ಹಾಂಗ್ಕಾಂಗ್, ಮೇ 20– ಈಗ ವಿಶ್ವಸಮರದ ಅಪಾಯ ತಲೆದೋರಿದೆ ಎಂದು ಚೀನಾದ ಕಮ್ಯುನಿಸ್ಟ್ ಪಕ್ಷದ ಅಧ್ಯಕ್ಷ ಮಾವೋತ್ಸೆ ತುಂಗ್ ಅವರು ತಿಳಿಸಿರುವುದಾಗಿ ಪೀಕಿಂಗ್ ರೇಡಿಯೊ ಇಂದು ವರದಿ ಮಾಡಿತು.
‘ವಿಶ್ವಸಮರದ ಸೂಚನೆ ಇದೆ, ಸಿದ್ಧರಾಗಿ’ ಎಂದು ಮಾವೊ ವಿಶ್ವಕ್ಕೆ ಕರೆ ನೀಡಿದ್ದಾರೆ.
ಅಮೆರಿಕದ ಸಾಮ್ರಾಜ್ಯಶಾಹಿ ವಿರುದ್ಧ ಹೋರಾಡಲು ಚೀನೀಯರು ಕಾಂಬೋಡಿಯಾದ ಪದಚ್ಯುತ ಅಧ್ಯಕ್ಷ ನರೋದಮ್ ಸಿಹನೂರ್ ಅವರಿಗೆ ಬೆಂಬಲ ನೀಡುವರೆಂದು ಮಾವೊ ತಿಳಿಸಿರುವುದಾಗಿ ಪೀಕಿಂಗ್ ರೇಡಿಯೊ ಪ್ರಮುಖ ಪ್ರಕಟಣೆಯಲ್ಲಿ ತಿಳಿಸಿದೆ.
‘ಕಾಂಗ್ರೆಸ್ ಒಡೆಯಲು ಎಸ್ಸೆನ್ ಕಾರಣ’
ನವದೆಹಲಿ, ಮೇ 20– ಕಾಂಗ್ರೆಸ್ ಇಬ್ಭಾಗವಾಗಲು ವಿರೋಧಿ ಕಾಂಗ್ರೆಸ್ ಅಧ್ಯಕ್ಷ ಶ್ರೀ ಎಸ್.ನಿಜಲಿಂಗಪ್ಪನವರೇ ಕಾರಣ ಎಂದು ಆಡಳಿತ ಕಾಂಗ್ರೆಸ್ ಸಂಸತ್ ಪಕ್ಷದ ವಾರ್ಷಿಕ ವರದಿ ಇಂದು ತಿಳಿಸಿದೆ.
ಶ್ರೀ ನಿಜಲಿಂಗಪ್ಪ ಹಾಗೂ ಅವರ ಸಹಚರರ ಮತ್ತು ಪ್ರಧಾನಿ ಹಾಗೂ ಅವರ ಸಹೋದ್ಯೋಗಿಗಳ ನಡುವಣ ಹೋರಾಟವು ಪಾಳೆಗಾರಿಕೆ ಮತ್ತು ಪ್ರಜಾಸತ್ತೆಯ ನಡುವಣ ಸಂಘರ್ಷದ ಸಂಕೇತವಾಗಿದೆ ಎಂದು ಈ ವರದಿ ತಿಳಿಸಿದೆ.
‘ಪಕ್ಷವು ಸವಾಲನ್ನು ಸ್ವೀಕರಿಸಿ ಪ್ರಜಾಸತ್ತೆಯನ್ನೇ ಆರಿಸಿಕೊಂಡಿತಲ್ಲದೆ ಪ್ರಧಾನಿಯ ಬೆಂಬಲಕ್ಕೆ ಬಂದು ನಿಂತಿತು’ ಎಂದು ಹೇಳಿದೆ.