ರಾಮಮಂದಿರ ವಿಷಯದಲ್ಲಿ ಕಾಂಗ್ರೆಸ್‌ನಿಂದ ದ್ವೇಷದ ರಾಜಕಾರಣ: ಆರ್‌. ಅಶೋಕ

‘ನಾವೂ ರಾಮನ ಭಕ್ತರು’ ಎಂದು ಗೃಹ ಸಚಿವ ಜಿ. ಪರಮೇಶ್ವರ ನೀಡಿದ ಹೇಳಿಕೆಗೆ ಪ್ರತಿಕ್ರಿಯಿಸಿದ ಅಶೋಕ, ‘ರಾಮನನ್ನು ಆರಾಧಿಸುವುದಾದರೆ ರಾಮನವಮಿ ಮಾಡಬೇಕು. ಕಾಂಗ್ರೆಸ್‌ನವರದ್ದು ಟಿಪ್ಪು ಸಂಸ್ಕೃತಿ. ಕುಂಕುಮ ಹಚ್ಚಿದರೆ ಆಗಲ್ಲ. ತಿಲಕ ಇಟ್ಟರೂ ಆಗುವುದಿಲ್ಲ. ಸಿದ್ಧರಾಮಯ್ಯರಿಗೆ ಕೇಸರಿ ಪೇಟಾ ಅಂದರೆ ಆಗುವುದಿಲ್ಲ’ ಎಂದು ಕುಟುಕಿದರು.

‘ಯಾವ್ಯಾವ ಜಾತಿಯನ್ನು ಒಡೆಯಬೇಕು ಎಂಬುದನ್ನು ಸಿದ್ಧರಾಮಯ್ಯ ಅವರಿಂದ ಕಲಿಯಬೇಕು. ಒಡೆದು ಆಳುವುದಕ್ಕೆ ಸಿದ್ಧರಾಮಯ್ಯ ಬ್ರ್ಯಾಂಡ್ ಅಂಬಾಸಿಡರ್’ ಎಂದು ವ್ಯಂಗ್ಯವಾಡಿದರು. 

‘ಚುನಾವಣೆ ಆದ ಬಳಿಕ ಸರ್ಕಾರ ಬದಲಾಗಲಿದೆ ಎಂದು ಕುಮಾರಸ್ವಾಮಿ ಹೇಳಿದ್ದಾರೆ. ವಿಜಯೇಂದ್ರ ಕೂಡ ಅದನ್ನೇ ಹೇಳಿದ್ದಾರೆ. ಅವರಿಗೆ ಆ ಬಗ್ಗೆ ಮಾಹಿತಿ ಇರಬಹುದು’ ಎಂದರು. 

‘ಲೋಕಸಭಾ ಚುನಾವಣೆ ಆದ ಮೇಲೆ ಏನು ಬೇಕಾದರೂ ಆಗಬಹುದು. ನನಗೆ ಇರುವ ಮಾಹಿತಿ ಈಗ ಹೇಳುವುದಿಲ್ಲ. ಎಲ್ಲಿ ಹೇಳಬೇಕೋ ಅಲ್ಲಿ ಹೇಳುತ್ತೇನೆ. ಈ ಸರ್ಕಾರ ಬಂದು‌ ಏಳು ತಿಂಗಳಾಯಿತು.  ಈವರೆಗೂ ಒಂದೇ ಒಂದು ಕೆಲಸ ಆಗಿಲ್ಲ ಎಂದು ಅವರ ಪಕ್ಷದ ನಾಯಕರೇ ಹೇಳುತ್ತಿದ್ದಾರೆ. ಮುಂದೆ ಏನೇನೂ ಆಗುತ್ತದೋ ನೋಡೋಣ’ ಎಂದರು.

‘ಸರ್ಕಾರದ ವಿರುದ್ಧ ಯಾರು ಮಾತನಾಡುತ್ತಾರೊ ಅವರಿಗೆ ಹುದ್ದೆ ಸಿಗುತ್ತದೆ. ಈಗಲೂ ಹಾಗೇ ಆಗಿದೆ. ಸರ್ಕಾರದ ವಿರುದ್ಧ ಮಾತನಾಡಿದ ಬಸವರಾಜ ರಾಯರೆಡ್ಡಿ, ಆರ್.ವಿ. ದೇಶಪಾಂಡೆ, ಬಿ.ಆರ್. ಪಾಟೀಲ್‌ಗೆ ಹುದ್ದೆ ಕೊಟ್ಟಿದ್ದಾರೆ. ಕಾಂಗ್ರೆಸ್‌ನಲ್ಲಿ ಈ ಸಂಸ್ಕೃತಿ ಇದೆ. ಈ ಹಿಂದೆ ರಮೇಶ್‌ಕುಮಾರ್ ಅವರು ಸರ್ಕಾರದ ವಿರುದ್ಧ ಮಾತನಾಡಿದ್ದರು. ನಂತರ ಅವರನ್ನು ಮಂತ್ರಿ ಮಾಡಿದ್ದರು’ ಎಂದರು.