ನವದೆಹಲಿ:ದೇಶವನ್ನು ಸ್ವಾವಲಂಬಿಯಾಗಿಸುವಂತಹ ಸಾರ್ವಜನಿಕ ನೀತಿಗಳನ್ನು ಜಾರಿಗೆ ತರಲು ಪ್ರಯತ್ನಿಸುವಂತೆ ಉಪರಾಷ್ಟ್ರಪತಿ ಎಂ. ವೆಂಕಯ್ಯನಾಯ್ಡು ಅವರು ದೇಶದ ಸರ್ಕಾರಿ ನೌಕರರಿಗೆ ಕರೆ ನೀಡಿದರು.
‘ನಾಗರಿಕ ಸೇವಾ ದಿನ‘ದ ಅಂಗವಾಗಿ ಬುಧವಾರ ಸರಣಿ ಟ್ವೀಟ್ ಮಾಡಿರುವ ಅವರು, ಜನರ ನಿರೀಕ್ಷೆಗೆ ತಕ್ಕಂತೆ ಹಾಗೂ ಸಂವಿಧಾನ ಮೌಲ್ಯಗಳನ್ನು ಪ್ರತಿಬಿಂಬಿಸುವಂತೆ ಭಾರತದ ಆಡಳಿತದ ರಚನೆಯನ್ನು ಮರುರೂಪಿಸುವಂತೆ ಅಧಿಕಾರಿಗಳಿಗೆ ಕರೆ ನೀಡಿದ್ದಾರೆ.
‘ಇದು ದೇಶವನ್ನು ಪರಿವರ್ತಿಸುವ ಸಯಮವಾಗಿದೆ. ದೇಶವನ್ನು ಸ್ವಾವಲಂಬಿ(ಆತ್ಮನಿರ್ಭರ)ಯಾಗಿಸುವಂತಹ ಸಾರ್ವಜನಿಕ ನೀತಿಯನ್ನು ಜಾರಿಗೆ ತರಲು ನಿರಂತರವಾಗಿ ಪ್ರಯತ್ನಿಸಬೇಕು‘ ಎಂದು ಟ್ವೀಟ್ ಮಾಡಿದ್ದಾರೆ.
1947ರ ಇದೇ ದಿನ ಸರ್ದಾರ್ ವಲ್ಲಭಭಾಯ್ ಪಟೇಲ್ ಅವರು ನಾಗರಿಕ ಸೇವಾ ಅಧಿಕಾರಿಗಳನ್ನು 'ಭಾರತದ ಉಕ್ಕಿನ ಚೌಕಟ್ಟು' ಎಂದು ಬಣ್ಣಿಸಿದ್ದರು ಎಂದು ನಾಯ್ಡು ನೆನಪಿಸಿಕೊಂಡಿದ್ದಾರೆ.
