ಮಂಗಳವಾರ 10–3–1970

ಖಾಸಗಿಯವರಿಗೆ ಮಂಡ್ಯ ಕಾಗದ ಕಾರ್ಖಾನೆ: ಪರಿಶೀಲನೆಯಲ್ಲಿ 
ಬೆಂಗಳೂರು, ಮಾರ್ಚ್‌ 9: ಆರಂಭವಾದ ಅಂದಿನಿಂದ ನಷ್ಟದಲ್ಲಿ ನಡೆಯುತ್ತಿರುವ ಮಂಡ್ಯ ನ್ಯಾಷನಲ್ ಕಾಗದ ಕಾರ್ಖಾನೆಯನ್ನು ಖಾಸಗಿಯವರಿಗೆ ವಹಿಸಿಕೊಡುವ ವಿಚಾರವನ್ನು ಸರ್ಕಾರ ಪರಿಶೀಲಿಸುತ್ತಿದೆ ಎಂದು ಕೈಗಾರಿಕಾ ಸಚಿವ ಎಂ. ರಾಜಶೇಖರ ಮೂರ್ತಿ ಅವರು ಇಂದು ವಿಧಾನ ಪರಿಷತ್ತಿನಲ್ಲಿ ತಿಳಿಸಿದರು.

‌ಗಡಿ ವಿವಾದ: ಪಾಟೀಲ್‌ಗೆ ಪ್ರಧಾನಿ ಪತ್ರ
ಬೆಂಗಳೂರು, ಮಾರ್ಚ್‌ 9: ಮೈಸೂರು–ಮಹಾರಾಷ್ಟ್ರ ಗಡಿ ವಿವಾದಕ್ಕೆ ಸಂಬಂಧಿಸಿದಂತೆ ಈಚೆಗೆ ದೆಹಲಿಯಿಂದ ಅಧಿಕಾರಿಗಳು ತಂದ ಸೂಚನೆಗಳು ‘ಬರೇ ತಾತ್ಕಾಲಿಕವಾದವು’ ಎಂದು ಪ್ರಧಾನಿಯವರು ಮುಖ್ಯಮಂತ್ರಿ ಶ್ರೀ ವೀರೇಂದ್ರ ಪಾಟೀಲರಿಗೆ ಬರೆದ ಪತ್ರದಲ್ಲಿ ತಿಳಿಸಿದ್ದಾರೆ.

ಈ ಪ್ರಶ್ನೆಯ ಬಗ್ಗೆ ಚರ್ಚಿಸಲು ದೆಹಲಿಗೆ ಬರುವಂತೆ ಶ್ರೀಮತಿ ಇಂದಿರಾ ಗಾಂಧಿಯವರು ಮುಖ್ಯಮಂತ್ರಿಗಳಿಗೆ ಆಹ್ವಾನ ನೀಡಿದ್ದಾರೆ. ನಿನ್ನೆ ಬೆಂಗಳೂರಿಗೆ ತಲುಪಿದ ಈ ಪತ್ರಕ್ಕೆ ಒಂದೆರಡು ದಿನಗಳಲ್ಲಿ ಶ್ರೀ ಪಾಟೀಲರು ಉತ್ತರ ಬರೆಯಲಿದ್ದಾರೆ. 

ಮಹಾಜನ್ ಶಿಫಾರಸು ಶೀಘ್ರ ಜಾರಿಗೆ ಚವಾಣರಿಗೆ ರಾಜ್ಯ ಶಾಸಕರ ಪ್ರಬಲ ಒತ್ತಾಯ

ನವದೆಹಲಿ, ಮಾರ್ಚ್‌ 9: ಮೈಸೂರು– ಮಹಾರಾಷ್ಟ್ರ ಗಡಿ ವಿವಾದದ ಬಗ್ಗೆ ಮಹಾಜನ್ ಆಯೋಗದ ಶಿಫಾರಸುಗಳನ್ನು ಶೀಘ್ರವೇ ಜಾರಿಗೆ ತರಬೇಕೆಂದು ಮೈಸೂರು ರಾಜ್ಯದ 16 ಮಂದಿ ಶಾಸಕರ ನಿಯೋಗವು ಇಂದು ಮಧ್ಯಾಹ್ನ ಪ್ರಬಲವಾಗಿ ವಾದಿಸಿದ್ದನ್ನು ಕೇಂದ್ರ ಗೃಹಮಂತ್ರಿ ಶ್ರೀ ವೈ.ಬಿ. ಚವಾಣ್ ಆಲಿಸಿದರು.