ಇದೇ ಸಂದರ್ಭದಲ್ಲಿ ಶಿವರಾಜ್‌ಕುಮಾರ್‌ ಅವರ ಜೊತೆಗಿನ ಒಡನಾಟವನ್ನು ನೆನಪಿಸಿಕೊಂಡ ಸುದೀಪ್‌, ‘ಶಿವಣ್ಣನ ಜೊತೆ ನಟನೆಯನ್ನೂ ಮಾಡಿದ್ದೇನೆ. ಅವರಿಗೆ ಆ್ಯಕ್ಷನ್‌ ಕಟ್‌ ಕೂಡಾ ಹೇಳಿದ್ದೇನೆ. ಪ್ರಭುದೇವ ಅವರು ನನಗೆ ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ. ಹರಿಕೃಷ್ಣ ಅವರು ನನ್ನ ಕೆಲವು ಸಿನಿಮಾಗಳಿಗೆ ಸಂಗೀತ ನೀಡಿದ್ದಾರೆ. ರಾಕ್ಲೈನ್ ಅವರೊಂದಿಗೆ ಸ್ನೇಹ, ಭಟ್ರ ಜೊತೆ ಸಲಿಗೆ. ಹೀಗಾಗಿ ‘ಕರಟಕ ದಮನಕ’ ಒಂದು ಫ್ಯಾಮಿಲಿ ಪ್ಯಾಕೇಜ್‌ ಸಿನಿಮಾ ಎಂದರೆ ತಪ್ಪಲ್ಲ. ಶಿವಣ್ಣ–ಪ್ರಭುದೇವ ಅವರು ಒಂದೇ ಫ್ರೇಮ್‌ನಲ್ಲಿ ಡ್ಯಾನ್ಸ್‌ ಮಾಡುವುದನ್ನು ನೋಡುವುದೇ ಅದ್ಭುತ. ಜೊತೆಗೆ ಇಬ್ಬರಲ್ಲೂ ಒಳ್ಳೆಯ ಕಾಮಿಡಿ ಟೈಮಿಂಗ್‌ ಇದೆ. ಇದೊಂದು ಬಹಳ ವಿರಳವಾದ ಕಾಂಬಿನೇಷನ್‌. ‘ಓಂ’ ಸಿನಿಮಾವನ್ನು ನಾನು ಮೊದಲ ವಾರದಲ್ಲೇ ಮೂರು ಬಾರಿ ನೋಡಿದ್ದೆ. ಈ ಸಿನಿಮಾ ಅಂದು ಗೇಮ್‌ ಚೇಂಜರ್‌ ಆಗಿತ್ತು. ‘ಸ್ಪರ್ಶ’ ಸಿನಿಮಾದ ಆಡಿಯೊ ಲಾಂಚ್‌ ಮಾಡಿದ್ದು ಶಿವಣ್ಣನೇ. ‘ವಿಲನ್‌’ನಲ್ಲಿ ಅವರೊಂದಿಗೆ ನಟನೆ ಮಾಡಲು ಅವಕಾಶ ಸಿಕ್ಕಿತ್ತು. ಅವರೊಬ್ಬರು ಮಜವಾದ, ಅದ್ಭುತವಾದ ವ್ಯಕ್ತಿ’ ಎಂದರು.
