‘ಗಾಜಾ ಜನರು ಸತ್ಯವನ್ನು ತಿರುಚುವ ಹೊಸ ಮಾದರಿಯೊಂದನ್ನು ಕಂಡುಕೊಂಡಿದ್ದಾರೆ. ಸುಳ್ಳು ಗಾಯಗಳನ್ನು ಮಾಡಿಕೊಂಡು, ಅದರಿಂದ ರಕ್ತ ಬರುವಂತೆ ತೋರಿಸುತ್ತಿದ್ದಾರೆ. ತಾವು ಎಷ್ಟು ಮುಗ್ಧರು, ಬಲಿಪಶುಗಳು ಹಾಗೂ ಇಸ್ರೇಲ್ ಎಷ್ಟು ಕ್ರೂರ ಎಂದು ಜಗತ್ತಿನ ಎದುರಿಗೆ ತೋರಿಸಲು ಗಾಜಾ ಜನರು ಈ ರೀತಿ ಮಾಡುತ್ತಿದ್ದಾರೆ’ ಎಂದು ಆರೋಪಿಸಿರುವ ವಿಡಿಯೊವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ‘ಇಸ್ಲಾಂನ ಬಲಿಪಶುಗಳ ವಿಶ್ವವಿದ್ಯಾಲಯಕ್ಕೆ ಸ್ವಾಗತ’ ಎಂದು ಈ ವಿಡಿಯೊದೊಂದಿಗೆ ಕೆಲವರು ಪೋಸ್ಟ್‌ಗಳನ್ನು ಹಾಕುತ್ತಿದ್ದಾರೆ. ಮಕ್ಕಳಿಂದ ಹಿಡಿದು ಮಧ್ಯ ವಯಸ್ಸಿನ ಜನರ ಮುಖ, ಮೈ ಮೇಲೆ ಕೆಂಪು ಬಣ್ಣ ಬಳಿಯುತ್ತಿರುವ, ಗಾಯಗಳಾಗಿರುವ, ಕಾಲು ಕತ್ತರಿಸಿ ಹೋಗಿರುವಂತೆ ತೋರಿಸುತ್ತಿರುವ ದೃಶ್ಯಗಳು ಈ ವಿಡಿಯೊದಲ್ಲಿ ಇವೆ. ಆದರೆ, ಇದು ಸುಳ್ಳು ಸುದ್ದಿ.
