ಚುರುಮುರಿ: ಇಂಡಿಯಾ ವಿತ್ ತೆಪರೇಸಿ!

‘ಕಮಲೇ ಕಮಲೋತ್ಪತ್ತಿಹಿ, ಹಸ್ತ ಅಸ್ತವ್ಯಸ್ತಲೇ, ತೆನೆ ಭಾರವಾಯ್ತಲೇ ಪರಾಕ್!’ ಎಂದ ತೆಪರೇಸಿ.

. ‘ಏನ್ಲೆ ಇದು, ಕಾರಣಿಕನಾ? ಕಾರಣಿಕ ಅಂದ್ರೆ ಮುಂದೆ ಆಗೋದನ್ನ ಹೇಳೋದು. ನೀನು ಹಿಂದೆ ಆಗಿದ್ದನ್ನ ಹೇಳ್ತಿದೀಯ?’ ಗುಡ್ಡೆ ನಕ್ಕ.

. ‘ಅದಿರ್ಲಿ, ಕಮಲೇ ಕಮಲೋತ್ಪತ್ತಿ ಅಂದ್ರೆ ಏನ್ಲೆ ತೆಪರಾ?’ ದುಬ್ಬೀರ ಕೇಳಿದ.

. ‘ಅದಾ? ಯಡ್ಯೂರಪ್ಪನೋರ ಮುಖವೆಂಬ ಕಮಲದಲ್ಲಿ ಈಗ ಶಿರಾ, ರಾರಾ ಎಂಬ ಕಮಲಗಳು ಅರಳಿದಾವೆ ಅಂತ ಅರ್ಥ, ಗೊತ್ತಾತ?’ ತೆಪರೇಸಿ ಬಿಡಿಸಿ ಹೇಳಿದ.

. ‘ಓ, ಹಂಗಾ? ಮತ್ತೆ ಕಮಲೇ ಕಮಲೋತ್ಪತ್ತಿ ತರ ಹಸ್ತೇ ಹಸ್ತೋತ್ಪತ್ತಿ ಅಂತ ಇಲ್ವ?’

. ದುಬ್ಬೀರನ ಪ್ರಶ್ನೆಗೆ ನಕ್ಕ ತೆಪರೇಸಿ ‘ಹ್ಞೂನಪ, ಹಂಗೆ ಹಸ್ತಗಳು ಜಾಸ್ತಿ ಉತ್ಪತ್ತಿ ಆಗೇ ಹಸ್ತಕ್ಷೇಪಗಳು ಶುರುವಾಗಿ ಬೈ ಎಲೆಕ್ಷನ್ ಸೋಲೋಕೆ ಕಾರಣ’ ಎಂದ.

. ‘ಮತ್ತೆ ತೆನೆ?’

. ‘ತೆನೆ ಕತೆ ಬ್ಯಾಡ ಬಿಡಪ, ತೆನೆ ಹೊರೆಯಾಗಿ ಭಾರ ಆತು ಅನ್ಸುತ್ತೆ...’ ತೆಪರೇಸಿ ತಿಪ್ಪೆ ಸಾರಿಸಿದ.

. ‘ಯಾಕೋ ಎಲ್ಲ ಕಡಿ ಕಮಲದ ಹವಾ ಜೋರೈತಪ. ದೇಶದಾಗೆಲ್ಲ ಕಮಲ ಅರಳಿದ್ರೆ ಅಲ್ಲಿ ಅಮೆರಿಕದಲ್ಲೂ ‘ಕಮಲವ್ವ’ ಅರಳಿದ್ಲು ಅಲ್ವ?’ ಗುಡ್ಡೆ ಅಮೆರಿಕಕ್ಕೆ ಹಾರಿದ.

. ‘ಹೌದು, ನಾವೀಗ ಇಂಡಿಯಾ ವಿತ್ ಅಮೆರಿಕದ ಕಮಲವ್ವ, ಸರಿನಾ?’

. ‘ಅಲ್ಲೋ ದುಬ್ಬೀರ, ಇಂಡಿಯಾ ವಿತ್ ಕಮಲವ್ವ ಸರಿ, ಇಲ್ಯಾರೋ ಒಬ್ಬ ಪತ್ರಕರ್ತ ಇಡೀ ಇಂಡಿಯಾ ನನ್ನ ಜತಿ ಐತಿ ಅಂತ ಟೀವಿಲಿ ತೋರಿಸ್ತಿದ್ನಪ...’

. ‘ಹೌದಾ? ನಾನೂ ಹೇಳ್ತೀನಿ, ‘ಇಂಡಿಯಾ ವಿತ್ ತೆಪರೇಸಿ’ ಅಂತ. ಏನೀಗ?’ ತೆಪರೇಸಿ ಮಾತಿಗೆ ದುಬ್ಬೀರನಿಗೆ ನಗು ತಡೆಯೋಕೆ ಆಗಲಿಲ್ಲ.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.