ನಟಿ ತೇಜಸ್ವಿಗೂ ಕಾಡಿದ್ದ ಕಾಸ್ಟಿಂಗ್ ಕೌಚ್

ತೆಲುಗಿನ ಹಲವು ಸಿನಿಮಾಗಳಲ್ಲಿ ನಟಿಸಿರುವ ಹೆಗ್ಗಳಿಕೆ ಆಕೆಯದ್ದು. ಪ್ರಸ್ತುತ ಆಕೆ ‘ಕಮಿಟ್‌ಮೆಂಟ್‌’ ಚಿತ್ರದ ಬಿಡುಗಡೆಯ ನಿರೀಕ್ಷೆಯಲ್ಲಿದ್ದಾರೆ. ಇತ್ತೀಚೆಗೆ ಈ ಚಿತ್ರದ ಪ್ರಚಾರದ ವೇಳೆ ಆಕೆ ಚಿತ್ರರಂಗದಲ್ಲಿರುವ ‘ಪಾತ್ರಕ್ಕಾಗಿ ಪಲ್ಲಂಗ’ದ (ಕಾಸ್ಟಿಂಗ್ ಕೌಚ್) ಬಗ್ಗೆ ಮಾತನಾಡಿರುವುದು ಚರ್ಚೆಗೆ ಗ್ರಾಸವಾಗಿದೆ.

ಆಕೆಯ ಪ್ರಕಾರ ಚಿತ್ರರಂಗದಲ್ಲಿ ಕಾಸ್ಟಿಂಗ್‌ ಕೌಚ್‌ ಪ್ರಮಾಣ ಶೇಕಡ 90ರಷ್ಟು ಇದೆಯಂತೆ. ಆಕೆಗೂ ನಟನೆಯ ವೇಳೆ ಇದರ ಅನುಭವವಾಗಿದೆಯಂತೆ. ‘ಹೊಂದಾಣಿಕೆ ಮಾಡಿಕೊಂಡರೆ ಸಿನಿಮಾಗಳಲ್ಲಿ ಸಾಕಷ್ಟು ಅವಕಾಶ ನೀಡುವುದಾಗಿ ಹಲವು ಮಂದಿ ನನಗೂ ಕೇಳಿದ್ದಾರೆ. ಹಾಗಾಗಿಯೇ, ನಾನು ಕಳೆದ ವರ್ಷವೇ ಚಿತ್ರರಂಗದಿಂದ ಹೊರಹೋಗಲು ನಿರ್ಧರಿಸಿದೆ’ ಎಂದು ಹೇಳಿದ್ದಾರೆ.

‘ಮುಂಬೈ ಮೂಲದ ನಟಿಯರು ಕಾಸ್ಟಿಂಗ್ ಕೌಚ್‌ಗೆ ಬಹುಬೇಗ ಹೊಂದಿಕೊಳ್ಳುತ್ತಾರೆ. ಇದಕ್ಕಾಗಿ ಅವರು ಮಾನಸಿಕವಾಗಿಯೂ ಸಿದ್ಧರಾಗಿರುತ್ತಾರೆ. ಹಾಗಾಗಿ, ಸಿನಿಮಾಗಳಲ್ಲಿ ಬಹುಬೇಗನೇ ಅವಕಾಶ ಗಿಟ್ಟಿಸಿಕೊಳ್ಳುತ್ತಾರೆ. ಆದರೆ, ದಕ್ಷಿಣ ಭಾರತ ಚಿತ್ರರಂಗದ ನಟಿಯರು ಇದಕ್ಕೆ ಹೊಂದಿಕೊಳ್ಳುವುದಿಲ್ಲ. ಹಾಗಾಗಿಯೇ, ಅವರಿಗೆ ಅವಕಾಶಗಳು ಕಡಿಮೆ’ ಎಂದು ಹೇಳಿದ್ದಾರೆ ತೇಜಸ್ವಿ.

ತೇಜಸ್ವಿಗೂ ಒಬ್ಬ ಬಾಯ್‌ಫ್ರೆಂಡ್‌ ಇದ್ದನಂತೆ. ಆತನೊಟ್ಟಿಗೆ ಸಪ್ತಪದಿ ತುಳಿಯಲು ಆಕೆ ನಿರ್ಧರಿಸಿದ್ದರಂತೆ. ಆದರೆ, ಚಿತ್ರರಂಗದಲ್ಲಿ ಕಾಡುತ್ತಿರುವ ಕಾಸ್ಟಿಂಗ್ ಕೌಚ್ ಪರಿಣಾಮ ನಮ್ಮಿಬ್ಬರ ಪ್ರೀತಿಯು ವೈಫಲ್ಯ ಕಂಡಿತು ಎಂದು ಹೇಳಿದ್ದಾರೆ.