ದೇಶದಲ್ಲಿ ಕೊರೊನಾ ವೈರಾಣುವಿನ ಪಸರಿಸುವಿಕೆ ನಿಯಂತ್ರಣಕ್ಕೆ ಬರುತ್ತಿದೆ. ವಾಯುಯಾನವು ಕೋವಿಡ್ ಪೂರ್ವದ ದಿನಗಳಿಗೆ ಮರಳುತ್ತಿದೆ. ಹೆಚ್ಚು ಕಡಿಮೆ ಎಲ್ಲ ಎಕ್ಸ್‌ಪ್ರೆಸ್‌ ರೈಲುಗಳೂ ಸ್ಪೆಷಲ್‌ ರೈಲು ಎಂದು ರೂಪಾಂತರ ಹೊಂದಿ ಓಡಾಡುತ್ತಿವೆ. ಆದರೆ, ಡೆಮು ರೈಲುಗಳು ಇದಕ್ಕೆ ಅಪವಾದ. ಅಧಿಕಾರಿಗಳು ರೈಲ್ವೆ ಮಂಡಳಿಯತ್ತಲೇ ಬೊಟ್ಟು ಮಾಡುತ್ತಿದ್ದಾರೆ. ಕಡಿಮೆ ಅಂತರದ ಎರಡು ನಗರಗಳ ಮಧ್ಯೆ ಚಲಿಸುವ ಈ ಡೆಮು ರೈಲುಗಳು ಮಾರ್ಗ ಮಧ್ಯದಲ್ಲಿನ ಎಲ್ಲ ನಿಲ್ದಾಣಗಳಲ್ಲಿ ನಿಲ್ಲುತ್ತವೆ, ಜೊತೆಗೆ ಅಗ್ಗದ ದರ. ಹೀಗಾಗಿಯೇ ಬಹಳ ಜನಾನುರಾಗಿಯಾಗಿರುವ ಈ ರೈಲುಗಳು ಹಳಿಗಳಿಂದ ಮಾಯವಾಗಿ ಹಲವಾರು ತಿಂಗಳುಗಳಾಗಿವೆ.
