ಪ್ರತೀ ಚುನಾವಣೆಯಲ್ಲಿ ಬಳಸುವಷ್ಟು ವಿಶ್ವಾಸಾರ್ಹತೆಯನ್ನು ಗಳಿಸಿಕೊಂಡಿರುವ ಅಳಿಸಲಾಗದ ಶಾಯಿ (ಇಂಡೆಲಿಬಲ್ ಇಂಕ್) ಮೈಸೂರಿನ ‘ಅರಗು ಮತ್ತು ಬಣ್ಣ’ ಕಾರ್ಖಾನೆಯಲ್ಲಿ ತಯಾರಾಗುವುದು ಕರ್ನಾಟಕಕ್ಕೂ ಹೆಮ್ಮೆಯ ವಿಷಯವೇ. ಈ ಸಂಗತಿಯನ್ನು ತಿಳಿಸುವ ಸುದ್ದಿಯಲ್ಲಿ ಒಂದು ಆತಂಕಕಾರಿ ಅಂಶವೂ ಇದೆ. ಸುದ್ದಿಗೆ ಪೂರಕವಾಗಿ ಮಾಧ್ಯಮದಲ್ಲಿ ಮುದ್ರಿಸಿರುವ ಚಿತ್ರವನ್ನು ನೋಡಿದರೆ, ಅಳಿಸಲಾಗದ ಶಾಯಿಯನ್ನು ತುಂಬಿಸುವ ಬಾಟಲಿಯ ಬಣ್ಣ ಕೇಸರಿ ಬಣ್ಣದಲ್ಲಿರುವಂತೆ ತೋರುತ್ತದೆ. ಇದು ನಿಜವೇ ಆಗಿದ್ದರೆ, ಮುಂಬರುವ ಚುನಾವಣೆಗಳಲ್ಲಿ ಬಳಸಲಾಗುವ ಈ ಬಾಟಲಿಯ ಬಣ್ಣವು ಸಂಘ ಪರಿವಾರ ಮತ್ತು ಅದರ ರಾಜಕೀಯ ಅಂಗದ ವಿವಿಧ ಲಾಂಛನಗಳ ನಿರ್ದಿಷ್ಟ ಬಣ್ಣವಾಗಿರುವುದರಿಂದ, ಅದು ಆ ಪಕ್ಷವು ಚುನಾವಣಾ ನೀತಿ-ನಿಯಮಗಳನ್ನು ಉಲ್ಲಂಘಿಸುವ, ಚುನಾವಣಾ ಭ್ರಷ್ಟಾಚಾರದ ಆಪಾದನೆಗಳನ್ನು ಹೊರಲು ಕಾರಣವಾಗಬಹುದು.
