ಸಂಪಾದಕೀಯ: ಪ್ರಜಾತಂತ್ರದ ಮೌಲ್ಯವೇ ಹರಾಜಿಗೆ, ಚುನಾವಣೆ ಆಯೋಗ ದಂಡ ಬೀಸಲಿ

ಹಾಗೆ ನೋಡಿದರೆ, ರಾಜ್ಯ ಸರ್ಕಾರಕ್ಕೆ ಈಗ ಗ್ರಾಮ ಪಂಚಾಯಿತಿ ಚುನಾವಣೆಯನ್ನು ನಡೆಸುವ ಮನಸ್ಸೇ ಇರಲಿಲ್ಲ. ಕೋವಿಡ್‌–19 ಕಾರಣದಿಂದ ಚುನಾವಣೆ ನಡೆಸುವುದು ಸಾಧ್ಯವಿಲ್ಲ ಎನ್ನುವುದು ಅದರ ನಿಲುವಾಗಿತ್ತು. ಹೈಕೋರ್ಟ್‌ನ ಮಧ್ಯಪ್ರವೇಶದಿಂದಾಗಿ ರಾಜ್ಯ ಚುನಾವಣಾ ಆಯೋಗವು ವೇಳಾಪಟ್ಟಿ ಪ್ರಕಟಿಸಿದಾಗ ಗ್ರಾಮಗಳಲ್ಲಿ ಪ್ರಜಾತಂತ್ರ ಹಬ್ಬ ಗರಿಗೆದರಿತು. ಆದರೆ, ರಾಜ್ಯದ ಹಲವೆಡೆ ನಡೆದಿರುವ ಸದಸ್ಯ ಸ್ಥಾನದ ಹರಾಜು ಪ್ರಯತ್ನವು ಜನತಂತ್ರದ ಆಶಯಕ್ಕೆ ಮಸಿ ಬಳಿಯುವಂತಹುದು. ಗ್ರಾಮ ಪಂಚಾಯಿತಿಗಳ ಆಡಳಿತವನ್ನು ದುರ್ಬಲಗೊಳಿಸುವ ಹುನ್ನಾರವಿದು. ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳಿಂದ ಗ್ರಾಮ ಪಂಚಾಯಿತಿಗಳಿಗೆ ನೇರವಾಗಿ ದೊಡ್ಡ ಮೊತ್ತದ ಅನುದಾನ ಹರಿದು ಬರುತ್ತದೆ. ಯೋಜನೆ, ಬಜೆಟ್‌ ಮತ್ತಿತರ ವಿಷಯಗಳಲ್ಲಿ ಗ್ರಾಮಸಭೆಗಳು ತೀರ್ಮಾನ ತೆಗೆದುಕೊಂಡರೆ, ಅಂತಹ ನಿರ್ಣಯಗಳನ್ನು ಅನುಷ್ಠಾನಗೊಳಿಸುವ ಹೊಣೆ ಚುನಾಯಿತ ಸದಸ್ಯರದ್ದಾಗಿದೆ. ಈಗಾಗಲೇ ಗ್ರಾಮಸಭೆಗಳನ್ನು ‘ನಾಮಕಾವಾಸ್ತೆ’ ಮಾಡಿರುವ ರಾಜಕಾರಣಿಗಳು, ಗ್ರಾಮಗಳ ಮೇಲೆ ಪರೋಕ್ಷ ಹಿಡಿತ ಸಾಧಿಸಲು ಸದಸ್ಯತ್ವವನ್ನು ದುಡ್ಡು ಕೊಟ್ಟು ತಮ್ಮ ಹಿಂಬಾಲಕರಿಗಾಗಿ ಖರೀದಿಸುತ್ತಿದ್ದಾರೆ ಎಂಬ ದೂರು ಇದೆ. ಆ ದೂರು ನಿಜವಾಗಿದ್ದರೆ ರಾಜಕಾರಣಿಗಳ ಇಂತಹ ನಡೆ ಅಕ್ಷಮ್ಯ. ಹೀಗೆ ‘ಬಂಡವಾಳ’ ಹೂಡಿದವರು ಆ ಹೂಡಿಕೆಯಿಂದ ಲಾಭ ಮಾಡಿಕೊಳ್ಳಲು ಪ್ರಯತ್ನಿಸುವುದಿಲ್ಲವೇ? ಭ್ರಷ್ಟಾಚಾರದ ದಾರಿ ತೆರೆದುಕೊಳ್ಳುವುದೇ ಹೀಗೆ. ಪ್ರಜಾತಂತ್ರ ವ್ಯವಸ್ಥೆ ಮೇಲೆ ರಾಜ್ಯ ಸರ್ಕಾರಕ್ಕೆ ಸ್ವಲ್ಪವಾದರೂ ನಂಬಿಕೆಯಿದ್ದರೆ ಸದಸ್ಯತ್ವವನ್ನು ಹರಾಜಿಗಿಡುವ ಪ್ರಯತ್ನಗಳಿಗೆ ತಡೆಹಾಕಲು ತಕ್ಷಣ ಕಠಿಣ ಕ್ರಮ ಕೈಗೊಳ್ಳಬೇಕು. ಸದಸ್ಯತ್ವವನ್ನು ಹರಾಜಿನಲ್ಲಿ ಖರೀದಿಸಿರುವುದು ಸಾಬೀತಾದರೆ ಅಂಥವರ ಸದಸ್ಯತ್ವವನ್ನು ಚುನಾವಣಾ ಆಯೋಗವು ಅನೂರ್ಜಿತಗೊಳಿಸಬೇಕು. ನ್ಯಾಯಸಮ್ಮತವಾಗಿ ಚುನಾವಣೆ ನಡೆಯುವಂತೆ ನೋಡಿಕೊಳ್ಳುವ ಹೊಣೆ ಸರ್ಕಾರ ಹಾಗೂ ಚುನಾವಣಾ ಆಯೋಗ ಎರಡರ ಮೇಲೂ ಇದೆ. ಹಾಗೆಯೇ ಪಕ್ಷ ರಾಜಕೀಯದ ರಾಡಿ ಈ ಚುನಾವಣೆಯಲ್ಲಿ ಹರಿಯದಂತೆ ಎಚ್ಚರ ವಹಿಸುವ ಜವಾಬ್ದಾರಿ ಎಲ್ಲ ರಾಜಕೀಯ ಪಕ್ಷಗಳ ಮೇಲಿದೆ. ಇಂತಹ ಹೊಣೆಗಾರಿಕೆಯಿಂದ ನುಣುಚಿಕೊಳ್ಳುವವರನ್ನು ಪ್ರಜಾಪ್ರಭುತ್ವದ ಕತ್ತು ಹಿಸುಕುವವರು ಎಂದೇ ಅರ್ಥೈಸಬೇಕಾಗುತ್ತದೆ.