ಬುಧವಾರ, ಅಕ್ಟೋಬರ್ 20, 2021
23 °C
ರಾತ್ರಿ ನಡೆದ ಕಗ್ಗೊಲೆಗೆ ಬೆಚ್ಚಿಬಿದ್ದ ಮಧುರಖಂಡಿ ಗ್ರಾಮ

ಜಮಖಂಡಿ: ನಾಲ್ಕು ಜೀವ ತೆಗೆದ 21 ಗುಂಟೆ ಆಸ್ತಿ!

ಆರ್.ಎಸ್.ಹೊನಗೌಡ Updated:

ಅಕ್ಷರ ಗಾತ್ರ : | |

ಜಮಖಂಡಿ: ಕೇವಲ 21 ಗುಂಟೆ ಜಮೀನಿನ ವ್ಯಾಜ್ಯಕ್ಕೆ ನಾಲ್ಕು ಜೀವಗಳು ಬಲಿಯಾದ ತಾಲ್ಲೂಕಿನ ಮಧುರಖಂಡಿ ಗ್ರಾಮ ಅಕ್ಷರಶಃ ತತ್ತರಿಸಿದೆ.

ಮಳೆಯ ನೀರಿನೊಂದಿಗೆ ಶನಿವಾರ ರಾತ್ರಿ ಹರಿದ ರಕ್ತದ ಓಕುಳಿ ಇಡೀ ಗ್ರಾಮವನ್ನು ಆತಂಕದ ಛಾಯೆಗೆ ದೂಡಿದೆ. ಊರಿನಲ್ಲಿ ನೀರವ ಮೌನ ಆವರಿಸಿದೆ.

ಪಕ್ಕದ ಜಮೀನಿನ ಪುಟಾಣಿ ಮನೆತನದವರೊಂದಿಗೆ ಮಧುರಖಂಡಿಯ ಮುದರಡ್ಡಿ ಕುಟುಂಬದವರು ಹೊಂದಿದ್ದ ಆಸ್ತಿಯ ವ್ಯಾಜ್ಯ ಸಹೋದರರಾದ ಹಣಮಂತ ಮುದರಡ್ಡಿ (45), ಬಸವರಾಜ (37), ಈಶ್ವರ (35), ಮಲ್ಲಿಕಾರ್ಜುನ (33) ಅವರ ಕಗ್ಗೊಲೆಗೆ ಕಾರಣವಾಗಿತ್ತು. ನಾಲ್ವರನ್ನು ಮಾರಕಾಸ್ತ್ರಗಳಿಂದ ಕೊಚ್ಚಿ ಕೊಲೆ ಮಾಡಲಾಗಿತ್ತು.

ನ್ಯಾಯಾಲಯದಲ್ಲಿ ಪ್ರಕರಣ: ಕುಲಹಳ್ಳಿ ಗ್ರಾಮದ ಬಳಿಯ 21 ಗುಂಟೆ ಜಮೀನಿನ ಮಾಲೀಕತ್ವಕ್ಕೆ ಸಂಬಂಧಿ
ಸಿದಂತೆ ಎರಡೂ ಕುಟುಂಬಗಳ ಮಧ್ಯೆ ಮುಂಚಿನಿಂದಲೂ ಕಲಹವಿತ್ತು. 2014ರಲ್ಲಿ ರಾಜಿ ಪಂಚಾಯಿತಿ ನಡೆಸಿ ಗ್ರಾಮದ ಹಿರಿಯರು ಸಂಧಾನ ಮಾಡಿಸಿದ್ದರು. ನಂತರ ಪ್ರಕರಣ ನ್ಯಾಯಾಲಯದ ಮೆಟ್ಟಿಲೇರಿತ್ತು.

ಪುಟಾಣಿ ಮನೆತನದ ಸತ್ಯಪ್ಪ ಪುಟ್ಟಾಣಿ ಇವರಿಗೆ ಮೂರು ಮಕ್ಕಳು ಮಹಾದೇವ, ಪರಸಪ್ಪ, ನಾಗಪ್ಪ. ಅವರಿಗೆ ಮೂಲ ಆಸ್ತಿ ಏಳು ಎಕರೆ ಅದನ್ನು 3 ಎಕರೆ 20 ಗುಂಟೆಯಂತೆ ಎರಡು ಭಾಗವಾಗಿ ಮಾಡಿ, ಒಂದು ಭಾಗವನ್ನು ಮುದರಡ್ಡಿ ಮನೆತನದವರಿಗೆ ಮಾರಾಟ ಮಾಡಿದ್ದರು.

ಆದರೆ ಮಹಾದೇವನ ಮೊದಲ ಹೆಂಡತಿ ಹಾಗೂ ಮಕ್ಕಳು ನ್ಯಾಯಾಲಯದಲ್ಲಿ ಪ್ರಕರಣ ದಾಖಲಿಸಿದ್ದಾರೆ. ಹಿರಿಯರ ಸಮ್ಮುಖದಲ್ಲಿ ಪಂಚಾಯ್ತಿ ಮಾಡಿದಾಗ ಅವರ ಪಾಲಿಗೆ 21 ಗುಂಟೆ ಜಮೀನು ಬಂದಿತ್ತು. ಆದರೆ ಮುದರಡ್ಡಿ ಕುಟುಂಬದವರು ಬಿಡದಿದ್ದಾಗ ಜಗಳವಾಗುತ್ತದೆ. ಈ ವೇಳೆ ನಡೆದ ಘರ್ಷಣೆಯಲ್ಲಿ ನಾಲ್ವರನ್ನೂ ಮಾರಕಾಸ್ತ್ರಗಳಿಂದ ಕೊಚ್ಚಿ ಕೊಲೆ ಮಾಡಲಾಗಿದೆ ಎಂದು ತಿಳಿದುಬಂದಿದೆ.

ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ 12 ಜನರ ಮೇಲೆ  ಪ್ರಕರಣ ದಾಖಲಾಗಿದೆ.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು