ಬೆಂಗಳೂರು, ಗೋವಾದ ಸ್ಟಾರ್‌ ಹೋಟೆಲ್‌ಗಳು ಪೇಪರ್‌ ಸ್ಟ್ರಾ ಬಳಕೆ ಕೈಬಿಟ್ಟಿದ್ದು, ತೆಂಗಿನಗರಿಯ  ಸ್ಟ್ರಾಗಳನ್ನೇ ಹೆಚ್ಚು ಬಳಸುತ್ತಿವೆ. ಈ ಹೋಟೆಲ್‌ಗಳಿಗೆ ‘ಸನ್‌ಬರ್ಡ್‌’ ಸಂಸ್ಥೆಯು ತಿಂಗಳಿಗೆ 10 ರಿಂದ 15 ಲಕ್ಷ ಸ್ಟ್ರಾಗಳನ್ನು ಪೂರೈಸುತ್ತಿದೆ. ಬೆಲ್ಜಿಯಂ, ನೆದರ್ಲೆಂಡ್‌, ಕೆನಡಾ, ಫಿಲಿಫೈನ್ಸ್, ಜರ್ಮನಿ, ಸ್ಪೇನ್‌ ದೇಶಗಳಿಂದಲೂ ಬೇಡಿಕೆ ಬಂದಿದೆ. 

‘ಮೂರು ತಿಂಗಳಿಗೆ 60 ಲಕ್ಷ ಸ್ಟ್ರಾ ಪೂರೈಸುವಂತೆ ವಿದೇಶಗಳಿಂದ ಬೇಡಿಕೆ ಬರುತ್ತಿದೆ. ಸದ್ಯಕ್ಕೆ ಅಷ್ಟೊಂದು ಪ್ರಮಾಣದಲ್ಲಿ ಸ್ಟ್ರಾ ಪೂರೈಸುವ ವ್ಯವಸ್ಥೆ ನಮ್ಮಲ್ಲಿ ಇಲ್ಲ. ಮೈಸೂರು ಜಿಲ್ಲೆಯ ಬನ್ನೂರಿನಲ್ಲಿರುವ ಘಟಕದಲ್ಲಿ ಹೊಸ ಯಂತ್ರ ಅಳವಡಿಸಲಾಗಿದ್ದು ಅಲ್ಲಿ ಒಂದು ನಿಮಿಷದಲ್ಲಿ 60 ಸ್ಟ್ರಾಗಳು ತಯಾರಾಗುತ್ತಿದೆ. ಈ ಘಟಕವು ಪೂರ್ಣ ಪ್ರಮಾಣದಲ್ಲಿ ಕೆಲಸ ಮಾಡಿದರೆ ಹೆಚ್ಚಿನ ಪ್ರಮಾಣದಲ್ಲಿ ಸ್ಟ್ರಾಗಳನ್ನು ಪೂರೈಸಲು ಸಾಧ್ಯವಾಗಲಿದೆ’ ಎಂದು ಕಂಪನಿಯ ಸಹ ಸಂಸ್ಥಾಪಕ ಚಿರಾಗ್ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಬೆಂಗಳೂರಿನ ಡೇರಿ ವೃತ್ತದ ಬಳಿಯಿರುವ ಕ್ರೈಸ್ಟ್‌ ವಿ.ವಿಯ ಇಂಗ್ಲಿಷ್‌ ಪ್ರಾಧ್ಯಾಪಕ ಸಾಜಿ ವರ್ಗೀಸ್‌ ಅವರು ಕ್ಯಾಂಪಸ್‌ನಲ್ಲಿ ಬಿದ್ದಿದ್ದ ತೆಂಗಿನಗರಿಯನ್ನು ಗಮನಿಸಿ ಅದರಿಂದ ಸ್ಟ್ರಾ ತಯಾರಿಕೆಗೆ 2017ರಲ್ಲಿ ಯೋಜನೆ ರೂಪಿಸಿದ್ದರು. ಈಗ ಉತ್ಪನ್ನ ಹಾಗೂ ಯಂತ್ರಕ್ಕೆ ಪೇಟೆಂಟ್‌ ಲಭಿಸಿದೆ. ಅವರ ನೇತೃತ್ವದಲ್ಲಿ ಸಿಎಸ್‌ಆರ್‌ ನಿಧಿ ಬಳಸಿಕೊಂಡು ಸ್ಟ್ರಾ ತಯಾರಿಸುತ್ತಿದ್ದೇವೆ. ಮೂರು ವರ್ಷಗಳಿಂದ ಸಂಶೋಧನೆ ನಡೆಯುತ್ತಲೇ ಇತ್ತು. ಆರಂಭದಲ್ಲಿ ಒಂದು ಪದರದ ಸ್ಟ್ರಾ ತಯಾರಿಸುತ್ತಿದ್ದೆವು. ಸದ್ಯ ನಾಲ್ಕು ಪದರಗಳ ಸ್ಟ್ರಾ ತಯಾರಿಸಿ ಮಾರುಕಟ್ಟೆಗೆ ಪರಿಚಯಿಸಿದ್ದೇವೆ’ ಎಂದು ವಿವರ ನೀಡಿದರು.

ಬನ್ನೂರು, ಕಾಸರಗೋಡು, ತಮಿಳುನಾಡಿನ ಎರಡು ಸ್ಥಳಗಳಲ್ಲಿ ತಯಾರಿಕೆ ಘಟಕ ಸ್ಥಾಪಿಸಲಾಗಿದೆ. ಪ್ರತಿ ಸ್ಟ್ರಾದ ಬೆಲೆ ₹ 1.20ರಿಂದ ₹ 2.50ರ ವರೆಗೆ ಇದೆ. 

‘ಪ್ರತಿವರ್ಷ ತೆಂಗಿನಮರ ನೈಸರ್ಗಿಕವಾಗಿ ಗರಿಯನ್ನು ಕಳೆದುಕೊಳ್ಳುತ್ತದೆ. ಅವುಗಳನ್ನು ವಿಲೇವಾರಿ ಮಾಡುವುದು ರೈತರಿಗೆ ಕಷ್ಟ. ಗ್ರಾಮೀಣ ಪ್ರದೇಶದಲ್ಲಿ ಕಡ್ಡಿ ತೆಗೆದು ಪೊರಕೆ ತಯಾರಿಸುತ್ತಾರೆ. ಉಳಿದಿರುವುದನ್ನು ಬೆಂಕಿಗೆ ಹಾಕಿ ಸುಡುತ್ತಾರೆ. ನಾವು ಆ ಗರಿಗಳನ್ನೇ ಖರೀದಿಸಿ ಸ್ಟ್ರಾ ತಯಾರಿಸುತ್ತಿದ್ದೇವೆ’ ಎಂದು ಸಾಜಿ ವರ್ಗೀಸ್‌ ಹೇಳಿದರು.

‘ಸ್ಟ್ರಾವನ್ನು ಮೂರು ಗಂಟೆವರೆಗೆ ಯಾವುದೇ ಪಾನೀಯದಲ್ಲಿ ಬಳಸಬಹುದು. ಒಂದು ಬಿದಿರಿನ ಸ್ಟ್ರಾ ತಯಾರಿಸಲು ₹30 ವೆಚ್ಚವಾಗಲಿದ್ದು ದುಬಾರಿ ಎನಿಸಿದೆ. ಈ ಸ್ಟ್ರಾಗೆ ತಯಾರಿಕೆ ಸುಲಭ’ ಎಂದು ವಿವರಿಸಿದರು.