ನವದೆಹಲಿ: ಪ್ರಧಾನಮಂತ್ರಿಗಳ ಕಾರ್ಯಾಲಯ (ಪಿಎಂಒ) ‘ವೇಗವರ್ಧಕ ಏಜೆಂಟ್’ ಆಗಿ ವ್ಯವಸ್ಥೆಗೆ ಶಕ್ತಿ ನೀಡುತ್ತಿದೆ. 10 ವರ್ಷದ ಹಿಂದೆ ಇದು ಅಧಿಕಾರದ ಕೇಂದ್ರವಾಗಿತ್ತು ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದಾರೆ.
ಪಿಎಂಒ ಕಚೇರಿಯ ಸಿಬ್ಬಂದಿ ಉದ್ದೇಶಿಸಿ ಸೋಮವಾರ ಮಾತನಾಡಿದ ಅವರು, ನನ್ನ ಏಕೈಕ ಆದ್ಯತೆ, ಗುರಿ ರಾಷ್ಟ್ರಮೊದಲು ಎಂಬುದೇ ಆಗಿದೆ. ಸಿಬ್ಬಂದಿಯಿಂದಲೂ ನಾನು ಅದನ್ನೇ ನಿರೀಕ್ಷಿಸುತ್ತೇನೆ ಎಂದು ಹೇಳಿದರು.
‘ನನ್ನ ಪ್ರತಿ ಕ್ಷಣವೂ ದೇಶಕ್ಕಾಗಿಯೇ ಇದೆ. ಈ ಗುರಿ ಸಾಧನೆಗೆ ಹಾಗೂ ದೇಶವನ್ನು 2047ರ ವೇಳೆಗೆ ಅಭಿವೃದ್ಧಿ ಹೊಂದಿದ ರಾಷ್ಟ್ರವಾಗಿಸಲು ದಿನದ 24 ಗಂಟೆ ಕೆಲಸ ಮಾಡುವ ಭರವಸೆಯನ್ನು ನಾನು ನೀಡುತ್ತೇನೆ ಎಂದರು.
