ನವದೆಹಲಿ (ಪಿಟಿಐ): ಪತ್ನಿಯ ಹಣಕಾಸಿನ ವಿವರವನ್ನು ಸ್ವತಃ ಪತಿಯೆ ಮಾಹಿತಿ ಹಕ್ಕು ಕಾಯಿದೆಯಡಿ ಕೇಳಿದ್ದರೂ ನೀಡುವಂತಿಲ್ಲ ಎಂದು ಕೇಂದ್ರ ಮಾಹಿತಿ ಆಯೋಗ ಹೇಳಿದೆ. ಹಣಕಾಸಿನ ಮಾಹಿತಿ ವೈಯಕ್ತಿಕವಾದುದು ಎಂದು ಆಯೋಗ ಹೇಳಿದೆ.
ಒಂದು ವೇಳೆ ಪತಿ ಪತ್ನಿಯರು ವಿವಾಹ ಸಂಬಂಧ ವ್ಯಾಜ್ಯ ಅಥವಾ ದೌರ್ಜನ್ಯ ಆರೋಪಗಳಲ್ಲಿ ಸಿಕ್ಕಿಹಾಕಿಕೊಂಡಿದ್ದರೆ ಇಬ್ಬರ ಖಾಸಗಿತನ ಕಾಪಾಡುವುದು ಅಗತ್ಯ ಎಂದು ಮಾಹಿತಿ ಆಯೋಗದ ಆಯುಕ್ತ ಶ್ರೀಧರ ಆಚಾರ್ಯುಲು ಹೇಳಿದ್ದಾರೆ. ಸಂಗಾತಿಯ ವೇತನದ ಕಡಿತ ಮತ್ತು ವೆಚ್ಚದ ಬಗ್ಗೆ ಮಾಹಿತಿ ಪಡೆದುಕೊಳ್ಳಲು ಪತಿ ಅಥವಾ ಪತ್ನಿಯರಿಗೆ ಹಕ್ಕಿಲ್ಲ. ಸಾರ್ವಜನಿಕ ಹಿತಾಸಕ್ತಿ ಇರುವ ವಿಷಯ ಹೊರತು ಪಡಿಸಿ ಇನ್ನುಳಿದ ಸಂದರ್ಭದಲ್ಲಿ ಈ ಮಾಹಿತಿ ವೈಯಕ್ತಿಕ ಎಂದು ಆಯೋಗ ಹೇಳಿದೆ.
ಸಾರ್ವಜನಿಕ ಸೇವೆಯಲ್ಲಿರುವ ಪತ್ನಿಯ ವೇತನದ ಮಾಹಿತಿ ಪಡೆಯಲು ಪತಿಗೆ ಹಕ್ಕಿದೆ. ಅದರೆ ವೆಚ್ಚ ಮತ್ತು ಸಾಲದ ಮೇಲಿನ ಕಡಿತದ ಮಾಹಿತಿಯನ್ನು ಮಾಹಿತಿ ಹಕ್ಕು ಕಾಯಿದೆಯಡಿ ಪಡೆಯುವಂತಿಲ್ಲ ಎಂದು ವಿವಾಹ ವ್ಯಾಜ್ಯ ಸಂಬಂಧ ಧೀರಜ್‌ ಕಪೂರ್ ಎಂಬುವವರು ಸಲ್ಲಿಸಿದ ಅರ್ಜಿ ವಿಚಾರಣೆ ವೇಳೆ ಆಯೋಗ ಈ ಮಾಹಿತಿ ನೀಡಿದೆ. ಈವರೆಗಿನ ಮಾಹಿತಿ ಹಕ್ಕು ಕಾಯಿ ದೆಯ ಪ್ರಕಾರ ಪತಿ–ಪತ್ನಿ ಮತ್ತು ನಾಗರಿಕ ಎಂಬ ವ್ಯತ್ಯಾಸವಿಲ್ಲ. ಖಾಸಗಿತನ ವೈಯಕ್ತಿಕ ಹಕ್ಕು ಎಂದು ಹೇಳಿದೆ.
