ಸಾಮಾಜಿಕ ಜಾಲತಾಣಗಳಲ್ಲಿ ಯಶ್‌ ದಂಪತಿ ಯಾವಾಗ ಪುತ್ರನಿಗೆ ಹೆಸರಿಡುತ್ತಾರೆ ಎಂದು ಅಭಿಮಾನಿಗಳು ಪ್ರಶ್ನಿಸುತ್ತಿದ್ದರು. ‘ಆಯುಷ್‌’ ಎಂದು ಹೆಸರಿಡಲು ನಿರ್ಧರಿಸಿದ್ದಾರೆ ಎಂಬ ಸುದ್ದಿಯೂ ಹರಡಿತ್ತು. ಕೊನೆಗೆ, ರಾಧಿಕಾ ಪಂಡಿತ್‌ ಅವರೇ ಇದಕ್ಕೆ ಸ್ಪಷ್ಟನೆಯನ್ನೂ ನೀಡಿದ್ದು ಉಂಟು. ಈಗ ಅಧಿಕೃತವಾಗಿ ಪುತ್ರನ ಹೆಸರನ್ನು ಘೋಷಿಸಿರುವುದು ಅವರ ಅಭಿಮಾನಿಗಳಿಗೆ ಖುಷಿ ತಂದಿದೆ. ಯಥರ್ವ್ ಎಂದರೆ ಪರಿಪೂರ್ಣ ಎಂದರ್ಥ.

ಶಾಸ್ತ್ರೋಕ್ತವಾಗಿಯೇ ನಾಮಕರಣ ನಡೆದಿದೆ. ಕುಟುಂಬದ ಸದಸ್ಯರಷ್ಟೇ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದಾರೆ. ನಾಮಕರಣ ಕಾರ್ಯಕ್ರಮದ ವಿಡಿಯೊ ಮಾಡಿರುವ ಯಶ್‌ ದಂಪತಿ ಅದನ್ನು ಸಾಮಾಜಿಕ ಜಾಲತಾಣದಲ್ಲಿಯೂ ಹಂಚಿಕೊಂಡಿದ್ದಾರೆ. ಅವರ ಪುತ್ರಿ ಆಯ್ರಾ ತಮ್ಮನ ಹೆಸರನ್ನು ಮುದ್ದಾಗಿ ಹೇಳಿರುವುದು ಗಮನ ಸೆಳೆಯುತ್ತದೆ.