ಚುರುಮುರಿ | ಬಬ್ರುವಾಹನ ಕಾಳಗ!

ಬ್ರದರ್: ಅಪ್ರತಿಮ ಶೂರ, ನಾ ನಮೋ- ಶಾ ಬಲನೋ... ಮಂಡ್ಯದಲ್ಲಿ ಹೋರಾಡಿ ಮಂತ್ರಿ ಪದವಿಯಂ ಪಡೆದವನೋ... ನನ್ನ ಭಾವನನ್ ನಿಲ್ಲಿಸಿ, ನಿನ್ನ ಸೋದರನನ್ ಮನೆಗೆ ಕಳಿಸಿದವನೋ... ಉಗ್ರ ಪ್ರತಾಪೀ...

ಬಂಡೆ: ಉಗ್ರ ಪ್ರತಾಪಿ! ಹಹ್ಹ... ಮಂಡ್ಯದಲ್ಲಿ ಮಗ ಸೋತಾಗ ಎಲ್ಲಿ ಅಡಗಿತ್ತೋ ಈ ನಿನ್ನ ಶೌರ್ಯ... ಸೋದರನ ಮಕ್ಕಳು ಜೈಲು ಪಾಲಾದಾಗ ಎಲ್ಲಿ ಮಲಗಿತ್ತೋ ಈ ನಿನ್ನ ಧೈರ್ಯ... ಬಂಡೆ ಹುಲಿಗಳ ಗೆಲ್ಲೋ ಗುಂಡಿಗೆಯು ನಿನಗೆಲ್ಲೋ... ಖಂಡಿಸುವೆ, ಬಿಚ್ಚಿಡುವೆ ನಿನ್ನ ಅಕ್ರಮ ಆಸ್ತಿಯನೆಲ್ಲಾ...

ಬ್ರದರ್: ಫಡಫಡಾ ಆಸ್ತಿ ಬಿಚ್ಚಿಡುವೆನೆಂದಡಿಗಡಿಗೆ ನುಡಿಯಬೇಡ ನೋಡಾ... ನಿನ್ನ ಅಕ್ರಮ ಆಸ್ತಿಗಳು ನನಗೂ ಗೊತ್ತಿಲ್ಲವೆನಬೇಡಾ... ನಾ ಗಂಡುಗಲಿಗಳ ಗಂಡ, ಉದ್ದಂಡ, ಕೀರ್ತಿ ಪ್ರಚಂಡಾ...

ಬಂಡೆ: ದಂಡನೋ ಉದ್ದಂಡನೋ ನಿರ್ಧರಿಸುವುದು ನ್ಯಾಯಾಂಗ... ಹಾಕು ಕೇಸುಗಳ ಮಾಡುವೆ ಮಾನಭಂಗಾ...

ಬ್ರದರ್: ಹಾಕುವೆ ಕೇಸುಗಳ, ಬಿಚ್ಚಿಡುವೆ ನಿಮ್ಮ ಬಂಡವಾಳವ, ಉತ್ತರಿಸದೆ ನಿಮ್ಮನು ಬಿಡುವುದಿಲ್ಲಾ... ಗ್ಯಾರಂಟಿ ಗಳಗಂಟಿಯಲಿ ಗೆದ್ದವರು ನೀವು, ಮೂಡಾ ಕೇಸಿನಲಿ ಸಿಕ್ಕಿದ್ದೀರಲ್ಲಾ...

ಬಂಡೆ: ಮೂಡಾ ಮೂಡಾ ಎಂದ್ ಹೆದರಿಸಿದರೆ ಇಲ್ಯಾರಿಗೂ ಭಯವಿಲ್ಲಾ...

ಬ್ರದರ್: ರಾಮನಗರದ ಹೆಸರು ಬದಲಿಸಿ ಉಳಿದವರಿಲ್ಲಾ... ಇ.ಡಿ. ಹಿಡಿತಕ್ಕೊಪ್ಪಿಸಿ ನಿಮ್ಮನು ಜೈಲಿಗಟ್ಟದೆ ಬಿಡುವವನಲ್ಲಾ...

ಬಂಡೆ: ಅಬ್ಬರಿಸಿ ಬೊಬ್ಬಿರಿದರೆ ನಮ್ಮ ಸಿಎಂ ಇಳಿಯುವುದಿಲ್ಲಾ... ನಿಮ್ಮ ಪಾದಯಾತ್ರೆಯ ನಾಟಕ ಬಹಳ ದಿನ ನಡೆಯುವುದಿಲ್ಲಾ...

ಬ್ರದರ್: ಆರ್ಭಟಿಸಿ ಬರುತಿದೇ ನೋಡು ರಾಜ್ಯಪಾಲರ ತನಿಖಾಹ್ವಾನ...!

ಬಂಡೆ: ತನಿಖಾಹ್ವಾನಕ್ಕೇ ಈ ಪಂಥಾಹ್ವಾನ, ಹೆದರುವವನಲ್ಲ ಈ ಬಂಡೆ ಬಬ್ರುವಾಹನಾ...