`ಇಸ್ಲಾಮಾಬಾದ್‌: ’ಪಾಕಿಸ್ತಾನದ ಪ್ರಧಾನಿ ಇಮ್ರಾನ್‌ ಖಾನ್‌ ಅವರ ಮಾನಸಿಕ ಆರೋಗ್ಯ ತಪಾಸಣೆಗೆ ಆಯೋಗ ರಚನೆ ಮಾಡಬೇಕು‘ ಎಂದು ಮಾಜಿ ಪ್ರಧಾನಿ ಶಾಹಿದ್‌ ಖಕನ್‌ ಅಬ್ಬಾಸಿ ಹೇಳಿದ್ದಾರೆ.
ಹಿಂದಿನ ಹತ್ತು ವರ್ಷಗಳ ಅವಧಿಯಲ್ಲಿ ಬೃಹತ್‌ ಮೊತ್ತದ ಸಾಲ ಮಾಡಿ ದೇಶ ಆರ್ಥಿಕ ಸ್ಥಿತಿ ಬಿಕ್ಕಟ್ಟಿಗೆ ಸಿಲುಕುವಂತೆ ಮಾಡಿರುವವರ ವಿರುದ್ಧ ತನಿಖೆ ನಡೆಸಲು ಆಯೋಗ ರಚಿಸಲಾಗುವುದು ಎಂದು ಇಮ್ರಾನ್‌ ಖಾನ್‌ ಅವರು ಮಂಗಳವಾರ ಮಧ್ಯರಾತ್ರಿ ದೇಶವನ್ನು ಉದ್ದೇಶಿಸಿ ಮಾಡಿರುವ ಭಾಷಣದಲ್ಲಿ ಘೋಷಿಸಿದ್ದರು.
‘ದೇಶದ ಇತಿಹಾಸದಲ್ಲೇ ಇದುವರೆಗೆ ಯಾವುದೇ ಪ್ರಧಾನಿ ಮಧ್ಯರಾತ್ರಿ ವೇಳೆ ದೇಶವನ್ನು ಉದ್ದೇಶಿಸಿ ಭಾಷಣ ಮಾಡಿಲ್ಲ‘ ಎಂದು ವಿರೋಧ ಪಕ್ಷದ ನಾಯಕರೂ ಆಗಿರುವ ಅಬ್ಬಾಸಿ ಕಟುವಾಗಿ ಟೀಕಿಸಿದ್ದಾರೆ.
‘ಯಾವುದೇ ತನಿಖೆ ಎದುರಿಸಲು ಸಿದ್ಧ‘ ಎಂದೂ ಅವರು ತಿಳಿಸಿದ್ದಾರೆ. 2017 ಆಗಸ್ಟ್‌ನಿಂದ 2018 ಮೇ ವರೆಗೆ ಅಬ್ಬಾಸಿ ಪ್ರಧಾನಿಯಾಗಿದ್ದರು.
