‘ರಾಜಕಾಲುವೆಗೆ ಇನ್ನೆಷ್ಟು ಬಲಿ ಬೇಕು’

ಗುರುವಾರ , ಜೂನ್ 20, 2019
26 °C
‘ಹೂಳು ತೆಗೆದಿದ್ದರೆ ಆರು ಜೀವಗಳು ಉಳಿಯುತ್ತಿದ್ದವು’

‘ರಾಜಕಾಲುವೆಗೆ ಇನ್ನೆಷ್ಟು ಬಲಿ ಬೇಕು’

Published:
Updated:
‘ರಾಜಕಾಲುವೆಗೆ ಇನ್ನೆಷ್ಟು ಬಲಿ ಬೇಕು’

ಬೆಂಗಳೂರು: ‘ಕುರುಬರಹಳ್ಳಿ ಭಾಗದಲ್ಲಿ ಹಾದುಹೋಗಿರುವ ರಾಜಕಾಲುವೆಯಲ್ಲಿ ಹೂಳು ತೆಗೆದಿದ್ದರೆ ಆರು ಜೀವಗಳು ಉಳಿಯುತ್ತಿದ್ದವು.’

ಸ್ಥಳೀಯ ನಿವಾಸಿಗಳ ಅಭಿಪ್ರಾಯವಿದು. ಶುಕ್ರವಾರ ರಾತ್ರಿ ಸುರಿದ ಭಾರಿ ಮಳೆಯಿಂದಾಗಿ ಈ ಕಾಲುವೆಯಲ್ಲಿ ನೀರಿನ ಹರಿವು ಹೆಚ್ಚಾಗಿತ್ತು. ಕಾಲುವೆಗಿಂತ 4–5 ಅಡಿ ಎತ್ತರಕ್ಕೆ ನೀರು ಹರಿದಿತ್ತು. ಇದರಿಂದ ಕಾಲುವೆ ಆಸುಪಾಸಿನ ಮನೆಗಳು ಜಲಾವೃತಗೊಂಡಿದ್ದವು. ಈ ವೇಳೆ ಮೂವರು ಕೊಚ್ಚಿ ಹೋಗಿದ್ದರು. ಕಾಲುವೆ ಪಕ್ಕದಲ್ಲಿರುವ ಮನೆ ಗೋಡೆ ಕುಸಿದು ದಂಪತಿ ಮೃತಪಟ್ಟಿದ್ದರು. ಮೇ ತಿಂಗಳಲ್ಲಿ ಶಾಂತಕುಮಾರ್‌ ಎಂಬುವರು ಸಹ ಕೊಚ್ಚಿ ಹೋಗಿದ್ದರು.

ಯಶವಂತಪುರದ ಕಡೆಯಿಂದ ಬರುವ ಈ ಕಾಲುವೆಯು ಕುರುಬರಹಳ್ಳಿ, ಲಗ್ಗೆರೆ ಮಾರ್ಗವಾಗಿ ಬಸವೇಶ್ವರನಗರ, ವೃಷಭಾವತಿ ನಗರ ಮೂಲಕ ಜ್ಞಾನಭಾರತಿ ಕ್ಯಾಂಪಸ್‌ ಬಳಿ ವೃಷಭಾವತಿ ಕಾಲುವೆಗೆ ಸೇರುತ್ತದೆ.

‘ಮಳೆಗಾಲಕ್ಕೂ ಮುನ್ನವೇ ಕಾಲುವೆಯಲ್ಲಿ ಹೂಳು ತೆಗೆದಿದ್ದರೆ ಈ ಅನಾಹುತ ಸಂಭವಿಸುತ್ತಿರಲಿಲ್ಲ. ಬಿಬಿಎಂಪಿ ಅಧಿಕಾರಿಗಳ ನಿರ್ಲಕ್ಷ್ಯವೇ ಈ ಅವಘಡಗಳಿಗೆ ಕಾರಣ’ ಎಂದು ಸ್ಥಳೀಯರು ಆರೋಪಿಸಿದ್ದಾರೆ.

‘ಈ ಕಾಲುವೆ ಸುಮಾರು 20 ಅಡಿ ಆಳವಿದೆ. ಆದರೆ, 8–10 ಅಡಿಗಳಷ್ಟು ಹೂಳು ತುಂಬಿಕೊಂಡಿದೆ. ಇದರಿಂದ ಕಾಲುವೆಗಿಂತ ಎತ್ತರದಲ್ಲಿ ನೀರು ಹರಿದಿತ್ತು. ನಮ್ಮ ಮನೆಗಳು ಸಂಪೂರ್ಣವಾಗಿ ಜಲಾವೃತಗೊಂಡಿದ್ದವು. ಈ ಹೂಳು ತೆಗೆದಿದ್ದರೆ ಎಷ್ಟೇ ನೀರು ಬಂದಿದ್ದರೂ ಕಾಲುವೆಯಲ್ಲೇ ಹರಿದು ಹೋಗುತ್ತಿತ್ತು. ಇದರಿಂದ ಅಮಾಯಕ ಜೀವಗಳು ಉಳಿಯುತ್ತಿ ದ್ದವು’ ಎಂದು ಕುರುಬರಹಳ್ಳಿಯ 23ನೇ ಮುಖ್ಯರಸ್ತೆಯ ನಿವಾಸಿ ಮಂಜುನಾಥ್‌ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ನಾವು 30 ವರ್ಷಗಳಿಂದ ಇಲ್ಲಿ ವಾಸವಾಗಿದ್ದೇವೆ. ಇಲ್ಲಿ ಕಾಂಕ್ರೀಟ್‌ ತಡೆಗೋಡೆ ನಿರ್ಮಿಸುವ ಮುನ್ನ ಇಂತಹ ಪ್ರವಾಹ ಉಂಟಾಗಿತ್ತು. ಬಳಿಕ ಯಾವುದೇ ಅನಾಹುತ ನಡೆದಿರಲಿಲ್ಲ. ಶುಕ್ರವಾರ ಬಿದ್ದ ಮಳೆಯಿಂದ ನಮ್ಮ ಮನೆಯಲ್ಲಿ 8 ಅಡಿ ನೀರು ನಿಂತಿತ್ತು. ಮನೆಯಲ್ಲಿದ್ದ ಎಲ್ಲ ಗೃಹೋಪಯೋಗಿ ವಸ್ತುಗಳಿಗೆ ಹಾನಿ ಆಗಿದೆ. ದಿನಸಿ ವಸ್ತುಗಳು ಹಾಳಾಗಿದ್ದು, ತಿಂಡಿ–ಊಟಕ್ಕೆ ಪಡಿಪಾಟಲು ಅನುಭವಿಸುವಂತಾಗಿದೆ’ ಎಂದು ಪುಟ್ಟಣ್ಣ ಅಳಲುತೋಡಿಕೊಂಡರು.

ಮಳೆಯ ನೆಪ ಹೇಳುವ ಅಧಿಕಾರಿಗಳು: ಮಳೆಗಾಲ ಶುರುವಾಗುವ ಮುನ್ನವೇ ನಗರದಲ್ಲಿರುವ ಎಲ್ಲ ರಾಜಕಾಲುವೆಗಳ ಹೂಳನ್ನು ತೆರವುಗೊಳಿಸಬೇಕು. ಆದರೆ, ಬಹುತೇಕ ಕಾಲುವೆಗಳಲ್ಲಿ ಹೂಳು ತೆರವುಗೊಳಿಸಿಲ್ಲ.

‘ನಾನು ಈ ವಿಭಾಗಕ್ಕೆ ಬಂದು ಎರಡು ತಿಂಗಳಾಯಿತು. ಆಗಸ್ಟ್‌ 14ರಿಂದಲೂ ನಗರದಲ್ಲಿ ನಿರಂತರವಾಗಿ ಮಳೆ ಬೀಳುತ್ತಿದೆ. ಇದರಿಂದ ಕಾಲುವೆಗಳಲ್ಲಿ ಹೂಳು ತೆಗೆಯಲು ಸಾಧ್ಯವಾಗಿಲ್ಲ. ಪ್ರವಾಹದ ಪರಿಸ್ಥಿತಿ ಉಂಟಾಗಿರುವ ಕಡೆಗಳಲ್ಲಿ ಹೂಳು ತೆರವು ಕಾರ್ಯಾಚರಣೆ ನಡೆಸುತ್ತಿದ್ದೇವೆ’ ಎಂದು ಬಿಬಿಎಂಪಿ ಮುಖ್ಯ ಎಂಜಿನಿಯರ್‌ (ರಾಜಕಾಲುವೆ ವಿಭಾಗ) ಬೆಟ್ಟೇಗೌಡ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಮಳೆ ಬರುವಾಗ ಹೂಳು ತೆಗೆಯಬಹುದು. ಆದರೆ, ಮತ್ತೆ ಹೂಳು ತುಂಬಿಕೊಳ್ಳುತ್ತದೆ. ಹೀಗಾಗಿ, ಪ್ರವಾಹ ಉಂಟಾಗುತ್ತಿರುವ ಪ್ರದೇಶಗಳಿಗೆ ಒತ್ತು ನೀಡಿದ್ದೇವೆ. ಎಚ್‌ಎಸ್‌ಆರ್‌ ಬಡಾವಣೆ, ಕೋರಮಂಗಲ 4ನೇ ಬ್ಲಾಕ್‌, ಶಾಂತಿನಗರ ಬಿಎಂಟಿಸಿ ಡಿಪೊ, ಡಾಲರ್ಸ್‌ ಕಾಲನಿ, ಕುಂಬಾರಗುಂಡಿ ಭಾಗದಲ್ಲಿ ಹೂಳು ತೆಗೆಯುತ್ತಿದ್ದೇವೆ ಎಂದು ವಿವರಿಸಿದರು.

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry