ಮನೆ ಬಾಗಿಲಿಗೆ ಮದ್ಯ ಇಲ್ಲ ಅದಕ್ಕೆ ಅವಕಾಶವೂ ಇಲ್ಲ!
‘ಮನೆ ಬಾಗಿಲಿಗೇ ಮದ್ಯ’ ಮಾತು ವ್ಯಾಪಕವಾಗಿ ಚರ್ಚೆಯಾಗುತ್ತಿರುವ ಸಂದರ್ಭದಲ್ಲಿ ಅಬಕಾರಿ ಸಚಿವ ಎಚ್.ನಾಗೇಶ್‌ ಅವರ ಫಟಾಫಟ್‌ ಸಂದರ್ಶನದ ಮಾತುಗಳು ಇಲ್ಲಿವೆ...
* ಮನೆ ಬಾಗಿಲಿಗೇ ಮದ್ಯ ಬರುತ್ತದೆ ಎಂಬ ಖುಷಿಯಲ್ಲಿದ್ದ ಪಾನಪ್ರಿಯರಿಗೆ ನಿರಾಸೆ ಮಾಡಿಬಿಟ್ರಲ್ಲ ನೀವು...
ಆನ್‌ಲೈನ್‌ ವ್ಯವಸ್ಥೆ ಮೂಲಕ ಮದ್ಯ ಪೂರೈಸುವ ಚಿಂತನೆ ಈ ಹಿಂದೆ ಇತ್ತು. ಕೆಲವು ರಾಜ್ಯಗಳಲ್ಲಿ ಈ ವ್ಯವಸ್ಥೆ ಇದೆ ಎಂದು ಕೇಳಿದ್ದೇನೆ. ಈ ವಿಷಯವಾಗಿ ಉನ್ನತ ಮಟ್ಟದಲ್ಲಿ ಚರ್ಚಿಸಲಾಗುವುದು ಎಂದಷ್ಟೇ ಹೇಳಿದ್ದೆ. ನನ್ನ ಹೇಳಿಕೆಯನ್ನು ತಿರುಚಿ, ಮನೆ ಮನೆಗೆ ಮದ್ಯ ಪೂರೈಸಲಾಗುತ್ತದೆ ಎಂಬಂತೆ ಸುದ್ದಿ ಮಾಡಲಾಯಿತು.
* ಬೆಂಗಳೂರಿನಲ್ಲಿ ಆನ್‌ಲೈನ್‌ ವ್ಯವಸ್ಥೆ ಮೂಲಕ ಮದ್ಯ ಸರಬರಾಜಾಗುತ್ತಿದೆಯಂತೆ...
ಈ ಬಗ್ಗೆ ದೂರು ಬಂದಿದೆ. ಅದೆಲ್ಲ ಅನಧಿಕೃತ ವ್ಯವಹಾರ. ಇದಕ್ಕೆ ಯಾರು ಅನುಮತಿ ನೀಡಿದ್ದಾರೋ ಗೊತ್ತಿಲ್ಲ. ಪರಿಶೀಲಿಸುತ್ತಿದ್ದೇನೆ.
* ಮನೆ ಬಾಗಿಲಿಗೆ ಮದ್ಯ ಪೂರೈಸುವುದರಿಂದ ಸರ್ಕಾರಕ್ಕೆ ವರಮಾನ ಜಾಸ್ತಿಯಾಗುತ್ತದೆಯೇ?
ಇಲ್ಲ, ಮನೆಯಲ್ಲಿ ಹೆಣ್ಣುಮಕ್ಕಳು ನೋಡುತ್ತಿರುತ್ತಾರೆ ಎಂಬ ಕಾರಣಕ್ಕೆ ಕಡಿಮೆ ಕುಡಿಯುತ್ತಾರೆ. ಹಾಗೆಂದು, ಮನೆ ಬಾಗಿಲಿಗೆ ಮದ್ಯ ಪೂರೈಸುವ ಪ್ರಸ್ತಾವ ಸದ್ಯಕ್ಕೆ ಇಲ್ಲವೇ ಇಲ್ಲ. ಮುಖ್ಯಮಂತ್ರಿ ಬಳಿ ಚರ್ಚಿಸುವವರೆಗೆ ಈ ಬಗ್ಗೆ ಹೇಳಿಕೆ ನೀಡುವ ಅಧಿಕಾರವೂ ನನಗೆ ಇಲ್ಲ.
* ಕುಡಿದು ವಾಹನ ಚಲಾಯಿಸಿದರೆ ಹಾಕುವ ದಂಡದ ಪ್ರಮಾಣ ವಿಪರೀತ ಹೆಚ್ಚಾಗಿದೆ. ಇಂತಹ ಸಂದರ್ಭದಲ್ಲಿ ಮನೆ ಬಾಗಿಲಿಗೇ ಮದ್ಯ ಬಂದಿದ್ದರೆ ಅನುಕೂಲವಾಗುತ್ತಿತ್ತೇನೋ?
ಹೊರಗೆ ಹೋಗಿ ಮಿತಿಮೀರಿ ಕುಡಿಯುವವರು ಕೆಲವೊಮ್ಮೆ ರಸ್ತೆಯಲ್ಲಿ ಬಿದ್ದು ತೊಂದರೆಗೀಡಾಗುತ್ತಿದ್ದರು. ಅಪಘಾತಗಳು ಹೆಚ್ಚಾಗುತ್ತಿದ್ದವು. ಮನೆಯಲ್ಲಿ ಕುಡಿದರೆ ಸುರಕ್ಷಿತವಾಗಿರುತ್ತಾರೆ. ಆದರೆ, ಈ ಮಾತನ್ನು ಮನೆ ಬಾಗಿಲಿಗೆ ಮದ್ಯ ಪೂರೈಸುವ ವ್ಯವಸ್ಥೆಗೆ ನನ್ನ ಸಮರ್ಥನೆ ಎಂದು ಭಾವಿಸಬಾರದು.
* ಆಧಾರ್‌ ಗುರುತಿನ ಚೀಟಿ ಇಲ್ಲದವರು, ಮದ್ಯಪಾನ ಮಾಡಲು ಜೊತೆಗೊಬ್ಬರನ್ನು ಕರೆದೊಯ್ಯುವ ಪರಿಸ್ಥಿತಿ ಬರಲಿದೆಯೇ?
ಪರಿಸರ ಹೋರಾಟಗಾರರ ಸಮಿತಿಯೊಂದು ಇಂತಹ ಸಲಹೆ ನೀಡಿತ್ತು. ಆದರೆ, ಈ ಸಲಹೆ ಅನುಷ್ಠಾನಯೋಗ್ಯವಲ್ಲ.
ಅಬಕಾರಿ ಇಲಾಖೆಯ ಸೂಕ್ಷ್ಮಗಳನ್ನು ಬಹು ಬೇಗ ಅರ್ಥೈಸಿಕೊಂಡಿದ್ದೀರಿ ಎಂಬ ಮಾತಿದೆ...
ಈ ಮಾತನ್ನು ನೀವು ‘ನೆಗೆಟಿವ್‌’ ನೆಲೆಯಲ್ಲಿ ಹೇಳುತ್ತಿದ್ದೀರೋ, ‘ಪಾಸಿಟಿವ್‌’ ಆಗಿಯೋ ಗೊತ್ತಿಲ್ಲ. ಆದರೆ, ಮೊದಲಿನಿಂದಲೂ ನಾನು ಆಡಳಿತ ವರ್ಗದಲ್ಲಿ (ಬೆಸ್ಕಾಂ ತಾಂತ್ರಿಕ ನಿರ್ದೇಶಕರಾಗಿದ್ದರು) ಇದ್ದುದರಿಂದ ಇಲಾಖೆಯನ್ನು ಬೇಗ ಅರಿಯಲು ಸಾಧ್ಯವಾಗಿದೆ.
