ಲೈಂಗಿಕ ಸಂತ್ರಸ್ತರ ಮಕ್ಕಳಿಗೆ ಮೀಸಲಾತಿ ಸ್ವಾಗತಾರ್ಹ

ಲೈಂಗಿಕ ಶೋಷಿತರನ್ನು ಸಮಾಜದ ಮುಖ್ಯವಾಹಿನಿಗೆ ತರುವ ಉದ್ದೇಶದ ಹಲವು ಸರ್ಕಾರಿ ಕಾರ್ಯಕ್ರಮಗಳು ಈಗಾಗಲೇ ಜಾರಿಯಲ್ಲಿವೆ. ಆದರೆ, ಸಂತ್ರಸ್ತ ಮಹಿಳೆಯರಿಗೆ ಅನುಕೂಲ ಕಲ್ಪಿಸುವ ಹೆಸರಿನಲ್ಲಿ ಈ ಯೋಜನೆಗಳು ಅಪಬಳಕೆಯಾಗಿರುವುದೇ ಹೆಚ್ಚು. ಅಧಿಕಾರಿಗಳ ಲಂಚಗುಳಿತನ ಮತ್ತು ಸೋಗಲಾಡಿತನದಿಂದಾಗಿ ಸಂತ್ರಸ್ತ ಹೆಣ್ಣುಮಕ್ಕಳಿಗೆ ಅನುಕಂಪದ ಹೊರತು ಜೀವನವನ್ನು ಕಟ್ಟಿಕೊಳ್ಳಲಿಕ್ಕೆ ಅಗತ್ಯವಾದ ನೆರವೇನೂ ದೊರೆಯುತ್ತಿಲ್ಲ. ಲೈಂಗಿಕ ದೌರ್ಜನ್ಯಕ್ಕೆ ಒಳಗಾದ ಹೆಣ್ಣುಮಕ್ಕಳಿಗೆ ನಿವೇಶನ ನೀಡುವ, ಮನೆ ಕಟ್ಟಿಕೊಳ್ಳಲು ಆರ್ಥಿಕ ನೆರವು ನೀಡುವ ಕಾರ್ಯಕ್ರಮಗಳಿವೆ. ನೆರವು ಕೇಳಿಕೊಂಡು ಬರುವ ಮಹಿಳೆಯರನ್ನು ‘ಯಾವ ದಾಖಲೆಯನ್ನೂ ಕೇಳಬಾರದು, ಅವರ ಗೋಪ್ಯತೆ ಕಾಪಾಡಬೇಕು’ ಎಂದೂ ಕಾನೂನು ಹೇಳುತ್ತದೆ. ಆದರೆ, ಸಹಾಯ ಕೇಳಿಕೊಂಡು ಬರುವವರನ್ನು ಮುಜುಗರಕ್ಕೆ ಸಿಕ್ಕಿಸಿ ಅವರು ಯೋಜನೆಯ ಪರಿಧಿಯಿಂದ ದೂರವೇ ಉಳಿಯುವಂತೆ ಅಧಿಕಾರಿಗಳು ಮಾಡಿದ್ದಾರೆ. ಸರ್ಕಾರದ ಯೋಜನೆಗಳು ಅಸಹಾಯಕರ ಏಳಿಗೆಗೆ, ಆತ್ಮವಿಶ್ವಾಸಕ್ಕೆ ಕಾರಣವಾಗಬೇಕು. ಆದರೆ, ಅಧಿಕಾರಿಗಳ ಕರ್ತವ್ಯಲೋಪದಿಂದಾಗಿ ಯೋಜನೆಗಳ ಮೂಲ ಉದ್ದೇಶವೇ ಈಡೇರುತ್ತಿಲ್ಲ. ಅನೇಕ ಯೋಜನೆಗಳ ಜಾರಿ ನಂತರವೂ ದಮನಿತ ಹೆಣ್ಣುಮಕ್ಕಳು ಸಮಾಜದ ಕಡೆಗಣ್ಣಿಗೆ ಒಳಗಾಗಿಯೇ ಬದುಕು ಸವೆಸುವಂತಾಗಿದೆ. ಇಂಥ ಮಹಿಳೆಯರ ಮಕ್ಕಳಾದರೂ ಅರಿವು ಹಾಗೂ ಆತ್ಮವಿಶ್ವಾಸವನ್ನು ರೂಪಿಸಿಕೊಂಡು ಉತ್ತಮ ಬದುಕು ಕಟ್ಟಿಕೊಳ್ಳುವಂತಾಗಲು ಉನ್ನತ ಶಿಕ್ಷಣ ಅತ್ಯಗತ್ಯ. ಸಂತ್ರಸ್ತ ಸಮುದಾಯವನ್ನು ನೋವು, ಅವಮಾನ, ಸಂಕಟಗಳಿಂದ ಹೊರತರುವ ಔಷಧೀಯ ಗುಣ ಶಿಕ್ಷಣದಲ್ಲಿದೆ. ಉಳಿದ ಯೋಜನೆಗಳಂತೆ ಶೈಕ್ಷಣಿಕ ಮೀಸಲಾತಿ ಯೋಜನೆ ಅಪಬಳಕೆಯಾಗದಂತೆ ನೋಡಿಕೊಳ್ಳುವ ಜವಾಬ್ದಾರಿ ಸರ್ಕಾರದ ಮೇಲಿದೆ. ಸಾಮಾಜಿಕ ನ್ಯಾಯದ ದೃಷ್ಟಿಯಿಂದ ಈ ಮೀಸಲಾತಿ ಪರಿಕಲ್ಪನೆ ಹಂತಹಂತವಾಗಿ ಐಟಿಐ, ಡಿಪ್ಲೊಮಾ, ವೈದ್ಯಕೀಯ ಹಾಗೂ ಎಲ್ಲ ವೃತ್ತಿಪರ ಕೋರ್ಸ್‌ಗಳಿಗೆ ವಿಸ್ತರಣೆಯಾಗುವುದು ಒಳ್ಳೆಯದು. ಲೈಂಗಿಕ ಸಂತ್ರಸ್ತೆಯರ ಮಕ್ಕಳ ಜೊತೆಗೆ ಹುತಾತ್ಮ ಯೋಧರ ಮಕ್ಕಳಿಗೆ ಹಾಗೂ ಸಾಲಬಾಧೆಯಿಂದ ಜೀವ ಕಳೆದುಕೊಂಡ ರೈತರ ಮಕ್ಕಳಿಗೆ ಉಚಿತ ಶಿಕ್ಷಣ ನೀಡುವ ಯೋಜನೆ ಮೈಸೂರು ವಿಶ್ವವಿದ್ಯಾಲಯದಲ್ಲಿದೆ. ಆಸರೆ ಕಳೆದುಕೊಂಡವರಿಗೆ ಭರವಸೆ ತುಂಬುವ ಈ ಯೋಜನೆಯನ್ನೂ ಉಳಿದ ವಿಶ್ವವಿದ್ಯಾಲಯಗಳಲ್ಲಿ ಅನುಷ್ಠಾನಕ್ಕೆ ತರುವ ಕುರಿತು ಚಿಂತನೆ ನಡೆಸಬಹುದು.