ಕಳೆದ ಕೆಲ ವಾರಗಳಿಂದ ಸ್ಪೈಸ್ ಜೆಟ್, ಇಂಡಿಗೋ ಮತ್ತು ಇದೀಗ ಗೋ ಫಸ್ಟ್ ವಿಮಾನಗಳಲ್ಲಿ ತಾಂತ್ರಿಕ ದೋಷದಂತಹ ಘಟನೆಗಳು ಕಂಡುಬರುತ್ತಿದೆ. ಕಳೆದ 30 ದಿನಗಳಿಗೂ ಕಡಿಮೆ ಅವಧಿಯಲ್ಲಿ ಸ್ಪೈಸ್ ಜೆಟ್ ಒಂದರಲ್ಲೇ 9 ಬಾರಿ ಸಮಸ್ಯೆ ತಲೆದೋರಿದೆ ಎಂದು ‘ಇಂಡಿಯಾ ಟುಡೆ’ವರದಿ ಮಾಡಿದೆ.
ಜುಲೈ 2ರಂದು ಜಬಲ್‌ಪುರಕ್ಕೆ ಹೊರಟಿದ್ದ ವಿಮಾನದ ಕ್ಯಾಬಿನ್‌ನಲ್ಲಿ ಹೊಗೆ ಕಂಡು ಬಂದ ಹಿನ್ನೆಲೆಯಲ್ಲಿ ದೆಹಲಿಗೆ ವಿಮಾನ ವಾಪಸ್ ಆಗಿತ್ತು. ಜೂನ್ 24 ಮತ್ತು 25ರಂದು ಎರಡು ಪ್ರತ್ಯೇಕ ವಿಮಾನಗಳಲ್ಲಿ ಟೇಕಾಫ್ ವೇಳೆ ಫ್ಯೂಸ್‌ಲೇಜ್‌ ಬಾಗಿಲಿನ ಎಚ್ಚರಿಕೆ ಲೈಟ್‌ಗಳು ಪದೇ ಪದೇ ಹೊತ್ತಿಕೊಂಡ ಹಿನ್ನೆಲೆಯಲ್ಲಿ ವಿಮಾನಗಳ ಹಾರಾಟವನ್ನೇ ರದ್ದು ಮಾಡಲಾಗಿತ್ತು.
