ನವದೆಹಲಿ: ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳ ಸಚಿವಾಲಯವು (ಎಂಎಸ್‌ಎಂಇ), ತನ್ನ ಅಧೀನದಲ್ಲಿರುವ ತಂತ್ರಜ್ಞಾನ ಕೇಂದ್ರಗಳನ್ನು ಎಂಜಿನಿಯರ್ ಕಾಲೇಜುಗಳು, ಐಐಟಿಗಳು, ಪಾಲಿಟೆಕ್ನಿಕ್ ಕಾಲೇಜುಗಳು ಮತ್ತು ಕೈಗಾರಿಕಾ ಸಂಸ್ಥೆಗಳಿಗೆ ಭೋಗ್ಯಕ್ಕೆ ನೀಡಲು ಸಿದ್ಧತೆ ನಡೆಸಿದೆ.
‘ಇಂತಹ ತಂತ್ರಜ್ಞಾನ ಕೇಂದ್ರಗಳನ್ನು ಅಭಿವೃದ್ಧಿಪಡಿಸಲು ಈಗಾಗಲೇ₹ 6,000 ಕೋಟಿ ವಿನಿಯೋಗಿಸಲಾಗಿದೆ. ಭೋಗ್ಯದ ಆಧಾರದಲ್ಲಿ ಈ ಕೇಂದ್ರಗಳನ್ನು ಬಳಸಿಕೊಳ್ಳಲು ಅವಕಾಶ ಮಾಡಿಕೊಡಲಾಗುತ್ತದೆ’ ಎಂದು ಕೇಂದ್ರ ಸಚಿವ ನಿತಿನ್ ಗಡ್ಕರಿ ಹೇಳಿದ್ದಾರೆ.
ಕೈಗಾರಿಕಾ ಸಲಕರಣೆಗಳು, ಬಿಡಿಭಾಗಗಳು ಮತ್ತು ಉತ್ಪನ್ನಗಳನ್ನು ಅಂತರ್‌ರಾಷ್ಟ್ರೀಯ ಗುಣಮಟ್ಟದಲ್ಲಿ ವಿನ್ಯಾಸ ಮಾಡಲು ಅಗತ್ಯವಾದ ಯಂತ್ರಗಳು ಮತ್ತು ತಂತ್ರಾಂಶಗಳನ್ನು ಈ ಕೇಂದ್ರಗಳು ಹೊಂದಿವೆ. 3ಡಿ ವಿನ್ಯಾಸ ಮತ್ತು 3ಡಿ ಮುದ್ರಣ ಸವಲತ್ತುಗಳೂ ಈ ಕೇಂದ್ರಗಳಲ್ಲಿ ಲಭ್ಯವಿವೆ. ಸಂಶೋಧನೆ ಮತ್ತು ಅಭಿವೃದ್ಧಿ (ಆರ್‌ ಅಂಡ್‌ ಡಿ) ಕಾರ್ಯಗಳಿಗೆ ಈ ಕೇಂದ್ರಗಳನ್ನು ಬಳಸಿಕೊಳ್ಳಬಹುದು.
