ವಿಶ್ವಸಂಸ್ಥೆ: ಸಿರಿಯಾ ಸಂಘರ್ಷದ ವೇಳೆ ಕಾಣೆಯಾದ 1 ಲಕ್ಷದ 30 ಸಾವಿರ ಮಂದಿ ಏನಾದರು ಎಂಬುದನ್ನು ಪತ್ತೆಹಚ್ಚಲು ಸ್ವತಂತ್ರ ಸಂಸ್ಥೆಯೊಂದನ್ನು ರಚಿಸಬೇಕೆಂಬ ನಿರ್ಣಯವನ್ನು ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯು ಅಂಗೀಕರಿಸಿದೆ.
ನಿರ್ಣಯವನ್ನು ಗುರುವಾರ ಅಂಗೀಕರಿಸಲಾಗಿದ್ದು, ನಾಪತ್ತೆಯಾದವರ ಕುಟುಂಬದವರು ಹಾಗೂ ಪ್ರೀತಿ ಪಾತ್ರರು ಸಲ್ಲಿಸಿದ ಅರ್ಜಿಗಳಿಗೆ ಇದು ಮಹತ್ವದ ಪ್ರತಿಕ್ರಿಯೆಯಾಗಿದೆ. 193 ಸದಸ್ಯರನ್ನೊಳಗೊಂಡಿರುವ ಸಾಮಾನ್ಯ ಸಭೆಯಲ್ಲಿ 81 ಮತಗಳು ನಿರ್ಣಯದ ಪರವಾಗಿ ಬಂದಿದ್ದರೆ, 11 ಮತಗಳು ನಿರ್ಣಯಕ್ಕೆ ವಿರುದ್ಧವಾಗಿ ಬಂದಿವೆ. 62 ಸದಸ್ಯರು ಗೈರುಹಾಜರಾಗಿದ್ದರು.
ನಿರ್ಣಯವನ್ನು ವಿರೋಧಿಸಿದ ಸದಸ್ಯರಲ್ಲಿ ಸಿರಿಯಾ ಕೂಡ ಸೇರಿದೆ. ರಷ್ಯಾ, ಚೀನಾ, ಉತ್ತರ ಕೊರಿಯಾ, ವೆನೆಜುಲಾ, ಕ್ಯೂಬಾ ಹಾಗೂ ಇರಾನ್‌ ದೇಶಗಳು ನಿರ್ಣಯಕ್ಕೆ ವಿರುದ್ಧವಾಗಿ ಮತ ಹಾಕಿವೆ.
