ವಿಜಯಪುರ: ತಾಲ್ಲೂಕಿನ ಉತ್ನಾಳ ಗ್ರಾಮದ ಮನೆಯೊಂದರಲ್ಲಿ ಶನಿವಾರ ಫ್ರಿಜ್ ಸ್ಫೋಟಗೊಂಡು, ಬಾಲಕರಿಬ್ಬರು ಮೃತಪಟ್ಟಿದ್ದಾರೆ. ಸಂಜೀವ ಈರಪ್ಪ ಹೂಗಾರ (12), ಪ್ರಮೋದ ಪ್ರಕಾಶ ಹೂಗಾರ (5) ಮೃತಪಟ್ಟವರು.
ಸ್ಫೋಟದ ರಭಸಕ್ಕೆ ಸಂಜೀವ ದೇಹ ಛಿದ್ರಗೊಂಡಿದೆ. ಗಂಭೀರವಾಗಿ ಗಾಯಗೊಂಡಿದ್ದ ಪ್ರಮೋದನ್ನು ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆತ ಚಿಕಿತ್ಸೆಗೆ ಸ್ಪಂದಿಸದೆ ಮೃತಪಟ್ಟಿದ್ದಾನೆ.
ಇವರಿಬ್ಬರೂ ಸಹೋದರರ ಮಕ್ಕಳು. ಹೂಗಾರ ಕುಟುಂಬ ಗ್ರಾಮದಲ್ಲಿ ಕಿರಾಣಿ ಅಂಗಡಿ ನಡೆಸುತ್ತಿತ್ತು. ತಂಪು ಪಾನೀಯ ಮಾರಾಟಕ್ಕಾಗಿ ಕೋಕೊ ಕೋಲಾ ಕಂಪೆನಿ ಫ್ರಿಜ್ ನೀಡಿತ್ತು. ಅಂಗಡಿ ಮುಚ್ಚಿಹೋದ ಬಳಿಕ ಫ್ರಿಜ್ ಅನ್ನು ಮನೆಯಲ್ಲಿ ತಂದಿಟ್ಟುಕೊಂಡಿದ್ದರು. ಶನಿವಾರ ಈ ಬಾಲಕರಿಬ್ಬರೂ ಅದರ ಬಳಿ ಇದ್ದ ವೇಳೆ ಅದು ಸಿಡಿದಿದೆ. ಸ್ಫೋಟಕ್ಕೆ ನಿಖರ ಕಾರಣ ತಿಳಿದು ಬಂದಿಲ್ಲ ಎಂದು ವಿಜಯಪುರ ಡಿವೈಎಸ್ಪಿ ಡಿ.ಅಶೋಕ್ ‘ಪ್ರಜಾವಾಣಿ’ಗೆ ತಿಳಿಸಿದರು.