ಮನುಷ್ಯನ ಅಂತರಂಗದ ನೈತಿಕ ಹಾಗೂ ಅನೈತಿಕ ವಿಚಾರಗಳನ್ನು ಕಾಡಿನ ಮಧ್ಯದಲ್ಲಿ ಹೇಳುವ ಪ್ರಯತ್ನ ಮಾಡಿರುವ ಮನುರೂಪ ಚಿತ್ರವು ದೇಶ–ವಿದೇಶಗಳ ಅನೇಕ ಪ್ರಶಸ್ತಿಗಳನ್ನು ಬಾಚಿಕೊಂಡಿದೆ.
ಇತ್ತೀಚೆಗೆ ಇಂಗ್ಲೆಂಡ್‌ನಲ್ಲಿ ನಡೆದ ಔಟ್ ಆಫ್ ದಿ ಕ್ಯಾನ್ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ‘ಉತ್ತಮ ಥ್ರಿಲ್ಲರ್ ಸಿನಿಮಾ ಪ್ರಶಸ್ತಿ’ ಗಳಿಸಿದೆ ಚಿತ್ರತಂಡ. ಈ ಮೂಲಕ ಮನರೂಪ ಕಳೆದ 6 ತಿಂಗಳಿನಲ್ಲಿ ಒಟ್ಟು 10 ಪ್ರಶಸ್ತಿಗಳನ್ನು ವಿವಿಧ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವಗಳಲ್ಲಿ ಪಡೆದುಕೊಂಡಂತಾಗಿದೆ.
‘ಆಯೋಜಕರು ತಿಳಿಸಿರುವಂತೆ ಜಗತ್ತಿನ ಬೇರೆ ಬೇರೆ ದೇಶಗಳ, ಸಂಸ್ಕೃತಿಯ 5 ಸಾವಿರ ಚಿತ್ರಗಳು ಔಟ್ ಆಫ್ ದಿ ಕ್ಯಾನ್ ಚಿತ್ರೋತ್ಸವದಲ್ಲಿ ಭಾಗವಹಿಸಿದ್ದವು. ಅವುಗಳಲ್ಲಿ 110 ಚಿತ್ರಗಳನ್ನು ಅಂತಿಮ ಸುತ್ತಿಗೆ ಆಯ್ಕೆ ಮಾಡಲಾಗಿತ್ತು. ಅವುಗಳಲ್ಲಿ ಕನ್ನಡದ ಮನರೂಪ ಚಿತ್ರ ಕೂಡಾ ಒಂದು. ಮನರೂಪಕ್ಕೆ ಉತ್ತಮ ಥ್ರಿಲ್ಲರ್ ಪ್ರಶಸ್ತಿ ಸಿಕ್ಕಿರುವುದು ಸಂತಸ ತಂದಿದೆ’ ಎಂದಿದ್ದಾರೆ ನಿರ್ದೇಶಕ ಮತ್ತು ನಿರ್ಮಾಪಕ ಕಿರಣ್ ಹೆಗಡೆ.
ಮನರೂಪದಲ್ಲಿ ದಿಲೀಪ್ ಕುಮಾರ್, ಅನುಷಾ ರಾವ್, ನಿಶಾ ಯಶ್ ರಾಮ್ ಹಾಗೂ ಶಿವಪ್ರಸಾದ, ಬಿ. ಸುರೇಶ್‌, ಅಮೋಘ ಸಿದ್ಧಾರ್ಥ್, ಗಜ ನಿನಾಸಂ ಹಾಗೂ ಪ್ರಜ್ವಲ್ ಗೌಡ ಮುಂತಾದವರು ಮುಖ್ಯಭೂಮಿಕೆಯಲ್ಲಿ ನಟಿಸಿದ್ದರು.
