7

ಈ ಸಲ ‘ಸಖಿ ಪಿಂಕ್‌ ಬೂತ್‌'

Published:
Updated:
ಈ ಸಲ ‘ಸಖಿ ಪಿಂಕ್‌ ಬೂತ್‌'

‘ಸಖಿ’ ಎಂದರೆ ಗೆಳತಿ, ಸ್ನೇಹಿತೆ ಅಥವಾ ಅದಕ್ಕೂ ಮೀರಿದವರು. ಆತ್ಮೀಯತೆ ಮತ್ತು ಗೌರವದ ಭಾವನೆ ಮೂಡಿಸುವ ಪದ ಕೂಡ ಇದು. ಈ ಪದವನ್ನು ಚುನಾವಣಾ ಆಯೋಗ ಈ ಬಾರಿ ಸಮರ್ಪಕವಾಗಿ ಬಳಸಿಕೊಳ್ಳುತ್ತಿದೆ. ರಾಜ್ಯ ವಿಧಾನಸಭೆಗೆ ಶನಿವಾರ (ಮೇ 12ರಂದು) ನಡೆಯುವ ಸಾರ್ವತ್ರಿಕ ಚುನಾವಣೆಯಲ್ಲಿ ‘ಸಖಿ’ಯದ್ದೂ ಪ್ರಮುಖ ಪಾತ್ರ.

ರಾಜಧಾನಿ ಬೆಂಗಳೂರು ಸೇರಿದಂತೆ ರಾಜ್ಯದ ವಿವಿಧೆಡೆ ಈ ಹೆಸರಿನ ಮತಗಟ್ಟೆಗಳನ್ನು ಆಯೋಗ ತೆರೆದಿದೆ. ಬೆಂಗಳೂರಿನಲ್ಲಿ 100 ಹಾಗೂ ಇಡೀ ರಾಜ್ಯದಲ್ಲಿ 600 ಮತಗಟ್ಟೆಗಳಿಗೆ ‘ಸಖಿ’ ಹೆಸರಿಡಲಾಗಿದೆ. ಇದು ಈ ಚುನಾವಣೆಯ ಆಕರ್ಷಣೆಗಳಲ್ಲಿ ಒಂದು.

ಈ ನೂತನ ಮತಗಟ್ಟೆಗಳು ‘ಪಿಂಕ್‌’ (ಗುಲಾಬಿ) ಬಣ್ಣದಿಂದ ಕೂಡಿರುತ್ತವೆ. ಮಹಿಳಾ ಮತದಾರರು ಹೆಚ್ಚಿರುವ ಕಡೆಗಳಲ್ಲಿ ಆಯೋಗ ‘ಸಖಿ ಪಿಂಕ್‌ ಬೂತ್‌’ಗಳನ್ನು ಸ್ಥಾಪಿಸಿದೆ. ಇಲ್ಲಿ ಮಹಿಳೆಯರಿಗೆ ಇಷ್ಟವಾಗುವ ‘ಪಿಂಕ್‌’ ಬಣ್ಣದ್ದೇ ಕಾರುಬಾರು. ಮತಗಟ್ಟೆಯ ಗೋಡೆಗಳು, ಮತಗಟ್ಟೆ ಅಧಿಕಾರಿಗಳ ಟೇಬಲ್‌ ಕ್ಲಾತ್‌ ಸೇರಿದಂತೆ ವಿದ್ಯುನ್ಮಾನ ಮತಯಂತ್ರ (ಇವಿಎಂ) ಇಡುವ ಟೇಬಲ್‌ ಕೂಡ ಪಿಂಕ್‌ ಬಣ್ಣದ ಬಟ್ಟೆಯಿಂದ ಆವೃತವಾಗಿರುತ್ತದೆ.

ಮಹಿಳಾ ಮತದಾರರನ್ನು ಮತಗಟ್ಟೆಗೆ ಆಕರ್ಷಿಸಲು ಆಯೋಗ ಈ ರೀತಿಯ ವಿಶಿಷ್ಟ ಪ್ರಯತ್ನಕ್ಕೆ ಕೈಹಾಕಿದೆ. ಈ ಕೇಂದ್ರಗಳಲ್ಲಿ ಪ್ರಿಸೈಡಿಂಗ್‌ ಆಫೀಸರ್‌ (ಪಿಆರ್‌ಒ), ಅಸಿಸ್ಟೆಂಟ್‌ ಪ್ರಿಸೈಡಿಂಗ್‌ ಆಫೀಸರ್‌ (ಎಪಿಆರ್‌ಒ), ಪೋಲಿಂಗ್‌ ಆಫೀಸರ್‌ (ಪಿಒ) ಸೇರಿದಂತೆ ಎಲ್ಲ ಮತಗಟ್ಟೆ ಅಧಿಕಾರಿಗಳು ಮಹಿಳೆಯರಾಗಿರುತ್ತಾರೆ. ಅಲ್ಲದೆ ಇಲ್ಲಿನ ಭದ್ರತಾ ಸಿಬ್ಬಂದಿ ಕೂಡ ಮಹಿಳೆ. ಮತಗಟ್ಟೆ ಅಧಿಕಾರಿಗಳೆಲ್ಲ ‘ಪಿಂಕ್‌’ ಬಣ್ಣದ ಸೀರೆಯಲ್ಲಿಯೇ ಕಂಗೊಳಿಸುತ್ತಾರೆ. ಇಲ್ಲಿ ಮಹಿಳೆಯರ ಜತೆಗೆ ಪುರುಷರೂ ಮತಚಲಾಯಿಸಲು ಅವಕಾಶ ಇರುತ್ತದೆ. ಮತಗಟ್ಟೆಯ ಸಂಪೂರ್ಣ ನಿರ್ವಹಣೆ ಮಹಿಳಾ ಸಿಬ್ಬಂದಿಯಿಂದಲೇ ನಡೆಯುತ್ತದೆ.

ಮತಗಟ್ಟೆ ಪ್ರವೇಶ ದ್ವಾರದಲ್ಲಿ ಪಿಂಕ್‌ ಬಣ್ಣದ ಬಲೂನುಗಳು ಮತದಾರರನ್ನು ಸ್ವಾಗತಿಸಲಿವೆ. ಕೆಲವೆಡೆ ಮಹಿಳಾ ಮತದಾರರೊಂದಿಗೆ ಬರುವ ಮಕ್ಕಳಿಗೆ ಆಟವಾಡಲು ಆಟಿಕೆಗಳನ್ನು ಒಳಗೊಂಡ ಪ್ರತ್ಯೇಕ ಕೋಣೆಯನ್ನೂ ಮೀಸಲಿಡಲಾಗಿದೆ. ಮತಗಟ್ಟೆಗೆ ಬರುವ ಗರ್ಭಿಣಿಯರಿಗೆ, ಹಸುಗೂಸಿನ ಜತೆ ಬರುವ ಮತದಾರರಿಗೆ ವಿಶ್ರಾಂತಿ ಕೊಠಡಿ ವ್ಯವಸ್ಥೆಯನ್ನೂ ಮಾಡಲಾಗಿದೆ. ಪಿಂಕ್‌ ಮತಗಟ್ಟೆಯ ಹೊರಗಿನ ಪಿಂಕ್‌ ಬಣ್ಣದ ಬ್ಯಾನರ್‌, ಪೋಸ್ಟರ್‌ಗಳ ಜತೆಗೆ ಸೆಲ್ಫಿ ತೆಗೆದುಕೊಳ್ಳಲು ಅವಕಾಶ ಕಲ್ಪಿಸಲಾಗುತ್ತದೆ ಎಂದು ಬೃಹತ್‌ ಬೆಂಗಳೂರು ಮಹಾನಗರ ಪಾಲಿಕೆಯ (ಬಿಬಿಎಂಪಿ) ಹಿರಿಯ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.

ಮತದಾನದಿಂದ ಯಾರೂ ವಂಚಿತರಾಗಬಾರದು. ಭಯ, ಒತ್ತಡವಿಲ್ಲದೆ ಮಹಿಳೆಯರು ಮುಕ್ತವಾಗಿ ಮತಚಲಾಯಿಸುವಂತೆ ಆಗಬೇಕು ಎಂಬ ಆಶಯದೊಂದಿಗೆ ಚುನಾವಣಾ ಆಯೋಗ ಈ ವಿನೂತನ ಪ್ರಯೋಗ ಕೈಗೊಂಡಿದೆ. ಈ ಹಿಂದೆ ಗೋವಾ ವಿಧಾನಸಭಾ ಚುನಾವಣೆಯಲ್ಲಿ ಕೆಲವೆಡೆ ಪಿಂಕ್‌ ಮತಗಟ್ಟೆಗಳನ್ನು ತೆರೆದಿದ್ದ ಆಯೋಗ, ಕರ್ನಾಟಕ ಚುನಾವಣೆಯಲ್ಲಿ ಅದನ್ನು ವ್ಯಾಪಕವಾಗಿ ಅನುಷ್ಠಾನಗೊಳಿಸುತ್ತಿದೆ ಎಂದು ಅವರು ಮಾಹಿತಿ ನೀಡಿದ್ದಾರೆ.

ಬೆಂಗಳೂರು ನಗರ ಜಿಲ್ಲೆ ವ್ಯಾಪ್ತಿಯಲ್ಲಿ 28 ವಿಧಾನಸಭಾ ಕ್ಷೇತ್ರಗಳಿದ್ದು, ಬೆಂಗಳೂರು ನಗರ, ಕೇಂದ್ರ, ಉತ್ತರ, ದಕ್ಷಿಣ ಭಾಗದಲ್ಲಿ ತಲಾ 25ರಂತೆ ಒಟ್ಟು 100 ಸಖಿ ಪಿಂಕ್‌ ಮತಗಟ್ಟೆಗಳನ್ನು ತೆರೆದಿದ್ದು, ಮತದಾರರನ್ನು ಕೈಬೀಸಿ ಕರೆಯುತ್ತಿವೆ. 

ಮಹಿಳೆಯರಿಗೆ ಪಿಂಕ್‌ ಎಂದರೆ ತುಂಬ ಇಷ್ಟ. ಪಿಂಕ್‌ ಮತಗಟ್ಟೆಗೆ ಬಂದು ವೋಟ್‌ ಮಾಡಲು ತುಂಬ ಖುಷಿಯಾಗುತ್ತದೆ. ಇದೊಂದು ವಿಶಿಷ್ಟ ಅನುಭವ ಕೂಡ. ಎಲ್ಲ ಮಹಿಳಾ ಸಿಬ್ಬಂದಿಯೇ ಇರುವುದರಿಂದ ಆತಂಕ, ಒತ್ತಡವಿಲ್ಲದೇ ಮತ ಚಲಾಯಿಸಬಹುದು 

– ಅಂಬಿಕಾ ಜಿ.ಪಿ, ಶಿಕ್ಷಕಿ, ವಿದ್ಯಾ ಸಾಯಿ ಪಬ್ಲಿಕ್‌ ಸ್ಕೂಲ್‌, ಬೆಂಗಳೂರು

**



ಮಹಿಳೆಯರಿಗೆ ಪಿಂಕ್ ಬೂತ್ ವ್ಯವಸ್ಥೆ ಮಾಡಿರುವುದು ಬಹಳ ಒಳ್ಳೆಯದು. ಆದರೆ ಹಳ್ಳಿಗಳ ಎಲ್ಲಾ ಬೂತ್‌ಗಳಲ್ಲಿ ಮಗುವಿಗೆ ಹಾಲುಣಿಸುವ ಪುಟ್ಟ ಕೊಠಡಿ, ಶುಚಿಯಾದ ಶೌಚಾಲಯ, ಸ್ಯಾನಿಟರಿ ಪ್ಯಾಡ್, ಮಹಿಳೆಯರಿಗೆ ಪ್ರತ್ಯೇಕ ಸರತಿ ಸಾಲು ವ್ಯವಸ್ಥೆ ಇರಬೇಕು. ಪಿಂಕ್ ಬೂತ್ ಅವಶ್ಯಕತೆಯೇ ಇಲ್ಲದ ರೀತಿಯಲ್ಲಿ ಪ್ರತೀ ಬೂತ್‌ಗಳೂ ಮಹಿಳಾಸ್ನೇಹಿ ಆಗಿರುವಂತೆ ಚುನಾವಣಾ ಆಯೋಗ ನೋಡಿಕೊಳ್ಳಬೇಕು

– ಕಾವ್ಯ ಅಚ್ಯುತ್‌, ರಂಗ ಕಲಾವಿದೆ

 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry