ನುಡಿ ಬೆಳಗು | ಕಾರ್ಯತತ್ಪರತೆಯ ಮಹತ್ವ

ಹೀಗೆ ಆಯ್ಕೆಯಾದ ಹೊಸ ರಾಜನೊಬ್ಬನಿಗೆ ಐದು ವರ್ಷದ ನಂತರದ ಸಮಸ್ಯೆ ಯೋಚಿಸಿ ಭಯ ಶುರುವಾಗುತ್ತದೆ. ಆದರೆ ಬುದ್ಧಿವಂತನಾದ ಆತ ಅದರ ಬಗ್ಗೆ ಆರಂಭದಲ್ಲಿಯೇ ಗಮನ ಹರಿಸುತ್ತಾನೆ. ಇತರರಂತೆ ಮೋಜು ಮಸ್ತಿಯಲ್ಲಿ ಕಾಲಹರಣ ಮಾಡುವ ಬದಲು ಈ ಸಮಸ್ಯೆಯಿಂದ ಹೇಗೆ ಪಾರಾಗಬಹುದೆಂದು ಯೋಚಿಸತೊಡಗುತ್ತಾನೆ. ತನ್ನ ನಂಬುಗೆಯ ಸೈನಿಕರನ್ನು ಆ ಕಾಡಿಗೆ ಕಳುಹಿಸುತ್ತಾನೆ. ಆ ಅಭೇದ್ಯ ಕಾಡನ್ನು ನಿಧಾನವಾಗಿ ಪರಿವರ್ತಿಸತೊಡಗುತ್ತಾನೆ. ಹಂತಹಂತವಾಗಿ ಕಾಡಿನ ನಟ್ಟನಡುವಿನ ಮರಗಿಡಗಳನ್ನು ಕಡಿಸಿ, ತೊರೆಗಳನ್ನು ಶುಚಿಗೊಳಿಸುತ್ತಾನೆ. ರಾಜ್ಯದ ಕಡುಬಡವರನ್ನು ಹುಡುಕಿಸಿ ಅವರನ್ನು ಅಲ್ಲಿ ವಾಸಿಸಲು ಕಳುಹಿಸುತ್ತಾನೆ. ಹೊರಗಿನಿಂದ ಗೊಂಡಾರಣ್ಯವಾಗಿ ಕಾಣುವ ಕಾಡನ್ನು ನಟ್ಟನಡುವೆ ಸುಂದರವಾದ ಎಲ್ಲ ಸೌಕರ್ಯಗಳಿರುವ ಊರನ್ನಾಗಿ ಮಾರ್ಪಡಿಸುತ್ತಾನೆ. ಐದು ವರ್ಷದ ನಂತರ ಎಲ್ಲ ರಾಜರೂ ಅಳುತ್ತ ಗಾಬರಿಯಿಂದ ಜೀವಭಯದಿಂದ ಹೊರಟರೆ ಈತ ಮುಗುಳ್ನಗುತ್ತ ಜನರಿಂದ ಬೀಳ್ಕೊಳ್ಳುತ್ತಾನೆ. ಮುಂದಾಲೋಚನೆಯಿಂದ ತಾನು ಐದು ವರ್ಷಗಳ ಕಾಲ ಶ್ರಮಪಟ್ಟು ನಿರ್ಮಿಸಿದ್ದ ಕಾಡೊಳಗಿನ ನಾಡಿಗೆ ಹೋದಾಗ ಅಲ್ಲಿದ್ದವರು ಅವನನ್ನು ಆತ್ಮೀಯತೆಯಿಂದ ಸ್ವಾಗತಿಸುತ್ತಾರೆ. ಅಲ್ಲಿಯೂ ತಾನೇ ಕಟ್ಟಿದ ರಾಜ್ಯದ ಪ್ರಜೆಗಳ ಪ್ರೀತಿಯ ರಾಜನಾಗಿ ಬದುಕುತ್ತಾನೆ.

ಹಾಗಾದರೆ ಹಿಂದಿನ ರಾಜರಿಗ್ಯಾರಿಗೂ ಈ ಉಪಾಯ ಹೊಳೆಯಲಿಲ್ಲವೇ? ಇಷ್ಟು ಸರಳ ಸಂಗತಿ ಗೊತ್ತಿಲ್ಲದವರೇನಲ್ಲ ಯಾರೂ. ಆರಾಮಾಗಿ ರಾಜನಾಗಿ ಕಾಲ ಕಳೆಯೋಣ ಮತ್ತೆ ನೋಡಿಕೊಂಡರಾಯಿತೆಂದು ಆಯ್ಕೆಯಾದವರೂ ಯೋಚಿಸುತ್ತಿದ್ದರು. ಆದರೆ ಕಾರ್ಯತತ್ಪರರಾಗುವಷ್ಟರಲ್ಲಿ ಸಮಯ ಉರುಳಿಹೋಗುತ್ತಿತ್ತು! ನಾವೂ ಹಾಗೆಯೇ ಅಲ್ಲವೇ? ನಮಗೂ ಎಲ್ಲ ಗೊತ್ತಿದೆ! ದಿನವೂ ಹೊಟ್ಟೆ ಬಿರಿಯುವಷ್ಟು ತಿಂದರೆ, ದೈಹಿಕ ಚಟುವಟಿಕೆ ಮಾಡದಿದ್ದರೆ ಮುಂದೆ ಅನಾರೋಗ್ಯಕ್ಕೀಡಾಗುತ್ತೇವೆಂದು, ಕಷ್ಟವಾದರೂ ಸರಿ ಉಳಿತಾಯ ಮಾಡದಿದ್ದರೆ ಸಮಸ್ಯೆಯಾಗುತ್ತದೆಂದು, ಓದದಿದ್ದರೆ ಒಳ್ಳೆಯ ಅಂಕ ಬರುವುದಿಲ್ಲವೆಂದು ಯಾರಿಗೆ ತಾನೇ ಗೊತ್ತಿಲ್ಲ? ಬಾಯಿ ಮೊಸರಾಗಲು ಕೈ ಕೆಸರು ಮಾಡಿಕೊಳ್ಳುವುದು ಬಹುಮುಖ್ಯವೆಂಬ ಅರಿವು ಯಾರಿಗಿಲ್ಲ? ನಾಳೆ ಎನ್ನುವವರ ನಾಳೆಗಳು ಇಂದಿನಂತೆಯೇ ಕಳೆದುಹೋಗುತ್ತವೆ. ಮುನ್ನೆಚ್ಚರಿಕೆಯಿಂದ, ಶ್ರಮ ವಹಿಸಿ ಕಾರ್ಯತತ್ಪರರಾಗುವವರು ಮಾತ್ರ ಅಂದುಕೊಂಡಿದ್ದನ್ನು ಸಾಧಿಸುತ್ತಾರೆ, ಅಷ್ಟೆ.