ಸಂಪಾದಕೀಯ| ಅಮೃತ್‌ಪಾಲ್‌ಗೆ ರಾಜಕಾರಣಿಗಳ ಬೆಂಬಲ ಸಿಕ್ಕಿದರೆ ದೇಶಕ್ಕೆ ಅಪಾಯ

ಪಂಜಾಬ್‌ ರಾಜ್ಯವು ಪಾಕಿಸ್ತಾನದ ಜೊತೆಗೆ ಗಡಿಯನ್ನು ಹಂಚಿಕೊಂಡಿದೆ. ಹಾಗಾಗಿ ಗಡಿಯಾಚೆಯಿಂದ ಉಗ್ರರು ಒಳನುಸುಳುವ ಅಪಾಯ ಇದೆ. ಅಮೃತ್‌ಪಾಲ್‌ ಮತ್ತು ಅವರ ಜೊತೆಗಾರರು ಪಾಕಿಸ್ತಾನದಲ್ಲಿ ಆಶ್ರಯ ಕೋರುವ ಸಾಧ್ಯತೆಯನ್ನೂ ತಳ್ಳಿಹಾಕುವಂತಿಲ್ಲ. ಹಾಗಾಗಿ, ಗಡಿಯಲ್ಲಿ ಹೆಚ್ಚಿನ ನಿಗಾ ಇರಿಸುವುದು ಅಗತ್ಯ. ಇದಲ್ಲದೆ, ಪಾಕಿಸ್ತಾನದಿಂದ ಆಯುಧ ಬರುವುದನ್ನೂ ತಡೆಯಬೇಕಿದೆ. ಭಾರಿ ಸಂಖ್ಯೆಯ ಆಯುಧಗಳು ಮತ್ತು ಮಾದಕ ಪದಾರ್ಥಗಳನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ ಎನ್ನಲಾಗಿದೆ. ಪಾಕಿಸ್ತಾನ ಮತ್ತು ಇತರ ದೇಶಗಳಲ್ಲಿ ಇರುವ ಖಾಲಿಸ್ತಾನ ಬೆಂಬಲಿಗರು ಶಸ್ತ್ರಾಸ್ತ್ರ–ಮಾದಕ ಪದಾರ್ಥ ವ್ಯಾಪಾರ ಜಾಲವನ್ನು ಬಳಸಿಕೊಂಡು ಉಗ್ರವಾದಕ್ಕೆ ಬೆಂಬಲ ನೀಡುತ್ತಿದ್ದಾರೆ ಎಂಬುದನ್ನೂ ತಳ್ಳಿಹಾಕಲಾಗದು. ಕೆನಡಾ, ಬ್ರಿಟನ್‌, ಆಸ್ಟ್ರೇಲಿಯಾದಂತಹ ದೇಶಗಳಲ್ಲಿ ಇರುವ ಸಿಖ್‌ ಕಾರ್ಯಕರ್ತರು ಖಾಲಿಸ್ತಾನ ಪರಿಕಲ್ಪನೆಯನ್ನುಈತನಕ ಜೀವಂತವಾಗಿ ಇರಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಆಯಾ ದೇಶಗಳ ಸರ್ಕಾರಗಳು ಕೊಟ್ಟ ಸ್ವಾತಂತ್ರ್ಯದಿಂದಾಗಿ ಭಾರತ ಮೂಲದ ಈ ಜನರಿಗೆ ಖಾಲಿಸ್ತಾನ ಪರಿಕಲ್ಪನೆಯನ್ನು ಜೀವಂತವಾಗಿ ಇರಿಸಲು ಸಾಧ್ಯವಾಗಿದೆ. ಹಾಗಿದ್ದರೂ ಖಾಲಿಸ್ತಾನ ಪರಿಕಲ್ಪನೆಯನ್ನು ಒಪ‍್ಪುವ ಜನರು ಪಂಜಾಬ್‌ನಲ್ಲಿ ಬಹಳ ವಿರಳ. ಖಾಲಿಸ್ತಾನದ ಹೆಸರಿನಲ್ಲಿ ಪಂಜಾಬ್‌ನಲ್ಲಿ ಹಿಂಸಾಚಾರ ನಡೆಸುತ್ತಿರುವವರು ಮುಖ್ಯವಾಗಿ ಅದರ ಮೂಲಕ ತಮ್ಮ ಅಪರಾಧ ಚಟುವಟಿಕೆಗಳನ್ನು ವಿಸ್ತರಿಸಿಕೊಳ್ಳುತ್ತಿದ್ದಾರೆ.

ಕಾಂಗ್ರೆಸ್‌ ಮತ್ತು ಅಕಾಲಿಗಳ ನಡುವಣ ತೀವ್ರ ಸ್ಪರ್ಧೆಯು 1980ರ ದಶಕದಲ್ಲಿ ಬಿಂದ್ರನ್‌ವಾಲೆಯು ಮುಂಚೂಣಿಗೆ ಬರಲು ನೆರವಾಯಿತು. ಇತಿಹಾಸ ಮರುಕಳಿಸುವುದನ್ನು ನಾವು ನೋಡಬೇಕಾದೀತೇ? ಕೇಂದ್ರದಲ್ಲಿ ಬಿಜೆಪಿ ನೇತೃತ್ವದ ಸರ್ಕಾರ ಇದೆ. ಪಂಜಾಬ್‌ನಲ್ಲಿ ಎಎಪಿ ನೇತೃತ್ವದ ಸರ್ಕಾರ ಇದೆ. ರಾಜಕಾರಣಿಗಳು ಮತ್ತು ಗುಪ್ತಚರ ಸಂಸ್ಥೆಯಲ್ಲಿ ಇರುವ ಕೆಲವರು ಈಗಿನ ಪರಿಸ್ಥಿತಿಯನ್ನು ರಾಜಕೀಯ ಲಾಭ ಪಡೆಯಲು ಬಳಸಿಕೊಳ್ಳುವ ತುಡಿತಕ್ಕೆ ಒಳಗಾಗಬಹುದು. ಹಾಗೆ ಆದರೆ, ಅದರಿಂದ ಅಮೃತ್‌ಪಾಲ್‌ ಮತ್ತು ಅವರ ಬೆಂಬಲಿಗರಿಗೆ ಅನುಕೂಲ ಆಗಬಹುದೇ ವಿನಾ ದೇಶಕ್ಕೆ ಯಾವುದೇ ಪ್ರಯೋಜನ ದೊರೆಯುವುದಿಲ್ಲ.