ಮಂಗಳವಾರ, ಅಕ್ಟೋಬರ್ 20, 2020
23 °C
ದೇವಾಲಯಗಳಲ್ಲಿ ಅಂತರ ಇರಲಿ, ಮಾಸ್ಕ್‌ ಧರಿಸಿ

ಕೊರೊನಾ ಒಂದಿಷ್ಟು ತಿಳಿಯೋಣ: ದೇವಸ್ಥಾನದಲ್ಲೂ ಅಂತರ ಕಾಯ್ದುಕೊಳ್ಳಿ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ದಾವಣಗೆರೆ: ಕೊರೊನಾ ಸೋಂಕು ನೀರಿನಿಂದ ಬರುವುದಿಲ್ಲ, ಗಾಳಿಯ ಮೂಲಕ ಹರಡುತ್ತದೆ. ಹೀಗಾಗಿ ದೇವಸ್ಥಾನಗಳಲ್ಲಿ ತೀರ್ಥ, ಪ್ರಸಾದ ತೆಗೆದುಕೊಳ್ಳುವುದರಿಂದ ಸೋಂಕು ಬರುವುದಿಲ್ಲ. 

‘ಈ ತಿಂಗಳು ನವರಾತ್ರಿ, ಮುಂದಿನ ತಿಂಗಳು ದೀಪಾವಳಿ ಹಬ್ಬ ಇರುವುದರಿಂದ ದೇವಾಲಯಗಳಲ್ಲಿ ಜನಜಂಗುಳಿ ಸಾಮಾನ್ಯ. ಆದರೆ ಈ ಬಾರಿ ಕೋವಿಡ್‌–19 ಇರುವ ಕಾರಣ ಜನರು ಜಾಗ್ರತೆ ವಹಿಸಬೇಕು’ ಎನ್ನುತ್ತಾರೆ ದಾವಣಗೆರೆಯ ಚಿಗಟೇರಿ ಜಿಲ್ಲಾ ಆಸ್ಪತ್ರೆಯ ಜಿಲ್ಲಾ ಕ್ಷಯರೋಗ ನಿಯಂತ್ರಣಾಧಿಕಾರಿ ಡಾ. ಗಂಗಾಧರ ಕೆ.ಎಚ್‌.

‘ದಸರಾ ಇರುವುದರಿಂದ ದೇವಿ ದೇವಾಲಯಕ್ಕೆ ಬರುವ ಜನರ ಸಂಖ್ಯೆ ಹೆಚ್ಚು. ಆದರೆ ಜನರು ಮೈಮರೆಯುವಂತಿಲ್ಲ. ದೇವಾಲಯದಲ್ಲಿ ತೀರ್ಥ, ಪ್ರಸಾದ ತಿನ್ನುವುದರಿಂದ ಕೊರೊನಾ ಬಾರದು. ಆದರೆ ತೀರ್ಥ, ಪ್ರಸಾದ ನೀಡುವವರಿಗೆ ಸೋಂಕು ತಗುಲಿದ್ದರೆ ಎಚ್ಚರ ವಹಿಸುವುದು ಮುಖ್ಯ. ಅವರಿಂದ ಸೋಂಕು ಹರಡುವ ಸಾಧ್ಯತೆ ಇರುತ್ತದೆ. ಅಂತಹವರು ದೇವಾಲಯಕ್ಕೆ ಬರಬಾರದು. ಅಲ್ಲದೇ ತೀರ್ಥ, ಪ್ರಸಾದ ನೀಡುವವರು ಆದಷ್ಟು ಅಂತರ ಕಾಯ್ದುಕೊಂಡು, ಮಾಸ್ಕ್ ಧರಿಸಿಯೇ ಪ್ರಸಾದ ನೀಡುವುದು ಒಳಿತು. ಈಗ ಕೆಲ ದೇವಸ್ಥಾನಗಳಲ್ಲಿ ಸ್ವಯಂಚಾಲಿತ ಡಿಸ್ಪೆನ್ಸರ್‌ ಬಂದಿದೆ. ಅದನ್ನು ಒತ್ತಿದರೆ ತೀರ್ಥ ಬರುತ್ತದೆ. ಇಂತಹ ಡಿಸ್ಪೆನ್ಸರ್‌ ಅನ್ನು ಎಲ್ಲ ದೇವಾಲಯಗಳಲ್ಲಿ ಬಳಸುವುದು ಉತ್ತಮ’ ಎಂದು ಸಲಹೆ ನೀಡುತ್ತಾರೆ ಅವರು.

‘ಜನರು ದೇವಾಲಯಗಳಲ್ಲಿ ಪ್ರಸಾದ ತಿನ್ನದೆ ಮನೆಗೆ ತಂದು ತಿನ್ನುವುದೂ ಆರೋಗ್ಯದ ದೃಷ್ಟಿಯಿಂದ ಒಳಿತು. ಈ ರೀತಿ ಮಾಡುವುದರಿಂದ  ಸೋಂಕು ಹರಡುವುದರಿಂದ ದೂರ ಇರಬಹುದು. ದೇವಾಲಯದಲ್ಲಿ ಅಂತರ ಕಾಯ್ದುಕೊಳ್ಳುವುದು ಕಷ್ಟ. ಅಂತಹ ಸಂದರ್ಭದಲ್ಲಿ ಜನರೇ ಮುಂಜಾಗ್ರತೆ ವಹಿಸಬೇಕು’ ಎನ್ನುತ್ತಾರೆ ಡಾ. ಗಂಗಾಧರ್‌.

ಮಾಸ್ಕ್‌ ಧರಿಸುವುದು, ಅಂತರ ಕಾಯ್ದುಕೊಳ್ಳುವುದು, ಕೈ ತೊಳೆಯುವುದು ಅಥವಾ ಸ್ಯಾನಿಟೈಸರ್‌ ಬಳಕೆ ಈ ಮೂರು ನಮ್ಮ ಸೂತ್ರವಾಗಬೇಕು. ಕೊರೊನಾಗೆ ಲಸಿಕೆ ಬಂದರೂ ಇದನ್ನು ಪಾಲಿಸುವುದು ಆರೋಗ್ಯದ ದೃಷ್ಟಿಯಿಂದ ಉತ್ತಮ ಎಂಬುದು ಅವರ ಸಲಹೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು