ಗಡ್ಚಿರೋಲಿ: ಬಾಂಬ್‌ಸ್ಫೋಟ ಮತ್ತು ಅದರ ತಯಾರಿಕೆಗೆ ಅಗತ್ಯ ವಸ್ತುಗಳನ್ನು ನಕ್ಸಲರಿಗೆ ಪೂರೈಕೆ ಮಾಡುತ್ತಿದ್ದ ಜಾಲವನ್ನು ಭೇದಿಸಿರುವ ಇಲ್ಲಿನ ಪೊಲೀಸರು ನಾಲ್ವರು ನಕ್ಸಲ್ ಸಹಚರರನ್ನು ಬಂಧಿಸಿದ್ದಾರೆ.
ದಾಮ್ರಾಂಚ ಪೊಲೀಸ್‌ ಠಾಣಾ ವ್ಯಾಪ್ತಿಯಲ್ಲಿ ಶನಿವಾರ ಮಧ್ಯರಾತ್ರಿ ಬಂಗಾರ್‌ಪೇಟೆ ಗ್ರಾಮದ ಬಳಿ ನಕ್ಸಲ್ ಸಹಚರರ ಗುಂಪು ಸಾಮಗ್ರಿಗಳನ್ನು ಸರಬರಾಜು ಮಾಡುತ್ತಿರುವಾಗಲೇ ನಕ್ಸಲ್ ವಿರೋಧ ಕಾರ್ಯಾಚರಣೆ ನಡೆಸಿ ಬಂಧಿಸಲಾಗಿದೆ. ಒಬ್ಬ ತಪ್ಪಿಸಿಕೊಂಡಿರುವುದಾಗಿ ಭಾನುವಾರ ಪೊಲೀಸರು ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ತೆಲಂಗಾಣದಿಂದ ಛತ್ತೀಸಗಡಕ್ಕೆ ಸರಬರಾಜು ಆಗುತ್ತಿದ್ದ 3,500 ಮೀಟರ್‌ ಉದ್ದದ 10 ಬಂಡಲ್‌ ಕಾರ್ಡೆಕ್ಸ್‌ ತಂತಿಯನ್ನು ವಶಪಡಿಸಿಕೊಳ್ಳಲಾಗಿದೆ. ಇದನ್ನು ಬ್ಯಾರೇಲ್‌ ಗ್ರೆನೇಡ್ ಲಾಂಚರ್‌ ಮತ್ತು ಕೈನಿಂದ ಎಸೆಯುವ ಗ್ರೆನೇಡ್ ಮತ್ತು ಸುಧಾರಿತಸ್ಫೋಟಕ ಸಾಧನಗಳ ತಯಾರಿಕೆಯಲ್ಲಿಬಳಸಲಾಗುತ್ತಿತ್ತು ಎಂದು ಗಡ್ಚಿರೋಲಿಯ ಎಸ್ಪಿ ಅಂಕಿತ್‌ ಗೋಯಲ್‌ ತಿಳಿಸಿದ್ದಾರೆ.
ಇದೇ ಗಡ್ಚಿರೋಲಿ ಜಿಲ್ಲೆಯಲ್ಲಿ ಕಳೆದ ವರ್ಷ ನವಂಬರ್‌ನಲ್ಲಿ ಪೊಲೀಸರು ಎನ್‌ಕೌಂಟರ್‌ ಮೂಲಕ 26 ನಕ್ಸಲರನ್ನು ಕೊಂದು ಹಾಕಿದ್ದರು.
