Chandrayaan-3 | ಆ.23ರ ಸಂಜೆ ‘ಸಾಫ್ಟ್‌ ಲ್ಯಾಂಡಿಂಗ್’

ಆಂಧ್ರಪ್ರದೇಶ ಮಾತ್ರವಲ್ಲ ಇತರ ರಾಜ್ಯಗಳಿಂದ ಬಂದಿದ್ದವರಲ್ಲಿ ಕುತೂಹಲ.. ಕ್ಷಣಗಳು ಉರುಳಿದಂತೆ ಆ ಕುತೂಹಲ ಹೆಚ್ಚುತ್ತಿತ್ತು. ಕೊನೆಗೆ ಆ ಘಳಿಗೆ ಬಂದೇ ಬಿಟ್ಟಿತು... ‘ಚಂದ್ರಯಾನ–3’ ನೌಕೆ ಉಡಾವಣಾ ನೆಲೆಯಿಂದ ಚಿಮ್ಮಿ ಆಕಾಶದತ್ತ ಮುನ್ನುಗ್ಗುತ್ತಿರುವಂತೆಯೇ ಪ್ರೇಕ್ಷಕರ ಗ್ಯಾಲರಿಯಲ್ಲಿದ್ದವರ ಕುತೂಹಲ ಸಂಭ್ರಮವಾಗಿ ಮಾರ್ಪಟ್ಟಿತ್ತು.. ನೌಕೆ ಗಗನಮುಖಿಯಾಗಿದ್ದರೆ ಇವರ ಚಪ್ಪಾಳೆ ಹರ್ಷೋದ್ಗಾರ ಮುಗಿಲು ಮುಟ್ಟಿತ್ತು. ಜೋರಾಗಿ ಕೂಗುವುದು ಚೀರುವ ಮೂಲಕ ಇಸ್ರೊದ ಕಾರ್ಯಕ್ಕೆ ತಮ್ಮ ಮೆಚ್ಚುಗೆಯ ಮುದ್ರೆವೊತ್ತಿದರು. ಹಲವರು ರಾಕೆಟ್‌ನ ಪಯಣವನ್ನು ತಮ್ಮ ಮೊಬೈಲ್‌ಗಳಲ್ಲಿ ಸೆರೆ ಹಿಡಿಯುತ್ತಿದ್ದುದು ಕೂಡ ಕಂಡುಬಂತು. ಅದರಲ್ಲೂ ಪ್ರೊಪಲ್ಷನ್‌ ಮಾಡ್ಯೂಲ್‌ ರಾಕೆಟ್‌ನಿಂದ ಯಶಸ್ವಿಯಾಗಿ ಬೇರ್ಪಟ್ಟ ಬಗ್ಗೆ ನಿಯಂತ್ರಣ ಕೇಂದ್ರದಿಂದ ಘೋಷಣೆ ಕೇಳಿಬಂದಾಗ ಸಚಿವ ಸಿಂಗ್‌ ಇಸ್ರೊದ ಮಾಜಿ ಅಧ್ಯಕ್ಷರು ಸೇರಿದಂತೆ ಕೇಂದ್ರದಲ್ಲಿದ್ದವರ ಸಂತೋಷಕ್ಕೆ ಪಾರವೇ ಇರಲಿಲ್ಲ. ಉಡಾವಣಾ ಕೇಂದ್ರ ಇರುವ ಕಡಲ ತಡಿಯಲ್ಲಿ ನಿಂತಿದ್ದ ಹಲವರು ರಾಷ್ಟ್ರ ಧ್ವಜ ಹಿಡಿದು ಸಂಭ್ರಮಿಸಿ ಇಸ್ರೊ ಸಾಧನೆಗೆ ಅಭಿಮಾನ ಮೆರೆದರು.