ಹಿಂದಿಯ ಬಿಗ್‌ಬಾಸ್‌ ಸೀಸನ್‌ 14ಗೆ ಕ್ಷಣಗಣನೆ ಆರಂಭವಾಗಿದೆ. ಅಕ್ಟೋಬರ್‌ ತಿಂಗಳ ಮಧ್ಯದಲ್ಲಿ ಈ ರಿಯಾಲಿಟಿ ಶೋ ಆರಂಭವಾಗುವ ನಿರೀಕ್ಷೆಯಿದೆ.
ಬಿಗ್‌ಬಾಸ್‌ನ ಸೀಸನ್‌ 13 ವಿವಾದದ ಗೂಡಾಗಿದ್ದು ಎಲ್ಲರಿಗೂ ತಿಳಿದಿದೆ. ಆದರೆ, ಟೆಲಿವಿಷನ್‌ ರೇಟಿಂಗ್ಸ್‌ನಲ್ಲಿ ಈ ಶೋ ಹೊಸ ದಾಖಲೆ ಬರೆದಿತ್ತು. ಬಾಲಿವುಡ್‌ ನಟ ಸಲ್ಮಾನ್‌ ಖಾನ್ ಮತ್ತೆ ಈ ಕಾರ್ಯಕ್ರಮದ ನಿರೂಪಣೆಗೆ ಸಜ್ಜಾಗುತ್ತಿದ್ದಾರೆ. ಈಗಾಗಲೇ, ಕಲರ್ಸ್‌ ವಾಹಿನಿಯಲ್ಲಿ ಇದರ ಪ್ರೋಮೊಗಳು ಬಿತ್ತರಗೊಳ್ಳುತ್ತಿವೆ.
ಈ ನಡುವೆಯೇ ಸಲ್ಲು ಈ ಸೀಸನ್‌ಗೆ ಎಷ್ಟು ಸಂಭಾವನೆಯನ್ನು ಜೇಬಿಗಿಳಿಸಿಕೊಳ್ಳಲಿದ್ದಾರೆ ಎಂಬ ಬಗ್ಗೆ ಬಿಟೌನ್‌ನಲ್ಲಿ ಚರ್ಚೆ ಶುರುವಾಗಿದೆ. ಅವರಿಗೆ ಒಟ್ಟಾರೆ ಈ ಸೀಸನ್‌ನಲ್ಲಿ ಸುಮಾರು ₹ 250 ಕೋಟಿ ಸಂಭಾವನೆ ದೊರೆಯಲಿದೆ ಎಂಬುದು ಬಾಲಿವುಡ್‌ ಮೂಲಗಳ ಮಾಹಿತಿ.
ಸಲ್ಮಾನ್‌ ಖಾನ್ ಎರಡು ಸಂಚಿಕೆಗಳಿಗಾಗಿ ವಾರದಲ್ಲಿ ಒಂದು ದಿನ ಶೂಟಿಂಗ್‌ ನಡೆಸುತ್ತಾರಂತೆ. ಒಟ್ಟು 12 ವಾರಗಳ ಕಾಲ ಇದೇ ಮಾದರಿಯಲ್ಲಿ ಶೂಟಿಂಗ್‌ ನಡೆಯಲಿದೆ. ಹಾಗಾಗಿ, ಅವರು ಒಂದು ದಿನದ ಶೂಟಿಂಗ್‌ಗೆ ₹ 20.50 ಕೋಟಿ ಸಂಭಾವನೆ ಪಡೆಯಲಿದ್ದಾರೆ. ಸಂಚಿಕೆಯ ಲೆಕ್ಕದಲ್ಲಿ ಅವರು ಪ್ರತಿ ಸಂಚಿಕೆಗೆ ಪಡೆಯುವ ಸಂಭಾವನೆ ಮೊತ್ತ ₹ 10.25 ಕೋಟಿ.
ಪ್ರತಿವರ್ಷದ ಸೆಪ್ಟೆಂಬರ್‌ನಲ್ಲಿ ಬಿಗ್‌ಬಾಸ್‌ ಸೀಸನ್‌ ಶುರುವಾಗುತ್ತಿತ್ತು. ಕೋವಿಡ್‌–19 ಪರಿಣಾಮ ಈ ಬಾರಿ ವಿಳಂಬವಾಗಿದೆ. ಮುಂಬೈನಲ್ಲಿ ಬಿಗ್‌ಬಾಸ್‌ಗಾಗಿಯೇ ಫಿಲ್ಮ್‌ಸಿಟಿಯ ನಿರ್ಮಾಣ ನಡೆಯುತ್ತಿದ್ದು, ಇದಕ್ಕೆ ಮಳೆ ಅಡ್ಡಿಯಾಗಿದೆ.
