ಸಂಪಾದಕೀಯ| ದೂರಸಂಪರ್ಕ ವಲಯಕ್ಕೆ ನೆರವು: ಅನಿವಾರ್ಯ, ಸ್ವಾಗತಾರ್ಹ

ಎಜಿಆರ್‌ ವಿಚಾರದಲ್ಲಿ ಈಗ ಕೈಗೊಂಡಿರುವ ತೀರ್ಮಾನದ ಕಾರಣದಿಂದಾಗಿ, ಕೇಂದ್ರದ ಪಾಲಿಗೆ ತಕ್ಷಣಕ್ಕೆ ಬರಬಹುದಾಗಿದ್ದ ವರಮಾನವು ಕಡಿಮೆ ಆಗುವ ಸಾಧ್ಯತೆ ಇದೆ. ಆದರೆ ಎಜಿಆರ್‌ ವ್ಯಾಖ್ಯಾನ ಬದಲಿಸದೆ, ಹೆಚ್ಚುವರಿ ಕಾಲಾವಕಾಶವನ್ನೂ ಕೊಡದೆ ಇದ್ದರೆ, ಹಿಂಬಾಕಿ ಹಣ ಪಾವತಿ ಮಾಡಲಾಗದೆ ಕಂಪನಿಗಳು ಕುಸಿದುಬೀಳುವ ಅಪಾಯವೂ ಇತ್ತು. ಹೀಗಾಗಿ, ಈಗ ಕೇಂದ್ರ ಕೈಗೊಂಡಿರುವ ತೀರ್ಮಾನವು ಅನಿವಾರ್ಯವೂ ಹೌದು ಸ್ವಾಗತಾರ್ಹವೂ ಹೌದು. ನಾಲ್ಕು ವರ್ಷಗಳ ಕಾಲಾವಕಾಶ ಪೂರ್ಣಗೊಂಡ ನಂತರದಲ್ಲಿಯೂ ಎಜಿಆರ್ ಬಾಕಿ ಉಳಿದುಕೊಂಡಿದ್ದರೆ, ಬಾಕಿ ಮೊತ್ತವನ್ನು ಷೇರುಗಳಾಗಿ ಪರಿವರ್ತನೆ ಮಾಡಿಕೊಳ್ಳುವ ಬಗ್ಗೆ ಸರ್ಕಾರ ಪರಿಶೀಲನೆ ನಡೆಸಬಹುದು. ದೇಶದ ದೂರಸಂಪರ್ಕ ವಲಯದಲ್ಲಿ ಶೇಕಡ 100ರಷ್ಟು ವಿದೇಶಿ ನೇರ ಬಂಡವಾಳ ಹೂಡಿಕೆಗೆ (ಎಫ್‌ಡಿಐ) ಕೂಡ ಕೇಂದ್ರವು ಒಪ್ಪಿಗೆ ನೀಡಿದೆ. ಈ ಹೂಡಿಕೆಗೆ ಕಂಪನಿಗಳು ಪೂರ್ವಾನುಮತಿ ಪಡೆಯುವ ಅಗತ್ಯ ಇರುವುದಿಲ್ಲ. ಇದರಿಂದಾಗಿ ಕಂಪನಿಗಳಿಗೆ ಹೊಸ ಹೂಡಿಕೆದಾರರನ್ನು ಆಕರ್ಷಿಸಲು ಸಾಧ್ಯವಾಗುತ್ತದೆ. ದೂರಸಂಪರ್ಕ ಉದ್ಯಮ ವಲಯಕ್ಕೆ ನೆರವಾಗುವ ಗಂಭೀರ ಪ್ರಯತ್ನ ತನ್ನದು ಎಂಬುದನ್ನು ಕೇಂದ್ರವು ಈ ಎಲ್ಲ ಕ್ರಮಗಳ ಮೂಲಕ ಸ್ಪಷ್ಟವಾಗಿ ತೋರಿಸಿದೆ. ಈ ವಲಯಕ್ಕೆ ಬ್ಯಾಂಕ್‌ಗಳಿಂದ ಕೋಟ್ಯಂತರ ರೂಪಾಯಿ ಸಾಲ ನೀಡಲಾಗಿದೆ. ಕಂಪನಿಗಳು ನಷ್ಟದ ಸುಳಿಗೆ ಸಿಲುಕಿದಾಗ ಅದರ ಪರಿಣಾಮವು ಬ್ಯಾಂಕ್‌ಗಳ ಮೇಲೆ ನೇರವಾಗಿ ಆಗುತ್ತದೆ. ಕೇಂದ್ರದ ನೆರವು ಪರೋಕ್ಷವಾಗಿ ದೇಶದ ಹಲವು ಬ್ಯಾಂಕ್‌ಗಳಿಗೆ ಸಮಾಧಾನ ತಂದಿರಬಹುದು. ಆ ಬ್ಯಾಂಕ್‌ಗಳು ಹಾಗೂ ದೂರಸಂಪರ್ಕ ಕಂಪನಿಗಳಲ್ಲಿನ ಹೂಡಿಕೆದಾರರಲ್ಲಿಯೂ ಸಮಾಧಾನ ಮೂಡಿಸಿರಬಹುದು.

ದೂರಸಂಪರ್ಕ ಉದ್ಯಮ ವಲಯವು ಇಂದು ಸರ್ಕಾರದ ನೆರವು ಬೇಕೇಬೇಕು ಎಂಬ ಸ್ಥಿತಿಗೆ ತಲುಪಿದ್ದು ಏಕೆ ಎಂಬುದರ ಬಗ್ಗೆಯೂ ಈ ಸಂದರ್ಭದಲ್ಲಿ ಅವಲೋಕನ ನಡೆಸಬಹುದು. ಅತಿಯಾದ ದರ ಸಮರದ ಕಾರಣದಿಂದಾಗಿ ಕಂಪನಿಗಳು ಇಂದು ನಷ್ಟ ಅನುಭವಿಸುತ್ತಿವೆ ಅಥವಾ ಬಹಳ ಕಡಿಮೆ ಪ್ರಮಾಣದ ಲಾಭ ಕಾಣುತ್ತಿವೆ. ದರ ಸಮರದಿಂದಾಗಿ ಆರಂಭದಲ್ಲಿ ಗ್ರಾಹಕರಿಗೆ ಒಳ್ಳೆಯದಾಗುವಂತೆ ಕಂಡರೂ, ದೀರ್ಘಾವಧಿಯಲ್ಲಿ ನಷ್ಟವೇ ಹೆಚ್ಚು. ಕಂಪನಿಗಳಿಗೆ ಹೊಸ ತಂತ್ರಜ್ಞಾನದ ಮೇಲೆ ಹೆಚ್ಚುವರಿ ಹೂಡಿಕೆ ಮಾಡಲು ಆಗುವುದಿಲ್ಲ, ಗ್ರಾಹಕರಿಗೆ ಹೊಸ ತಂತ್ರಜ್ಞಾನದ ಪ್ರಯೋಜನ ಸಿಗುವುದಿಲ್ಲ. ಕೋವಿಡ್‌ ಕಾರಣದಿಂದಾಗಿ ಕೆಲಸ ಮಾಡುವ, ಶಿಕ್ಷಣ ಪಡೆಯುವ ಬಗೆ ಬದಲಾಗಿದೆ. ಹಳ್ಳಿಗಳ ಲ್ಲಿಯೂ ಅತಿವೇಗದ ಇಂಟರ್ನೆಟ್ ಸಂಪರ್ಕ ಅಗತ್ಯವಿದೆ. ಆದರೆ ಅದಕ್ಕೆ ಅಗತ್ಯವಿರುವ ಮೂಲಸೌಕರ್ಯ ವನ್ನು ತ್ವರಿತಗತಿಯಲ್ಲಿ ಅಳವಡಿಸುವ ಸಾಮರ್ಥ್ಯ ಎಲ್ಲ ಕಂಪನಿಗಳಿಗೂ ಇದೆ ಎನ್ನಲಾಗದು. ಈ ಸ್ಥಿತಿಗೆ ಕಾರಣ ದರಸಮರ ಹಾಗೂ ಅದರಿಂದ ಸೃಷ್ಟಿಯಾದ ಹಣಕಾಸಿನ ಸಂಪನ್ಮೂಲದ ಕೊರತೆ. ಪ್ರತೀ ಗ್ರಾಹಕನಿಂದ ಬರುವ ಆದಾಯ (ಎಆರ್‌ಪಿಯು) ಕಡಿಮೆ ಇದೆ ಎಂದು ಕೆಲವು ಕಂಪನಿಗಳು ಹೇಳುತ್ತಿವೆ ಯಾದರೂ, ದರ ಹೆಚ್ಚಳದ ವಿಚಾರದಲ್ಲಿ ಧೈರ್ಯವಾಗಿ ಮುಂದಡಿ ಇರಿಸುತ್ತಿಲ್ಲ. ಕನಿಷ್ಠ ಸೇವಾ ಶುಲ್ಕವನ್ನು ನಿಗದಿ ಮಾಡಬೇಕು ಎಂದು ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರವನ್ನು (ಟ್ರಾಯ್) ಒತ್ತಾಯಿಸುವ ಬದಲು ಕಂಪನಿಗಳು ತಾವೇ ಮುಂದಾಗಿ ದರ ಸಮರಕ್ಕೆ ಅಂತ್ಯ ಹೇಳಬೇಕು. ಸೇವಾ ಗುಣಮಟ್ಟದ ಮೂಲಕ ಪೈಪೋಟಿ ನೀಡಬೇಕು; ಉಚಿತ ಕೊಡುಗೆಗಳ ಮೂಲಕ ಅಲ್ಲ. ಹಾಗೆ ಆದಾಗ ಮಾತ್ರ ಉದ್ದಿಮೆಯೂ ಬೆಳೆಯುತ್ತದೆ, ಜನರಿಗೆ ಒಳ್ಳೆಯ ಸೇವೆಗಳೂ ಸಿಗುತ್ತವೆ.