ಚೆನ್ನೈ: ಕ್ಯಾನ್ಸರ್‌ ಸಂಸ್ಥೆಯ ಅಧ್ಯಕ್ಷೆ ಡಾ.ವಿ ಶಾಂತಾ ನಿಧನ

ಚೆನ್ನೈ: ಚೆನ್ನೈನ ಕ್ಯಾನ್ಸರ್ ಸಂಸ್ಥೆಯ ಅಧ್ಯಕ್ಷೆ ಡಾ.ವಿ.ಶಾಂತಾ(96) ಮಂಗಳವಾರ ನಿಧನರಾದರು.

‘ಸೋಮವಾರ ರಾತ್ರಿ 9 ಗಂಟೆಗೆ ಅವರಿಗೆ ತೀವ್ರ ಎದೆ ನೋವು ಕಾಣಿಸಿಕೊಂಡಿತ್ತು. ತಕ್ಷಣವೇ ಅವರನ್ನು ಆಸ್ಪತ್ರೆಗೆ ಕರೆದೊಯ್ಯಲಾಯಿತು. ಆದರೆ ಅವರ ಎದೆಯಲ್ಲಿ ರಕ್ತ ಹೆಪ್ಪುಗಟ್ಟಿತ್ತು. ಅದನ್ನು ವೈದ್ಯರಿಗೆ ತೆಗೆಯಲು ಸಾಧ್ಯವಾಗಿಲ್ಲ. ಮಂಗಳವಾರ ಬೆಳಿಗ್ಗೆ 3.55ಕ್ಕೆ ಅವರು ಆಸ್ಪತ್ರೆಯಲ್ಲೇ ಕೊನೆ ಉಸಿರೆಳೆದರು’ ಎಂದು ಕ್ಯಾನ್ಸರ್‌ ಸಂಸ್ಥೆಯ ಮೂಲಗಳು ತಿಳಿಸಿವೆ.

ಡಾ. ಶಾಂತಾ ಅವರ ಪಾರ್ಥಿವ ಶರೀರವನ್ನು ಹಳೆಯ ಕ್ಯಾನ್ಸರ್‌ ಸಂಸ್ಥೆಯ ಆವರಣಕ್ಕೆ ಕೊಂಡೊಯ್ಯಲಾಯಿತು.

‘ಡಾ. ಶಾಂತಾ ಅವರನ್ನು ಕ್ಯಾನ್ಸರ್‌ ಆರೈಕೆಯ ‘ಡೋಯೆನ್‌’ ಎಂದು ಕರೆಯಲಾಗುತ್ತಿತ್ತು. ಅವರು ನಮ್ಮನ್ನು ಬಿಟ್ಟು ಹೋಗಿರಬಹುದು. ಆದರೆ ಅವರ ಕೆಲಸಗಳು ಶಾಶ್ವತವಾಗಿ ಜೀವಂತವಾಗಿರುತ್ತವೆ’ ಎಂದು ಡಾ. ಆನಂದ ರಾಜ್‌ ಅವರು ತಿಳಿಸಿದರು.

ಡಾ. ಶಾಂತಾ ಅವರಿಗೆ, ಮ್ಯಾಗ್ಸೆಸ್ಸೆ, ಪದ್ಮಶ್ರೀ, ಪದ್ಮಭೂಷಣ್, ಮತ್ತು ಪದ್ಮವಿಭೂಷಣ ಪ್ರಶಸ್ತಿಗಳನ್ನು ನೀಡಿ ಗೌರವಿಸಲಾಗಿದೆ.