ಶ್ರೀರಂಗಪಟ್ಟಣ (ಮಂಡ್ಯ ಜಿಲ್ಲೆ): ಕ್ಷೇತ್ರದಲ್ಲಿ ಕಾಂಗ್ರೆಸ್‌ ಅಭ್ಯರ್ಥಿ ಗೆಲ್ಲುತ್ತಾರೆಂದು ತಾಲ್ಲೂಕಿನ ದೊಡ್ಡಪಾಳ್ಯದ ಕಾಂಗ್ರೆಸ್‌ ಕಾರ್ಯಕರ್ತರು ಶುಕ್ರವಾರ ಮೇಕೆಗಳನ್ನು ಪಣಕ್ಕಿಟ್ಟು ಎದುರಾಳಿಗಳನ್ನು ಬಾಜಿಗೆ ಕರೆದಿದ್ದಾರೆ.
ಗ್ರಾಮದ ನವೀನ್‌ ಮತ್ತು ಡಿ.ಆರ್‌.ಸೋಮೇಶ್‌ ತಮ್ಮ ಒಂದೊಂದು ಮೇಕೆಗಳನ್ನು ಪಣಕ್ಕಿಡುವುದಾಗಿ ಘೋಷಿಸಿದರು. ಊರಿನ ಗಣೇಶ ದೇವಾಲಯದ ಮುಂದೆ ಮೇಕೆಗಳನ್ನು ನಿಲ್ಲಿಸಿ ಬಾಜಿ ಕಟ್ಟುವವರು ಬನ್ನಿ ಎಂದು ಬಹಿರಂಗವಾಗಿ ಆಹ್ವಾನ ನೀಡಿದರು. ₹ 50 ಸಾವಿರ ಬೆಲೆ ಬಾಳುವ ಎರಡು ಮೇಕೆಗಳನ್ನು ಪಣಕ್ಕೆ ಇಡಲು ಸಿದ್ಧದರಿದ್ದೇವೆ ಎಂದು ಹೇಳಿದರು.
’ಒಂದು ಗಂಟೆಯ ಕಾಲ ಮೇಕೆಗಳನ್ನು ದೇವಾಲಯದ ಮುಂದೆ ನಿಲ್ಲಿಸಿ ಕಾಂಗ್ರೆಸ್‌ ಅಭ್ಯರ್ಥಿಯ ಪರವಾಗಿ ಬಾಜಿಗೆ ಕರೆದಿದ್ದೇವೆ. ಆದರೆ ಜೆಡಿಎಸ್ ಅಥವಾ ಬಿಜೆಪಿ ಕಡೆಯಿಂದ ಯಾರೊಬ್ಬರೂ ಬಾಜಿಗೆ ಬಂದಿಲ್ಲ. ಬಾಜಿ ಕಟ್ಟುವವರಿಗೆ ಶನಿವಾರ ಬೆಳಿಗ್ಗೆ 8 ಗಂಟೆವರೆಗೂ ಅವಕಾಶ ಉಂಟು’ ಎಂದು ಕಾಂಗ್ರೆಸ್‌ ಕಾರ್ಯಕರ್ತರಾದ ಶಿವಕುಮಾರ್‌, ಶ್ರೀಕಂಠು, ರೇವಣ್ಣ, ಪ್ರೇಮಕುಮಾರ್‌ ಹೇಳಿದರು.
