ಮಹದಾಯಿ ಜಲವಿವಾದ, ಕರ್ನಾಟಕದೊಂದಿಗೆ ಗೋವಾ ಸಿ.ಎಂ ಒಪ್ಪಂದ: ಟಿಎಂಸಿ ಆರೋಪ

ಪಣಜಿ: ಚುನಾವಣೆಯ ಹೊಸ್ತಿಲಲ್ಲಿರುವ ಗೋವಾದಲ್ಲಿ ಮಹದಾಯಿ ಜಲವಿವಾದ ಮತ್ತೆ ತಲೆ ಎತ್ತಿದೆ. 

ಮಹದಾಯಿ ಜಲವಿವಾದಕ್ಕೆ ಸಂಬಂಧಿಸಿ ಉಭಯ ರಾಜ್ಯಗಳ ನಡುವಿನ ನದಿಯ ನೀರು ಹಂಚಿಕೆ ವಿಷಯದಲ್ಲಿ ಗೋವಾದ ಹಿತಾಸಕ್ತಿಗಳನ್ನು ಬದಿಗೊತ್ತಿ ಮುಖ್ಯಮಂತ್ರಿ ಪ್ರಮೋದ್‌ ಸಾವಂತ್‌ ಅವರು ಕರ್ನಾಟಕ ಸರ್ಕಾರದೊಂದಿಗೆ ಒಪ್ಪಂದ ಮಾಡಿಕೊಂಡಿದ್ದಾರೆ ಎಂದು ತೃಣಮೂಲ ಕಾಂಗ್ರೆಸ್‌ ಶುಕ್ರವಾರ ವಾಗ್ದಾಳಿ ನಡೆಸಿದೆ. 

ಪಣಜಿಯಲ್ಲಿ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಟಿಎಂಸಿ ಮುಖಂಡ ಹಾಗೂ ಸಂಸದ ಮಹುವಾ ಮೊಯಿತ್ರಾ,  ‘ಮಹದಾಯಿ ಜಲವಿವಾದವು ನ್ಯಾಯಮಂಡಳಿಯಲ್ಲಿ ವಿಚಾರಣೆಯ ಅಂತಿಮ ಹಂತದಲ್ಲಿದ್ದರೂ ಕರ್ನಾಟಕವು ಒಪ್ಪಂದ ಮಾಡಿಕೊಂಡಿದ್ದರಿಂದ ಮಹದಾಯಿ ನೀರನ್ನು ಮಲಪ್ರಭಾ ಜಲಾನಯನ ಪ್ರದೇಶಕ್ಕೆ ಹರಿಸಲು ಸಾಧ್ಯವಾಗಿದೆ’ ಎಂದು ಹೇಳಿದರು.   

‘ಕರ್ನಾಟಕಕ್ಕೆ 7.5 ಟಿಎಂಸಿ ನೀರು ಹಂಚಿಕೆಯಾಗಿದೆ. ಆದರೆ ಸಾವಂತ್‌ ಮುಖ್ಯಮಂತ್ರಿಯಾದ ನಂತರ ಕರ್ನಾಟಕ ನಿಗದಿಗಿಂತ ಹೆಚ್ಚು ನೀರು ಪಡೆಯುತ್ತಿದೆ. ಕರ್ನಾಟಕದ ಹಿರಿಯ ಮುಖಂಡರುಗಳು ತಾವು ಸಾವಂತ್‌ ಜೊತೆ ಒಪ್ಪಂದ ಮಾಡಿಕೊಂಡಿದ್ದು, ಇನ್ನು ಯಾವುದೇ ಸಮಸ್ಯೆಯಿಲ್ಲ ಎಂದು ಹೇಳಿಕೊಂಡಿದ್ದಾರೆ’ ಎಂದು ಮೊಯಿತ್ರಾ ಆರೋಪಿಸಿದರು. 

ಸುಪ್ರೀಂಕೋರ್ಟ್‌ನಲ್ಲಿ ಹಂಚಿಕೆ ಸಂಬಂಧ ಅರ್ಜಿಯೊಂದು ವಿಚಾರಣೆಗೆ ಬಾಕಿ ಇರುವಾಗ ಗೋವಾ ಹೇಗೆ ಕರ್ನಾಟಕಕ್ಕೆ ಆಕ್ಷೇಪಣಾ ರಹಿತ ಪತ್ರವನ್ನು ನೀಡಿದೆ ಎಂದು ಮೊಯಿತ್ರಾ ಇದೇ ವೇಳೆ ಪ್ರಶ್ನಿಸಿದರು.