ಪಟ್ನಾ:ಹಿಂದೂ ದೇವತೆಗಳ ಕುರಿತು ಬಿಹಾರದ ಬಿಜೆಪಿ ಶಾಸಕ ಲಲನ್‌ ಪಾಸ್ವಾನ್‌ ಅವರು ನೀಡಿರುವ ಹೇಳಿಯೊಂದು ವಿವಾದಕ್ಕೆ ಗ್ರಾಸವಾಗಿದ್ದು, ಬಿಜೆಪಿಗೆ ಮುಜುಗರ ಉಂಟುಮಾಡಿದೆ.ಲಕ್ಷ್ಮೀ, ಸರಸ್ವತಿ, ಹನುಮಂತನನ್ನು ಆರಾಧಿಸುವುದರಿಂದ ಸಿಗುವ ಭಾಗ್ಯವು ಈ ದೇವತೆಗಳನ್ನು ಆರಾಧಿಸದೇ ಇರುವವರಿಗೂ ಸಿಗುತ್ತದೆ ಎಂದು ಪಿರ್ಪೈಂತಿ ವಿಧಾನಸಭೆ ಶಾಸಕರಾದ ಲಲನ್‌ ಹೇಳಿದ್ದರು.
ಲಲನ್‌ ಅವರ ತಾಯಿ ವಾರದ ಹಿಂದೆ ಮರಣಹೊಂದಿದ್ದರು. ಅವರ ಗೌರವಾರ್ಥವಾಗಿ ‘ಮೃತ್ಯುಭೋಜ್‌’ (ಸಮಾರಾಧನೆಯ ಔತಣ) ಏರ್ಪಡಿಸುವುದನ್ನು ನಿರಾಕರಿಸಿದ್ದ ಅವರು, ತಮ್ಮದು ಕ್ರಾಂತಿಕಾರಿ ನಿಲುವು ಎಂದು ತೋರ್ಪಡಿಸುವ ಬರದಲ್ಲಿ ಈ ಹೇಳಿಕೆ ನೀಡಿದ್ದರು.
ಇದಕ್ಕೆ ಸಂಬಂಧಿಸಿದ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿತು ಮತ್ತು ಸುದ್ದಿ ವಾಹಿನಿಗಳು ಈ ವಿಡಿಯೊವನ್ನು ಪ್ರಸಾರ ಮಾಡಿದವು. ‘ದೇವತೆಯರಾದ ಸರಸ್ವತಿ, ಲಕ್ಷ್ಮಿಯನ್ನು ಮುಸ್ಲಿಮರು ಮತ್ತು ಕ್ರಿಶ್ಚಿಯನ್ನರು ಪೂಜಿಸುವುದಿಲ್ಲ. ಇದರಿಂದ ಆ ಸಮುದಾಯದ ಜನರಿಗೆ ಹಣ, ಶಿಕ್ಷಣ ನಿರಾಕರಿಸಲಾಗಿದೆಯೇ?ಬಜರಂಗ ಬಲಿಯನ್ನು ಅಮೆರಿಕದಲ್ಲಿ ಆರಾಧಿಸುವುದಿಲ್ಲ ಆದರೂ ಆ ದೇಶ ಸದೃಢವಾಗಿದೆ. ಇದೆಲ್ಲಾ ಕೇವಲ ನಂಬಿಕೆ ಅಷ್ಟೇ’ ಎಂದು ಲಲನ್‌ ಹೇಳಿರುವುದು ವಿಡಿಯೊದಲ್ಲಿ ಸೆರೆಯಾಗಿದೆ.
ಈ ಹೇಳಿಕೆ ಖಂಡಿಸಿ ಕೆಲ ಹಿಂದೂ ಸಂಘಟನೆಗಳು ಲಲನ್‌ ಅವರ ಪ್ರತಿಕೃತಿಯನ್ನು ದಹಿಸಿದ್ದಾರೆ.
ಪ್ರತಿಪಕ್ಷಗಳೂ ಲಲನ್‌ ಹೇಳಿಕೆಯನ್ನು ಖಂಡಿಸಿವೆ. ‘ಶಾಸಕರಿಗೆ ಹಿಂದೂ ದೇವತೆಗಳನ್ನು ಪೂಜಿಸುವವರ ಮತದ ಅಗತ್ಯವಿಲ್ಲ ಎಂದು ತೋರುತ್ತಿದೆ’ ಎಂದು ಆರ್‌ಜೆಡಿ ಶಾಸಕ ಮೃತ್ಯಂಜಯ್‌ ತಿವಾರಿ ವ್ಯಂಗ್ಯವಾಡಿದ್ದಾರೆ.
