ಗುರುವಿಲ್ಲದೇ ಒಲಿದ ಕಲೆ

ನೀರಲ್ಲಿ ನೇತಾರ
ಎಲ್ಲರೂ ನೆಲದ ಮೇಲೆ ರಂಗೋಲಿ ಚಿತ್ತಾರ ಮೂಡಿಸಿದರೆ ಬೆಳಗಾವಿ ಜಿಲ್ಲೆಯ ಬೈಲಹೊಂಗಲ ತಾಲ್ಲೂಕಿನ ಗಿರಿಯಾಲ (ಕೆ.ಬಿ) ಗ್ರಾಮದ ಸಿದ್ಧು ಇಟಗಿ ರಾಷ್ಟ್ರನಾಯಕರು ಹಾಗೂ ದೇವಾನುದೇವತೆಗಳನ್ನು ನೀರಿನ ಮೇಲೆ ಮೂಡಿಸುತ್ತಾರೆ. ನಿಸರ್ಗವೂ ಇವರ ಕೈಯಲ್ಲಿ ನೀರಿನಲ್ಲಿಯೇ ಕಂಗೊಳಿಸುತ್ತದೆ!

ಮರದ ಇದ್ದಿಲನ್ನು ಪುಡಿಯಾಗಿಸಿ ಅದನ್ನು ನೀರಿನ ಮೇಲೆ ಹರಡಿ ಅದರ ಮೇಲೆ ರಂಗೋಲಿ ಮೂಡಿಸಿದರೆ ನೋಡಿದವರು ನಿಬ್ಬೆರಗು. ರಂಗೋಲಿಯನ್ನು ನೀರಿನ ಮೇಲೆ ತೇಲಿಸುತ್ತಾ ಕಲಾಕೃತಿಗಳನ್ನು ರಚಿಸುತ್ತಾರೆ.

ಬಡ ರೈತ ಕುಟುಂಬದಲ್ಲಿ ಜನಿಸಿದ ಇವರು ಬಾಲ್ಯದಿಂದಲೇ ಕಲೆಯ ಬಗ್ಗೆ ತುಂಬಾ ಆಸಕ್ತಿಯುಳ್ಳವರು. ಅಕ್ಕಪಕ್ಕದವರ ಮನೆಯ ಬಿಳಿ ಸುಣ್ಣದ ಗೋಡೆಯ ಮೇಲೆ ಮರದ ಇದ್ದಿಲಿನಿಂದ ಚಿತ್ರಮೂಡಿಸಿ ಅವರಿಂದ ಬೈಸಿಕೊಂಡವರು. ಅಪ್ಪ ಕೊಡಿಸಿದ ಹೊಸ ಬಿಳಿ ಬಟ್ಟೆಯ ಮೇಲೆ ಸ್ಕೆಚ್ ಪೆನ್ನಿನಿಂದ ಚಿತ್ರಮೂಡಿಸಿ ಅವರಿಂದ ಏಟು ತಿಂದವರು. ಹೀಗೆ ಏನಾದರೊಂದು ಕೀಟಲೆಯಿಂದ ಕಲೆಯನ್ನು ಕರಗತ ಮಾಡಿಕೊಂಡು ಸಾಕಷ್ಟು ಜನರಿಗೆ ಪರಿಚಿತರಾಗಿದ್ದಾರೆ.

ಚಾಕ್‌ಪೀಸ್‌ನಲ್ಲಿ, ಮರದ ಅಂಟಿನಲ್ಲಿ, ಕಬ್ಬಿನ ಸಿಪ್ಪೆಯಲ್ಲಿ ಮತ್ತು ಬಿದಿರಿನಲ್ಲಿ ಹೀಗೆ ಕಸವಾಗಿ ಬಿಸಾಡಿದ ವಸ್ತುಗಳಿಂದ ಸಾಕಷ್ಟು ಕಲಾಕೃತಿಗಳನ್ನು ರಚಿಸಿದ್ದಾರೆ. ಅನಂತಪುರ ಗ್ರಾಮದ ಸರಕಾರಿ ಶಾಲೆಯಲ್ಲಿ ಶಿಕ್ಷಕರಾಗಿರುವ ಇವರು ಮಕ್ಕಳಿಗೂ ಈ ಕಲೆಯನ್ನು ಕರಗತ ಮಾಡಿಸುತ್ತಿದ್ದಾರೆ. ಸಾಹಿತ್ಯಾಸಕ್ತರಾದ ಇವರು ತಮ್ಮ ಚಿಕ್ಕಪ್ಪನ ಮಗ ತೀರಿಕೊಂಡಾಗ ಅವನ ನೆನಪಿಗಾಗಿ ‘ಅರಳುವ ಮುನ್ನ ಬಾಡಿದ ಹೂ’ ಎಂಬ ಕವನ ಸಂಕಲನವನ್ನು ರಚಿಸಿದ್ದಾರೆ.

ಇವರು ಜಲಯೋಗ ಪರಿಣಿತರು ಕೂಡ. ಸ್ನೇಹಿತ ಮಲ್ಲಿಕಾರ್ಜುನ ಅಣ್ಣಪ್ಪಾ ಗೋಡಕಾರ ಅವರ ಜೊತೆಗೂಡಿ ನೀರಿನಲ್ಲಿ ಗಂಟೆಗಟ್ಟಲೆ ತೇಲುತ್ತಾ ಯೋಗಾಸನ ಮಾಡುವಲ್ಲಿಯೂ ಸಿದ್ಧಹಸ್ತರು. ನೀರಿನ ಮೇಲೆ ತೇಲುತ್ತಾ ಪದ್ಮಾಸನ, ಮರ್ಕಟಾಸನ, ಅಂಗುಷ್ಠಾಸನ ಮುಂತಾದ ಯೋಗಾಸನಗಳನ್ನು ಮಾಡಿದರೆ ನೋಡುಗರು ನಿಬ್ಬೆರಗು. ಆಸಕ್ತರಿಗೆ ಉಚಿತವಾಗಿ ಜಲಯೋಗ ತರಬೇತಿಯನ್ನು ನೀಡುತ್ತಿದ್ದಾರೆ.

ಈಜುಕೊಳ ಇಲ್ಲದಿರುವುದರಿಂದ ತಮ್ಮ ಗದ್ದೆಯಲ್ಲಿರುವ ಕೃಷಿ ಹೊಂಡದಲ್ಲೇ ಜಲಯೋಗಾಭ್ಯಾಸವನ್ನು ಮಾಡುತ್ತಿದ್ದಾರೆ. ನೆಲದ ಮೇಲೆ  5 ಗಂಟೆಗಳಲ 45 ಅಡಿ ವಿಸ್ತಾರದ ಸುಭಾಸ್ ಚಂದ್ರ ಬೋಸ್ ರವರ ರಂಗೋಲಿ ಬಿಡಿಸಿರುವ ಇವರು ಇದನ್ನೇ ಇನ್ನೂ ದೊಡ್ಡ ಆಕಾರದಲ್ಲಿ ನೀರಿನಲ್ಲಿ ಬಿಡಿಸುವ ತವಕದಲ್ಲಿದ್ದು, ಆಯೋಜಕರಿಗಾಗಿ ಕಾಯುತ್ತಿದ್ದಾರೆ.
ಸಂಪರ್ಕಕ್ಕೆ 9538424311.