ಹಲ್ಮಿಡಿ ಗ್ರಾಮ: ಅಲಕ್ಷ್ಯ ಸಲ್ಲ

ಹಾಸನ- ಚಿಕ್ಕಮಗಳೂರು ಹೆದ್ದಾರಿಯಲ್ಲಿ, ಬೇಲೂರು ಮತ್ತು ಚಿಕ್ಕಮಗಳೂರಿನ ಮಧ್ಯೆ ಇರುವ ಹೆದ್ದಾರಿಯಿಂದ 4 ಕಿ.ಮೀ. ಒಳಗೆ ಇರುವ ಹಲ್ಮಿಡಿಗೆ ಹೋಗುವ ರಸ್ತೆ ಪ್ರವೇಶ ದ್ವಾರದಲ್ಲಿ ದೊಡ್ಡ ಕಮಾನು ಇದೆ. ಆದರೂ ಮಧ್ಯೆ ಮಧ್ಯೆ ಮಾರ್ಗಸೂಚಿ ಫಲಕಗಳಿಲ್ಲ. ಹಲ್ಮಿಡಿ ಊರಿನಲ್ಲಿಯೂ ಶಿಲಾಶಾಸನ ಇರುವ ಸ್ಥಳದ ಬಗ್ಗೆ ಸೂಚನಾ ಫಲಕಗಳಿಲ್ಲ.

ಕನ್ನಡ ಸಾಹಿತ್ಯ ಪರಿಷತ್ತಿನ ಪ್ರಯತ್ನದಿಂದ ಶಿಲಾಶಾಸನದ ಪ್ರತಿಕೃತಿ ಮತ್ತು ಇತರ ಶಿಲ್ಪಗಳನ್ನು ಜತನವಾಗಿ ಕಾಯ್ದಿಡಲಾಗಿದೆ. ಅಲ್ಲಿಂದ ಅಂಬಲಿ ಮಾರ್ಗವಾಗಿ ಚಿಕ್ಕಮಗಳೂರು ಬರೀ ಹತ್ತು ಕಿ.ಮೀ. ದೂರ ಇದ್ದರೂ ರಸ್ತೆ ತೀರಾ ಹದಗೆಟ್ಟಿರುವುದರಿಂದ ಅಲ್ಲಿಗೆ ತಲುಪಲು ಕನಿಷ್ಠ ಅರ್ಧ ಗಂಟೆ ಬೇಕಾಗುತ್ತದೆ.

ಕಾರಿನಲ್ಲಿ ಹೋಗುವುದಿರಲಿ ದ್ವಿಚಕ್ರ ವಾಹನದಲ್ಲಿ ಹೋಗುವುದೂ ದುಸ್ತರ. ಇತಿಹಾಸ ಪ್ರಸಿದ್ಧ ಹಲ್ಮಿಡಿ ಸಂಪರ್ಕ ರಸ್ತೆಯ ಈ ಶೋಚನೀಯ ಸ್ಥಿತಿ ದುರದೃಷ್ಟಕರ. ಸಂಬಂಧಿಸಿದ ಇಲಾಖೆ ಕೂಡಲೇ ಇತ್ತ ಗಮನಹರಿಸಿ ಈ ನ್ಯೂನತೆ ಸರಿಪಡಿಸಬೇಕು.

-ಪ್ರೊ. ಎಸ್.ಬಿ.ರಂಗನಾಥ್‌,ಸಿರಿಗೆರೆ