ಕರ್ನಾಟಕ–ಮಹಾರಾಷ್ಟ್ರ ಗಡಿ ವಿವಾದ: ರಾಜ್ಯಸಭೆಯಲ್ಲಿ ಚರ್ಚೆಗೆ ಅವಕಾಶ ನಿರಾಕರಣೆ

ಸಭಾಪತಿ ಜಗದೀಪ್‌ ಧನ್‌ಕರ್ ಅವರು, ‘ಗಡಿ ವಿಷಯದ ಚರ್ಚೆಗೆ ಅವಕಾಶ ಕೋರಿ ನಿಯಮ 267ರ ಅಡಿ ನನಗೆ ನೋಟಿಸ್ ಬಂದಿದೆ. ಅದು ಸಮರ್ಪಕವಾಗಿಲ್ಲದ್ದರಿಂದ ಚರ್ಚೆಗೆ ಅವಕಾಶ ನೀಡುವುದಿಲ್ಲ’ ಎಂದು ತಿಳಿಸಿದರು.

ದಿನದ ನಿಗದಿತ ಕಲಾಪವನ್ನು ಬದಿಗೊತ್ತಿ ಆದ್ಯತೆ ಮೇರೆಗೆ ಉಲ್ಲೇಖಿತ ವಿಷಯದ ಚರ್ಚೆಗೆ ಅವಕಾಶ ಕಲ್ಪಿಸಬೇಕು ಎಂದು ಕೋರಿ ನಿಯಮ 267ರಡಿ ಅರ್ಜಿ ಸಲ್ಲಿಸಲಾಗುತ್ತದೆ.

ನೋಟಿಸ್ ಸಲ್ಲಿಸಿದ್ದ ಶಿವಸೇನೆಯ (ಉದ್ಧವ್‌ ಠಾಕ್ರೆ ಬಣ) ಪ್ರಿಯಾಂಕಾ ಚತುರ್ವೇದಿ ಅವರು, ‘ಕರ್ನಾಟಕ–ಮಹಾರಾಷ್ಟ್ರ ಗಡಿ ವಿಷಯ ಮುಖ್ಯವಾದುದು. ರಾಷ್ಟ್ರಮಟ್ಟದಲ್ಲಿ ಚರ್ಚೆಯಾಗಬೇಕು‘ ಎಂದು ಪ್ರತಿಪಾದಿಸಿದರು.

‘ಉಲ್ಲೇಖಿತ ನಿಯಮದಡಿ ಚರ್ಚೆಗೆ ತೆಗೆದುಕೊಳ್ಳಬೇಕಾದ ಅಗತ್ಯ ಕಾಣಿಸುತ್ತಿಲ್ಲ. ನಿಯಮಾನುಸಾರ ನೋಟಿಸ್‌ ನೀಡಿ. ಬಳಿಕ ಪರಿಗಣಿಸೋಣ. ವ್ಯವಸ್ಥಿತವಾಗಿ ಚರ್ಚೆಯಾಗಲಿ’ ಎಂದು ಸಭಾಪತಿ ಹೇಳಿದರು.