ಹರಾರೆ: ತೀವ್ರ ಬರ ಪರಿಸ್ಥಿತಿಯಿಂದಾಗಿ ಜಿಂಬಾಬ್ವೆಯ ಶೇ 50ರಷ್ಟು ಜನಸಂಖ್ಯೆಯು ಆಹಾರ ಮತ್ತು ನೀರಿನ ತೀವ್ರ ಕೊರತೆಯಿಂದ ಬಳಲುತ್ತಿದೆ, 430 ಮಿಲಿಯನ್‌ ಡಾಲರ್ ನೆರವಿನ ಅಗತ್ಯವಿದೆ ಎಂದು ವಿಶ್ವಸಂಸ್ಥೆ ತಿಳಿಸಿದೆ.
ಕಳೆದ 4 ದಶಕಗಳ ಅವಧಿಯಲ್ಲೇ ಗಂಭೀರವಾದ ಪರಿಸ್ಥಿತಿಯನ್ನು ಜಿಂಬಾಬ್ವೆ ಎದುರಿಸುತ್ತಿದೆ. 76 ಲಕ್ಷ ಜನರಿಗೆ ಜೀವರಕ್ಷಕ ಮಾನವೀಯ ನೆರವು ಅಗತ್ಯವಿದೆ. ಇವರಲ್ಲಿ ಸುಮಾರು 31 ಲಕ್ಷ ಜನರು ತೀವ್ರ ಬಾಧಿತರಾಗಿದ್ದಾರೆ ಎಂದು ವಿಶ್ವಸಂಸ್ಥೆ ಮಾನವೀಯ ನೆರವು ವ್ಯವಹಾರಗಳ ವಿಭಾಗದ ಎಡ್ವರ್ಡ್ ಮ್ಯಾಥ್ಯೂ ಕಲ್ಲೊನ್ ಹೇಳಿದ್ದಾರೆ.
ಜಿಂಬಾಬ್ವೆಯ ಶೇ 60ರಷ್ಟು ಜನರು ಗ್ರಾಮೀಣ ಪ್ರದೇಶಗಳಲ್ಲಿ ವಾಸವಿದ್ದಾರೆ. ಹೆಚ್ಚಿನವರು ಮಾರುಕಟ್ಟೆಯಲ್ಲಿ ಆಹಾರ ಖರೀದಿಸಲೂ ಅಶಕ್ತರಾಗಿದ್ದಾರೆ. ಬರುವ ತಿಂಗಳುಗಳಲ್ಲಿ ಜೀವಹಾನಿ ತಪ್ಪಿಸಲು ತಕ್ಷಣದ ಕ್ರಮ ಅಗತ್ಯವಿದೆ ಎಂದಿದ್ದಾರೆ.
