ಕಲ್ಲಂಗಡಿ ಹಣ್ಣಿನಲ್ಲಿ ಏನಿದೆ?

ಹೊರಗೆ ಹಸಿರು ಕೋಟೆ, ಒಳಗೆ ಕೆಂಪು ಕೋಟೆ, ಸುತ್ತಲೂ ಕರಿಯ ಸೈನಿಕರು ಎಂದೊಡನೇ ಬಾಯಲ್ಲಿ ನೀರೂರಿಸುತ್ತಲೇ ನೆನಪಾಗುವುದು ಕಲ್ಲಂಗಡಿಹಣ್ಣು! ಸುಡು ಬಿಸಿಲಿಗೆ ತೃಷೆ ನೀಗಿಸುವುದಷ್ಟೇ ಅಲ್ಲದೆ ಅನೇಕ ಔಷಧೀಯ ಗುಣಗಳನ್ನೂ ಇದು  ಮೈಗೂಡಿಸಿಕೊಂಡಿದೆ. ಇದರ ಮೂಲ ಆಫ್ರಿಕವಾದರೂ ಹೆಚ್ಚು ಬೆಳೆಯುವುದು ಚೀನಾ ದೇಶದಲ್ಲಿ. ತುಳುವಿನಲ್ಲಿ ಬಚ್ಚಂಗಾಯಿ ಎಂಬ ಹೆಸರಿನಿಂದ ಕರೆಯಲ್ಪಡುವ ಇದು ಕ್ಯಾಲ್ಸಿಯಂ, ಮ್ಯಾಂಗನೀಸ್, ಸಸಾರಜನಕ, ಕಬ್ಬಿಣ,ಮೇದಸ್ಸು ಹಾಗೂ ವಿಟಮಿನ್ ‘ಸಿ’ ಮೊದಲಾದ ಜೀವಸತ್ವಗಳಿಂದ ಸಮೃದ್ಧವಾಗಿದೆ.

ಬೀಟಾ ಕೆರೋಟಿನ್ ಎಂಬ ಅಂಶವು ಕಲ್ಲಂಗಡಿ ಹಣ್ಣಿನಲ್ಲಿ ಹೇರಳವಾಗಿರುವುದರಿಂದ ಅದು ಕ್ಯಾನ್ಸರ್ ಕಣಗಳನ್ನು ನಾಶಗೊಳಿಸುತ್ತದೆ ಎಂದು ಅನೇಕ ಸಂಶೋಧನೆಗಳು ತಿಳಿಸಿವೆ. ಇದರಲ್ಲಿನ ವಿಟಮಿನ್  ‘ಎ’   ಜೀವಸತ್ವವು ಅಂಧತ್ವವನ್ನು ದೂರವಿಟ್ಟರೆ, ಹೆಚ್ಚಿನ ಪ್ರಮಾಣದಲ್ಲಿರುವ ಸೋಡಿಯಂ, ಪೊಟಾಶಿಯಂ ಅಧಿಕ ರಕ್ತದೊತ್ತಡವನ್ನು ನಿಯಂತ್ರಿಸುವುದರ ಜತೆಗೆ ಹೃದಯವು ಸುಗಮವಾಗಿ ಕಾರ್ಯವನ್ನು ನಿರ್ವಹಿಸುವಂತೆ ಮಾಡುತ್ತದೆ ಎಂಬುದನ್ನು ಫ್ಲೋರಿಡಾ ಯೂನಿವರ್ಸಿಟಿಯ ಅಧ್ಯಯನವು ಹೇಳುತ್ತದೆ. ಕೊಬ್ಬು ಮತ್ತು ಕೊಲೆಸ್ಟ್ರಾಲ್ ಮುಕ್ತವಾಗಿದ್ದು ಶಕ್ತಿವರ್ಧಕ ಆಹಾರವಾಗಿರುವುದರಿಂದ ಇದು ಡಯಟ್ ಪ್ರಿಯರ ಹಣ್ಣು ಎನಿಸಿಕೊಂಡಿದೆ. ಜಾಸ್ತಿ ನಾರಿನಂಶವಿರುವುದರಿಂದ ಮಧುಮೇಹಿಗಳೂ ಇದನ್ನು ಸೇವಿಸಬಹುದಾಗಿದೆ.

ಮನೆಮದ್ದು ಹೀಗಿದೆ
 *ಉರಿಮೂತ್ರದಿಂದ ಬಳಲುತ್ತಿರುವವರು ಕಲ್ಲಂಗಡಿ ರಸಕ್ಕೆ ಮಜ್ಜಿಗೆ, ಎಳನೀರು, ಜೀರಿಗೆ, ಉಪ್ಪು ಹಾಕಿ ಕುಡಿದಲ್ಲಿ ಶೀಘ್ರವಾಗಿ ಬಾಧೆಯಿಂದ ಗುಣಮುಖರಾಗಬಹುದು.

 *ಸೂರ್ಯನ ಝಳದಿಂದಾಗಿ  ತಲೆನೋವು ಬಂದಿದ್ದರೆ  ಈ ಹಣ್ಣಿನ ರಸಕ್ಕೆ  ಸ್ವಲ್ಪ ಹಾಲು ಮತ್ತು ಸಕ್ಕರೆ ಬೆರೆಸಿ ಸೇವಿಸಿದರೆ  ಉಪಶಮನವಾಗುತ್ತದೆ.

 *ಸಿಪ್ಪೆಯನ್ನು ಅಂಗಾಲಿಗೆ ಉಜ್ಜಿದಲ್ಲಿ ಅಂಗಾಲಿನ ಉರಿಯು ಕಡಿಮೆಯಾಗಿ ದೇಹವು ತಂಪಾಗುತ್ತದೆ.

*ಕಲ್ಲಂಗಡಿ ರಸವನ್ನು ಮಜ್ಜಿಗೆಯೊಂದಿಗೆ ಸೇವಿಸುವುದರಿಂದ ಅರಶಿನ ಕಾಮಾಲೆಯು ವಾಸಿಯಾಗುತ್ತದೆ.

*ಮೂತ್ರ ಸಂಬಂಧೀ ಕಾುಲೆಗಳು, ಮಲಬದ್ಧತೆ, ಜಲಾಂಶದ ಕೊರತೆ ಇರುವವರಿಗೆ ಈ ಹಣ್ಣು ಬಹಳ ಉಪಯುಕ್ತವಾಗಿದೆ.