖೆಯ ವೇಳೆಯಲ್ಲಿ ಹೆಸರು ಅವಶ್ಯವಿದ್ದರೆ ಹೇಳುತ್ತೇನೆ’ ಎಂದು ನೀತು ಶೆಟ್ಟಿ ಹೇಳಿದರು.