ಸಂಪಾದಕೀಯ: ಅಂಗಾಂಗ ದಾನಿಗಳಿಗೆ ಗೌರವ, ಸರ್ಕಾರದ ನಡೆ ಸ್ವಾಗತಾರ್ಹ

ಅಂಗಾಂಗ ದಾನಿಯ ಅಂತ್ಯಕ್ರಿಯೆಯನ್ನು ಸರ್ಕಾರಿ ಗೌರವದೊಂದಿಗೆ ಮಾಡಲಾಗುವುದು ಎಂದು ತಮಿಳುನಾಡಿನ ಮುಖ್ಯಮಂತ್ರಿ ಎಂ.ಕೆ.ಸ್ಟಾಲಿನ್‌ ಇತ್ತೀಚೆಗಷ್ಟೇ ಪ್ರಕಟಿಸಿದ್ದಾರೆ. ತಮಗೆ ಪ್ರೀತಿಪಾತ್ರರಾದ ವ್ಯಕ್ತಿಗಳ ಮೆದುಳು ನಿಷ್ಕ್ರಿಯವಾದಾಗ, ಅವರ ಅಂಗಾಂಗಗಳನ್ನು ತಮ್ಮ ನೋವು–ಸಂಕಟವನ್ನು ಮರೆತು ದಾನ ಮಾಡಿದ ಸಂಬಂಧಿಕರನ್ನು ಸಮಾಜ ಕೂಡ ಗೌರವದಿಂದ ಕಂಡಿದೆ. 2008ರಷ್ಟು ಹಿಂದೆಯೇ ದೇಶದಲ್ಲಿ ಮೊದಲ ಬಾರಿಗೆ ಅಂಗಾಂಗ ಕಸಿ ಪ್ರಾಧಿಕಾರ ರಚಿಸಿ ಮಾದರಿ ಹೆಜ್ಜೆ ಇರಿಸಿದ್ದ ತಮಿಳುನಾಡು, ಅಂಗಾಂಗ ದಾನದ ಅರಿವು ಮೂಡಿಸುವಲ್ಲಿಯೂ ಮುಂಚೂಣಿಯಲ್ಲಿ ನಿಂತಿದೆ.

ತಮಿಳುನಾಡಿಗೆ ಅಧ್ಯಯನ ತಂಡವೊಂದನ್ನು ಕಳುಹಿಸಿ, ರಾಜ್ಯದಲ್ಲೂ ಅದೇ ಮಾದರಿಯ ನೀತಿ ನಿರೂಪಣೆಗೆ ಕ್ರಮ ಜರುಗಿಸುವುದಾಗಿ ರಾಜ್ಯ ಆರೋಗ್ಯ ಸಚಿವ ದಿನೇಶ್‌ ಗುಂಡೂರಾವ್‌ ಹೇಳಿದ್ದಾರೆ. ಅಂಗಾಂಗ ದಾನಿಗಳು ಮತ್ತು ಅವರ ಸಂಬಂಧಿಕರನ್ನು ಗೌರವಿಸುವ ಜತೆಗೆ, ಅಂಗಾಂಗ ದಾನದ ಕುರಿತು ಇರುವ ಮೂಢನಂಬಿಕೆಗಳನ್ನು ಹೋಗಲಾಡಿಸಲು ಧಾರ್ಮಿಕ ಮುಖಂಡರ ಮೂಲಕವೇ ಜಾಗೃತಿ ಮೂಡಿಸುವ ಮಾತುಗಳನ್ನೂ ಅವರು ಆಡಿದ್ದಾರೆ. ಅಂಗಾಂಗ ದಾನದ ಕುರಿತು ಜಾಗೃತಿ ಅಭಿಯಾನ ಆರಂಭಿಸುವುದಷ್ಟೇ ಅಲ್ಲ ಸರ್ಕಾರಿ ಆಸ್ಪತ್ರೆಗಳಲ್ಲಿ ಮೂಲಸೌಕರ್ಯ ಹೆಚ್ಚಿಸುವ ಕೆಲಸವನ್ನೂ ಮಾಡಲಾಗುವುದು, ಅಂಗ ಕಸಿ ಅಗತ್ಯ ಇಲ್ಲದಂತೆ ಆರೋಗ್ಯಕರ ಜೀವನವಿಧಾನ ರೂಢಿಸಿಕೊಳ್ಳುವಂತೆಯೂ ಅರಿವು ಮೂಡಿಸಲಾಗುವುದು ಎಂದು ಸಚಿವರು ಹೇಳಿದ್ದಾರೆ. ಆದರೆ, ಯೋಚನೆಗಳನ್ನು ಹಂಚಿಕೊಂಡಷ್ಟು ಯೋಜನೆಗಳನ್ನು ಅನುಷ್ಠಾನ ಮಾಡುವುದು ಸುಲಭವಲ್ಲ. ಆರೋಗ್ಯ ಇಲಾಖೆಯು ಅಂಗಾಂಗ ದಾನದ ಬಗ್ಗೆ ಜನಜಾಗೃತಿ ಮೂಡಿಸುವ ಕಾರ್ಯವನ್ನು ಗಂಭೀರವಾಗಿ ಪರಿಗಣಿಸಬೇಕು. ಅದೊಂದು ಸಹಜ ನಡೆ ಎನಿಸುವಷ್ಟರ ಮಟ್ಟಿಗೆ ಅಂಗಾಂಗ ದಾನದ ಪ್ರಮಾಣ ಹೆಚ್ಚುವಂತೆ ಆಗಬೇಕು. ಈ ಕುರಿತ ಎಲ್ಲ ಅಡೆತಡೆ ನಿವಾರಣೆಗೆ ಸರ್ಕಾರ ಪ್ರಬಲ ಇಚ್ಛಾಶಕ್ತಿ ಪ್ರದರ್ಶಿಸಬೇಕು. ಆಗಬೇಕಾಗಿರುವ ಕೆಲಸಗಳ ಕುರಿತು ಮಾರ್ಗದರ್ಶನ ಮಾಡಲು ತಜ್ಞರ ಸಮಿತಿಯೊಂದನ್ನು ರಚಿಸಬೇಕು. ದಾನಿಗಳನ್ನು ಗೌರವಿಸುವ ಚಿಂತನೆ ಒಳ್ಳೆಯದು. ಆದರೆ ಅದರ ಜೊತೆಗೆ ಅಂಗಾಂಗ ದಾನಕ್ಕೆ ಪೂರಕವಾದ ಕ್ರಮಗಳ ಪರಿಣಾಮಕಾರಿ ಜಾರಿಯೂ ಅತ್ಯವಶ್ಯ ಎನ್ನುವುದನ್ನು ಕೂಡ ಸರ್ಕಾರ ಮರೆಯಬಾರದು.