ಶೆಣೈ ಮರುನೇಮಕಕ್ಕೆ ಸುಭಾಷ್ ಬೇಡಿಕೆ ಇಟ್ಟಿದ್ದ...

* ಸುಭಾಷ್ ಹಣದ ಬೇಡಿಕೆ ಇಡಲಿಲ್ಲವೇ. ನಿಮ್ಮ ಮಗ ಮಲ್ಲಿಕಾರ್ಜುನ ಮೇಟಿ ಅವರು ಮಧ್ಯವರ್ತಿ ಮೂಲಕ ಈಗಾಗಲೇ ₹50 ಲಕ್ಷ ಕೊಟ್ಟಿದ್ದಾರೆ ಎಂದು ಹೇಳಲಾಗುತ್ತಿದೆ.

ನಾನು ಒಂದು ಪೈಸೆ ದುಡ್ಡು ಯಾರಿಗೂ ಕೊಟ್ಟಿಲ್ಲ. ನನ್ನ ಬಳಿ ಅಷ್ಟೊಂದು ದುಡ್ಡು ಇಲ್ಲ. ಸುಭಾಷ್‌ ಸೇರಿದಂತೆ ಯಾರೂ ದುಡ್ಡಿಗೆ ಬೇಡಿಕೆ ಇಟ್ಟಿಲ್ಲ.

 

* ವಿಜಯಲಕ್ಷ್ಮಿ ಸರೂರು ಅವರೊಂದಿಗೆ ನಿಮ್ಮದು ಒಪ್ಪಿತ ಸಂಬಂಧವೇ, ಆಮಿಷ ಒಡ್ಡಿದ್ದೀರಾ?  

ಆಕೆ ಪಂಚಕರ್ಮ ಚಿಕಿತ್ಸೆ ಪಡೆ ಯಲು ಹೋದಾಗ ಆಯುಷ್ ವೈದ್ಯ ಡಾ.ಗುಗ್ಗರಿ ಅವರಿಂದ ಪರಿಚಯವಾ ಗಿದ್ದರು. ವಿಜಯಲಕ್ಷ್ಮಿ ನನಗೆ ದೂರದ ಸಂಬಂಧಿಯೂ ಹೌದು. ಪರಿಚಯವಿದ್ದ ಕಾರಣ ಆಗಾಗ ನನ್ನ ಬಳಿ ಬಂದು ಹೋಗುತ್ತಿದ್ದರು. ಆಕೆಗೂ ನನಗೂ ಯಾವುದೇ ಸಂಬಂಧವಿಲ್ಲ. ಒಪ್ಪಿತ ಸಂಬಂಧ, ಆಮಿಷ  ಯಾವುದೂ ಇಲ್ಲ. ನಾನು ಅಂತಹ ಉಸಾಬರಿಗೆ ಹೋಗುವುದಿಲ್ಲ.

 

* ಹಾಗಾದರೆ ನಿಮ್ಮೊಂದಿಗೆ ಸಿ.ಡಿಯಲ್ಲಿ ಇರುವ ಮಹಿಳೆ ಯಾರು, ವಿಜಯಲಕ್ಷ್ಮಿ ಸರೂರ ಅವರ ಆರೋಪ ಸುಳ್ಳಾ?

ಆ ಸಿ.ಡಿಯಲ್ಲಿ ಇರುವುದೇ ನಾನು ಅಲ್ಲ. ಅದೊಂದು ಕೃತಕ ಸೃಷ್ಟಿ. ಎರಡು ತಿಂಗಳ ಹಿಂದೆ ಬೆಂಗಳೂರಿನ ವಿಕ್ರಮ್ ಆಸ್ಪತ್ರೆಯಲ್ಲಿ ನರರೋಗ ತಜ್ಞ ಡಾ.ಚಂದ್ರಮೌಳಿ ಬೆನ್ನು ನೋವಿಗೆ ಶಸ್ತ್ರಚಿಕಿತ್ಸೆ ಮಾಡಿದ್ದರು. ಆಸ್ಪತ್ರೆಯಲ್ಲಿ ಇದ್ದಾಗ ಆಗ ನಾನು ಬನಿಯನ್‌ ಹಾಕಿಕೊಂಡಿದ್ದ ವಿಡಿಯೊವನ್ನು ಆ ಸಿ.ಡಿಯಲ್ಲಿ ಬಳಕೆ ಮಾಡಿಕೊಳ್ಳಲಾಗಿದೆ. ವಿಜಯಲಕ್ಷ್ಮಿ ಮಾಡಿರುವ ಆರೋಪಗಳು ಸುಳ್ಳು. 

 

* ಸಿ.ಡಿ ಕೃತಕ ಸೃಷ್ಟಿಯಾದಲ್ಲಿ ನೀವು ರಾಜೀನಾಮೆ ಕೊಟ್ಟಿದ್ದೇಕೆ?

ಮಾಧ್ಯಮಗಳ ಆರೋಪದಿಂದ ಸರ್ಕಾರಕ್ಕೆ, ಪಕ್ಷಕ್ಕೆ ಮುಜುಗರವಾಗದಿರಲಿ ಎಂಬ ಕಾರಣಕ್ಕೆ ರಾಜೀನಾಮೆ ನೀಡಿದ್ದೇನೆ. ನಾನು ಮುಖ್ಯಮಂತ್ರಿಗೆ ರಾಜೀನಾಮೆ ಪತ್ರ ಕೊಟ್ಟಾಗ ಇನ್ನೂ ಸಿ.ಡಿ ಬಿಡುಗಡೆಯೇ ಆಗಿರಲಿಲ್ಲ. ಪ್ರಕರಣದ ಹಿಂದೆ ಷಡ್ಯಂತ್ರ ಇದ್ದು ಸಿಐಡಿ ತನಿಖೆಗೆ ವಹಿಸುವಂತೆ ಮುಖ್ಯಮಂತ್ರಿಗೆ ನಾನೇ ಮನವಿ ಮಾಡಿದ್ದೇನೆ. ತನಿಖೆ ನಂತರ ಸತ್ಯಾಂಶ ಹೊರಬರಲಿದೆ.

 

* ಈಗ ಮಾಡುತ್ತಿರುವುದು ಸಿಐಡಿ ವಿಚಾರಣೆ ಮಾತ್ರ. ನೀವು ದೂರು ಕೊಟ್ಟಲ್ಲಿ ಮಾತ್ರ ತನಿಖೆ ನಡೆಯಲಿದೆ. ನೀವೇಕೆ ದೂರು ಕೊಡಲು ಮುಂದಾಗುತ್ತಿಲ್ಲ.

ನನಗೆ  ಯಾರೂ ಶತ್ರುಗಳು ಇಲ್ಲ. ಹಾಗಾಗಿ ಯಾರ ವಿರುದ್ಧವೂ ದೂರು ಕೊಟ್ಟಿಲ್ಲ. ಈಗ ಮಾಡುತ್ತಿರುವ ವಿಚಾರಣೆಯಿಂದ ಸತ್ಯಾಂಶ ಹೊರಗೆ ಬರಲಿದೆ. ದೂರು ಕೊಡುವುದೊ, ಬಿಡುವುದೊ ಎಂಬುದನ್ನು ಅಗತ್ಯ ಬಿದ್ದಲ್ಲಿ ನಿರ್ಧರಿಸುವೆ.

 

* ಬಳ್ಳಾರಿಯ ಮಾಹಿತಿ ಹಕ್ಕು ಕಾರ್ಯಕರ್ತ ರಾಜಶೇಖರ ಮುಲಾಲಿ ನಿಮ್ಮನ್ನು ಸಂಪರ್ಕಿಸಿದ್ದರಾ?.

 ಮುಲಾಲಿ ನನಗೆ ಪರಿಚಯವೇ ಇಲ್ಲ. ಸಂಪರ್ಕಿಸಿಯೂ ಇಲ್ಲ. ಇಲ್ಲಿಯವರೆಗೂ ನಾನು ಅವರನ್ನು ಟಿ.ವಿಯಲ್ಲಿ ಮಾತ್ರ ನೋಡಿದ್ದೇನೆ.

 

* ಮಾಧ್ಯಮಗಳಲ್ಲಿ ಸಿ.ಡಿ ವಿಚಾರ ಪ್ರಸ್ತಾಪವಾದಾಗಲೇ ರಾಜೀನಾಮೆ ನೀಡಿ ಪಕ್ಷಕ್ಕೆ, ಸರ್ಕಾರಕ್ಕೆ ಆದ ಮುಜುಗರ ತಪ್ಪಿಸಬಹುದಿತ್ತಲ್ಲಾ?

ನಾನು ಮೊದಲ ದಿನವೇ ರಾಜೀನಾಮೆ ಕೊಡಲು ಸಿದ್ಧವಾಗಿದ್ದೆ. ಸಿದ್ದರಾಮಯ್ಯ ಒಪ್ಪಲಿಲ್ಲ. ಮೊದಲು ಸತ್ಯಾಸತ್ಯತೆ ಪರಾಮರ್ಶಿಸೋಣ. ನಂತರ ನಿರ್ಧಾರ ಕೈಗೊಳ್ಳುವಿರಂತೆ ಎಂದು ಹೇಳಿ ತಡೆದಿದ್ದರು.

 

* ಈ ಪ್ರಕರಣದಿಂದ ನಿಮ್ಮ ರಾಜಕೀಯ ಬದುಕು ಅಂತ್ಯವಾಯಿತೇ, ಮುಂದೇನು?

ಇಲ್ಲ. ಕ್ಷೇತ್ರದ ಜನರು ನನ್ನ ಕೈ ಬಿಡುವುದಿಲ್ಲ. ರಾಜಕೀಯದಿಂದ ದೂರವಾಗುವ ಪ್ರಶ್ನೆಯೇ ಇಲ್ಲ. ಹಿಂದೆ ಮಂತ್ರಿಯಾಗಿದ್ದಾಗ ಇಡೀ ಜಿಲ್ಲೆಯ ಜವಾಬ್ದಾರಿ ಇರುತ್ತಿತ್ತು. ಈಗ ಕ್ಷೇತ್ರದ ಕಡೆ ಹೆಚ್ಚು ಗಮನ ನೀಡುವೆ. ನನ್ನ ಮತ ಕ್ಷೇತ್ರದ ಜನ ಕೈ ಹಿಡಿಯಲಿದ್ದಾರೆ.