ಚುರುಮುರಿ: ಫಟಾಫಟ್ ಗಣತಿ!

‘ಬ್ರೇಕಿಂಗ್ ನ್ಯೂಸ್! ಭಾರತದಲ್ಲಿ ಬಡವರ ಸಂಖ್ಯೆ ಕಡಿಮಿ ಆಗೇತಂತೆ, ಪೇಪರಲ್ಲಿ ಬಂದಿದೆ’ ಎಂದ ದುಬ್ಬೀರ.

. ‘ಹೌದಾ? ಮತ್ತೆ ಈ ಮಂಜಮ್ಮ ಇನ್ನೂ ಡಬ್ಬಾ ಹೋಟ್ಲಲ್ಲೇ ಅದಾಳೆ?’ ಗುಡ್ಡೆ ನಕ್ಕ.

. ‘ನಿನ್ನಂಥ ಉದ್ರಿ ಗಿರಾಕಿಗಳಿರೋವಾಗ ನಾನು ಉದ್ಧಾರ ಆಗೋಕಾಗುತ್ತಾ?’ ಮಂಜಮ್ಮಗೆ ಸಿಟ್ಟು ಬಂತು.

. ‘ಶಾಂತಿ, ಶಾಂತಿ... ಬಿಗ್ ನ್ಯೂಸ್ ಏನ್ ಗೊತ್ತಾ? ಭಾರತದ ಜನಸಂಖ್ಯೆ ಈಗ 146 ಕೋಟಿಯಂತೆ. ಜಗತ್ತಲ್ಲಿ ನಾವೇ ನಂಬರ್ ಒನ್!’ ಎಂದ ತೆಪರೇಸಿ.

. ‘ಇದೊಂದ್ರಲ್ಲೇ ನಾವು ಜಗತ್ತನ್ನ ಮೀರಿಸಿರೋದು. ಅದಿರ್ಲಿ, ಕರ್ನಾಟಕದ ಜನಸಂಖ್ಯೆ ಎಷ್ಟಿರಬೋದು?’ ದುಬ್ಬೀರ ಕೇಳಿದ.

. ‘ಏಳೋ, ಎಂಟೋ ಕೋಟಿ ಇರಬೋದು...’

. ‘ಮತ್ತೆ ಅಷ್ಟು ಕೋಟಿ ಜನಾನ ತೊಂಬತ್ತು ದಿನದಲ್ಲಿ ಭೇಟಿಯಾಗಿ ಜಾತಿ ಜನಗಣತಿ ಮಾಡಾಕಾಗುತ್ತಾ?’ ಕೊಟ್ರೇಶಿ ಕೊಕ್ಕೆ.

. ‘ನೋಟು ಎಣಿಸೋ ಮಿಷನ್ ಥರ ಜನ ಎಣಿಸೋ ಮಿಷನ್ ಇದ್ದಿದ್ರೆ ಮಾಡಬೋದಿತ್ತೇ ನಪ...’ ಮಂಜಮ್ಮ ನಕ್ಕಳು.

. ‘ನಿನ್ತೆಲಿ, ಮನಸ್ಸು ಮಾಡಿದ್ರೆ ತೊಂಬತ್ತು ದಿನ ಯಾಕೆ, ಒಂಬತ್ತು ದಿನದಲ್ಲೇ ಫಟಾಫಟ್ ಅಂತ ಜಾತಿ ಜನಗಣತಿ ಮಾಡಿ ಮುಗಿಸ್ಬೋದು...’ ಗುಡ್ಡೆ ಆಕಾಶ ನೋಡಿದ.

. ‘ಒಂಬತ್ತು ದಿನದಲ್ಲಾ? ಹೆಂಗೆ?’

. ‘ಸಿಂಪಲ್... ಆಯಾ ಜಾತಿ ಮುಖಂಡರನ್ನ ಕರೆಸಿ ನಿಮ್ ಜಾತಿ ಜನ ಎಷ್ಟದಾರೆ ನೀವೇ ಲೆಕ್ಕ ಕೊಡಿ ಅಂದ್ರೆ ಮುಗೀತು. ಹೆಚ್ಚು, ಕಮ್ಮಿ ಅನ್ನೋ ಯಾವ ಆಕ್ಷೇಪಣೆನೂ ಬರಲ್ಲ...’

. ‘ಅವರು ಒಂದಕ್ಕೆರಡು ಲೆಕ್ಕ ಕೊಡ್ತಾರೆ, ಆಗ? ಜನಸಂಖ್ಯೆ 15 ಕೋಟಿ ಆದ್ರೆ?’

. ‘ಆಗ್ಲಿಬಿಡು, 146 ಕೋಟಿಗೆ ಇದ್ನೂ ಸೇರಿಸಿದ್ರಾತು...’

. ‘ಹಂಗಾದ್ರೆ ಜನಸಂಖ್ಯೆಯ ಸ್ತುತಿಗೀತೆಯೊಂದನ್ನು ರಚಿಸಿಕೊಳ್ಳೋಣ...’

. ‘ಅದನ್ನು ಹೀಗೆ ಹಾಡಬಹುದಲ್ಲವೇ... ಜನವೇ ಜನವೇ ಜನವೇ... ಎಲ್ಲೆಲ್ಲೂ ಜನ ಜನವೇ!’

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.