ಹಿಂದೂ ವ್ಯಕ್ತಿಯ ಅಂತ್ಯಸಂಸ್ಕಾರ ನೆರೆವೇರಿಸಿದ ಮುಸ್ಲಿಂ ಕುಟುಂಬ

ಇರ್ಫಾನ್‌ ಮೊಹಮ್ಮದ್ ಖಾನ್‌ ಹಾಗೂ ಫರೀದ್ ಖಾನ್‌ ಮಾಲೀಕತ್ವದ ಸಂಸ್ಥೆಯಲ್ಲಿ ಮೊರಾರಿ ಲಾಲ್‌ ಶ್ರೀವಾಸ್ತವ್‌(65) ಕಾರ್ಯನಿರ್ವಹಿಸುತ್ತಿದ್ದರು. ಜೂನ್‌ 13ರಂದು ವಿಷಜಂತು ಕಡಿದ ಪರಿಣಾಮವಾಗಿ ಶ್ರೀವಾಸ್ತವ್‌ ಮೃತಪಟ್ಟಿದ್ದರು. ಮೃತರಿಗೆ ಹತ್ತಿರದ ಕುಟುಂಬಸ್ಥರು ಯಾರೂ ಇರದ ಕಾರಣ ಮೃತದೇಹವನ್ನು ಖಾನ್‌ ಕುಟುಂಬಕ್ಕೆ ಪೊಲೀಸರುಹಸ್ತಾಂತರಿಸಿದ್ದರು. ಖಾನ್ ಕುಟುಂಬ ಹಿಂದೂ ಸಂಪ್ರದಾಯದಂತೆ ಅಂತ್ಯಸಂಸ್ಕಾರ ನೆರವೇರಿಸಿತ್ತು.

ಈ ಕುರಿತು ಮಾತನಾಡಿದ ಇರ್ಫಾನ್‌ ಖಾನ್‌, ‘ಶ್ರೀವಾಸ್ತವ್‌ ನಮ್ಮ ಜತೆ ಕಳೆದ 15 ವರ್ಷದಿಂದ ಕಾರ್ಯನಿರ್ವಹಿಸುತ್ತಿದ್ದರು. ನಮ್ಮ ಕುಟುಂಬದ ಸದಸ್ಯರಾಗಿಯೇ ಅವರು ಜತೆಗಿದ್ದರು. ಅಪರಕರ್ಮಕ್ಕೆ ನೆರೆಹೊರೆಯವರನ್ನು ಕರೆಯಲು ತೆರಳಿದ ಸಂದರ್ಭದಲ್ಲಿ ಎಲ್ಲರೂ ಆಶ್ಚರ್ಯ ವ್ಯಕ್ತಪಡಿಸಿದರು. ಅಂದಾಜು 1 ಸಾವಿರ ಹಿಂದೂ, ಮುಸ್ಲಿಂ ಜನರು ಇದರಲ್ಲಿ ಭಾಗವಹಿಸಿದ್ದರು’ ಎಂದು ತಿಳಿಸಿದರು.