ಅಮೆರಿಕದ ಮಧ್ಯಂತರ ಚುನಾವಣೆ ಏಳದ ನೀಲಿ ಅಲೆ, ಹೊಸ ಸವಾಲು

ಈ ಫಲಿತಾಂಶವನ್ನು ಹೇಗೆ ಅರ್ಥ ಮಾಡಿಕೊಳ್ಳಬೇಕು ಎಂಬ ಪ್ರಶ್ನೆಗೆ ಸರಳ ಉತ್ತರಗಳಿಲ್ಲ. 2016ರ ಅಧ್ಯಕ್ಷೀಯ ಚುನಾವಣೆಯಲ್ಲಿ ಕಾಣಿಸಿಕೊಂಡ ಎಲ್ಲವೂ ಈಗಲೂ ಮುಂದುವರಿದಿದೆ ಎಂದು ಖಡಾಖಂಡಿತವಾಗಿ ಹೇಳುವಂತಿಲ್ಲ. ಆದರೆ ಟ್ರಂಪ್ ಅವರ ಅತಿರೇಕವನ್ನು ಜನರು ಪೂರ್ಣವಾಗಿ ಅಲ್ಲಗಳೆದಿರುವ ಸೂಚನೆಗಳೂ ಕಾಣಿಸುತ್ತಿಲ್ಲ. ಆದರೆ ಟ್ರಂಪ್ ಅವರ ಏಕಪಕ್ಷೀಯ ನಿರ್ಧಾರಗಳಿಗೆ ತಡೆಯೊಡ್ಡುವುದಕ್ಕೆ ಬೇಕಿರುವ ಫಲಿತಾಂಶ ಇದು ಎಂದು ಹೇಳಬಹುದು. ಟ್ರಂಪ್ ಕೈಗೊಳ್ಳುವ ಎಲ್ಲಾ ಆಡಳಿತಾತ್ಮಕ ನಿರ್ಧಾರಗಳನ್ನೂ ಡೆಮಾಕ್ರಾಟರ ಪ್ರಾಬಲ್ಯವಿರುವ ಹೌಸ್ ಆಫ್ ರೆಪ್ರಸೆಂಟೆಟಿವ್ಸ್ ನಲ್ಲಿ ಪ್ರಶ್ನಿಸಬಹುದು. ತನಿಖೆಗಳಿಗೆ ಮುಂದಾಗಬಹುದು. ಆಂತರಿಕ ಆಡಳಿತಕ್ಕೆ, ಹಣಕಾಸಿಗೆ ಸಂಬಂಧಿಸಿದ ಎಲ್ಲಾ ನಿರ್ಧಾರಗಳನ್ನು ಕೈಗೊಳ್ಳುವಾಗ ಹೌಸ್ ಆಫ್ ರೆಪ್ರೆಸೆಂಟೆಟಿವ್ಸ್ ಅನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳುವುದು ಅನಿವಾರ್ಯವಾಗಿ ಪರಿಣಮಿಸಲಿದೆ. ಟ್ರಂಪ್ ನಿರ್ಧಾರಗಳು ಅತಿರೇಕದವು ಅನ್ನಿಸಿದರೂ ಅದು ಡಾಲರ್‌ ಅನ್ನು ಹೆಚ್ಚು ಗಟ್ಟಿಗೊಳಿಸುವಲ್ಲಿಯೂ ಕೆಲಸ ಮಾಡಿದೆ. ಡೆಮಾಕ್ರಾಟರ ಪ್ರಾಬಲ್ಯವಿರುವ ಹೌಸ್ ಆಫ್ ರೆಪ್ರೆಸೆಂಟೆಟಿವ್ಸ್, ಟ್ರಂಪ್ ವಿರುದ್ಧ ಕೆಲವು ತನಿಖೆಗಳನ್ನು ಕೈಗೆತ್ತಿಕೊಳ್ಳುವ ಸಾಧ್ಯತೆ ಇದೆಯಾದರೂ ಇದು ಅಧ್ಯಕ್ಷರನ್ನು ಮಹಾಭಿಯೋಗಕ್ಕೆ ಒಳಪಡಿಸುವಂಥ ಕಠಿಣ ನಿರ್ಧಾರಗಳಿಗೆ ಮುಂದಾಗಲಾರದು. ಇದೇ ವೇಳೆ ಟ್ರಂಪ್ ಅವರು ಅನುಸರಿಸುತ್ತಿರುವ ಆಕ್ರಮಣಕಾರಿ ವಿದೇಶಾಂಗ ನೀತಿ ಮತ್ತು ವಲಸೆಯ ವಿರುದ್ಧ ತಳೆಯುತ್ತಿರುವ ನಕಾರಾತ್ಮಕ ನಿಲುವುಗಳನ್ನು ಎದುರಿಸುವಲ್ಲಿ ಈ ಫಲಿತಾಂಶದಿಂದ ಹೆಚ್ಚೇನೂ ಪ್ರಯೋಜನವಾಗುವುದಿಲ್ಲ. 2020ರ ಅಧ್ಯಕ್ಷೀಯ ಚುನಾವಣೆಗೆ ಡೆಮಾಕ್ರಾಟರು ಆರಿಸಬೇಕಾದ ಅಭ್ಯರ್ಥಿಯ ಕುರಿತಾಗಿಯೂ ಈ ಫಲಿತಾಂಶ ಕೆಲವು ಸೂಚನೆಗಳನ್ನು ನೀಡುತ್ತಿದೆ. ಟ್ರಂಪ್‌ ನಿಲುವುಗಳಿಗೆ ಸಂಪೂರ್ಣ ವಿರುದ್ಧವಾಗಿರುವ ಅಭ್ಯರ್ಥಿಯಿಂದ ಹೆಚ್ಚೇನೂ ಉಪಯೋಗವಾಗಲಾರದು ಎಂಬುದು ಸದ್ಯದ ಫಲಿತಾಂಶದ ಸೂಚನೆ. ಟ್ರಂಪ್ ಬೆಂಬಲಿಗರನ್ನೂ ಒಲಿಸಿಕೊಳ್ಳಬಲ್ಲ ಡೆಮಾಕ್ರಾಟ್ ಅಭ್ಯರ್ಥಿಯ ಶೋಧನೆ ಅವರ ಎದುರು ಇರುವ ಸವಾಲು.